Fasin blong Dresap mo Fasin blong Mekem Yu

Long wol blong tedei, plante i no andastanem o respektem ol bodi blong yumi olsem wan tabu samting long laef, Ol Lata-dei Sent oli kamaot klia taem oli dresap long wan wei blong soem se yumi save olsem wanem ol bodi blong yumi oli spesel tumas (luk long For the Strength of Youth [buklet, 2011], 6–8). Long pej 52 blong magasin ia, Meri N. Kuk, fas kaonsela long ol Yang Woman jeneral presidensi, i toktok raon long topik ia:

“Taem oli stap bildim wan tempol, oli mekemsua se hem i gat proteksen, mo oli dikoretem i naes gud, insaed mo aotsaed. Wan ki blong mekem plan blong ol tempol, i blong andastanem se tempol i ripresentem Lod-hem i haos blong Hem. Yumi respektem ol tempol olsem ol tabu bilding, we oli ol ples we olgeta we oli klin inaf nomo oli save go insaed long hem. Yumi stap revren long ol tempol from ol tabu odinens mo kavenan we yumi stap tekpat long olgeta, we oli mekem i posibol blong yumi gobak long Papa blong yumi long Heven.

“Bodi blong yu i moa impoten bitim eni naes tempol we i stap long wol. Yu yu boe o gel blong God we Hem i lavem yu tumas! Ol semfala prinsipol ia—fasin blong ripresentem, blong gat respek mo stap revren—oli blong yumi yusum moa blong mekem se yumi kea mo protektem moa bodi blong yumi.”

Ol tingting we i stap ia i save helpem yu tijim ol pikinini blong yu ol stret prinsipol abaot fasin blong dresap mo fasin blong oli mekem olgeta. Tingbaot tu se eksampol blong yu long saed blong dresap gud bae i tijim ol pikinini blong yu from wanem i impoten blong dresap gud.