Olsem Wanem blong Save Laef long Ples blong Enemi

Mi toktok olsem wan we i bin luk laef bifo mo bae i wantem rere long yu long fiuja laef.

Yufala i stap groap long ples blong enemi. Taem bae yufala i kam raep gud long saed blong spirit, bae yufala i andastanem olsem wanem enemi i bin kam insaed long wol raon long yufala. Hem i stap insaed long ol hom, entetenmen, media, lanwis—evri samting raon long yufala. Long plante taem, yufala i no save luk se hem i stap.

Bae mi talem long yufala wanem we i gud moa mo wanem i gud moa blong wantem. Skripja i talem “Waes tingting i stamba samting; nao yufala i mas kasem waes tingting,” mo bae mi ademap “mo wetem evri samting we yufala i kasem, yufala i mas gohed!” (Ol Proveb 4:7). Mi no gat taem blong westem mo yufala tu. So yufala i lisingud!

Stret taem ia we mi disaed blong stap olsem wan tija, i kliagud long maen blong mi. Long taem blong Wol Wo 2, mi gat samples 20 yia mo mi wan paelot long EaFos. Mi stap long smol aelan blong Ae Sima. Aelan ia, i smol, i stap hemwan, i bigwan olsem stam blong putum long leta, mo i stap long not poen blong Okinawa.

Wan hot naet we mi stap miwan, mi sidaon antap long wan klif blong luk san i draon. Mi tingbaot se mi luk long mun mo tingting: “Hemia i semfala mun ia nomo we i saen longwe long hom blong mi long Yuta.” Mi stap tingting hevi long wanem bae mi mekem wetem laef blong mi afta long wo, sapos mi laki inaf blong laef i stap. Wanem nao mi wantem kam? Long naet ia mi disaed se bae mi kam wan tija. Mi talem se ol tija oli stap lanem samting oltaem. Blong lanem samting, i wan stamba tingting blong laef.

Fas taem we mi tijim seminari, hem i long 1949 long Brigham Siti. Mi bin wan studen long seminari ia long taem we mi stap go long hae skul.

I bin gat trifala kos we oli stap tijim fastaem long seminari: Ol Testeman, Niu Testeman, mo Jos Histri. Hem i bin spesel janis blong mi blong ademap wan eli moning klas abaot Buk blong Momon. Fastaem, Buk blong Momon i no pat blong kurikulum from se ol studen oli no kasem mak blong hem long graduesen blong hae skul. Mi bin kambak long wo wetem wan testemoni blong Buk blong Momon mo mi andastanem olsem wanem presen blong Tabu Spirit i stap wok.

Ful laef blong yu, oli bin tijim yu abaot presen we i Tabu Spirit, be tijing i gat limit i stap. Yu save, mo wanem we i tru, i we yu mas mekem haf rod ia yuwan blong faenemaot insaed long yu olsem wanem Tabu Spirit i save lidim mo protektem yu.

Long ol yang man mo yang woman, rod ia i semmak. Blong faenemaot olsem wanem Tabu Spirit i wok insaed long laef blong yu i wan wok blong ful laef. Taem yu faenemaot samting ia blong yuwan, yu save laef long ples blong enemi mo bae man i no save giaman o spolem yu. Bae i no save gat wan memba blong Jos—mo hemia i minim wanwan long yufala—bae i save mekem wan bigfala mistek, be fastaem, kasem woning blong toktok blong Tabu Spirit.

Samtaem, taem yu mekem mistek finis, yu save talem olsem: “Mi bin save se mi no mas mekem samting ia. Mi no bin filim gud,” o ating, “Mi save se mi sapos blong mekem samting ia. Mi no gat strong paoa long tingting blong tekem aksen!” Ol tingting ia, oli kam long Tabu Spirit we i traem blong lidim yu long wanem i gud, o wonem yu blong go longwe long denja.

I gat sam samting we yu no mas mekem sapos yu wantem laen blong komunikesen i open oltaem. Yu no save giaman, o kopi, o stil, o mekem rabis fasin mo semtaem gat ol laen ia oli open i stap mo i no diskonek. Yufala i no go long ples we ples i agensem komunikesen long saed blong spirit.

Yu mas lan blong lukaotem paoa mo daereksen we i stap blong yu yusum, mo afta, folem hemia nomata wanem i hapen.

Faswan long lis blong “ol samting blong mekem” i blong putum toktok ia, prea. Plante taem, prea blong yu bae i kwaet nomo. Yu save talem prea long tingting blong yu.

Be oltaem yufala i save gat wan laen blong toktok stret i go long Papa long Heven. No letem enemi i winim tingting blong yu se i no gat wan bae i lisin long yu. Prea blong yu, oli harem oltaem. Yu neva stap yuwan!

Tekem kea long bodi blong yu. Stap klin. “Ating yufala i save finis we yufala i olsem haos blong God, mo we Spirit blong God i stap finis long yufala.” (Fas Korin 3:16).

Ridimgud ol promes we oli stap long seksen 89 blong Doktrin mo Ol Kavenan. Tok blong Waes i no promesem se bae man i gat wan helt we i stret gud be wanem i save lisin long spirit, we i stap insaed long yu, bae i kam strong moa.

Stap longwe long ol tatu, mo ol samting semmak we i jenisim bodi blong yu. Bodi blong yu, oli bin krietem folem bodi blong Hem.

Mi wantem toktok nao long fasin blong tok stret, long saed blong wan nara poen

Yumi save se fasin blong stap man o woman, i bin hapen long wol bifo laef long wol ia.¹ “Spirit mo bodi oli sol blong man” (D&C 88:15). Poen ia, blong stap olsem man o woman, i wan wari long ol Lida, semmak olsem evri poen blong gud fasin.

Sam long yufala i bin filim, o oli bin talem long yufala, se yufala i bon wetem ol trabol long filing mo yufala i no rong sapos yufala i tekem aksen folem ol temtesen ia. Long saed blong doktrin, yumi save se sapos hemia i tru, bae yufala i no gat fridom blong joes, mo hemia i no save hapen olsem. Oltaem yufala i gat wan joes blong folem ol toktok blong Tabu Spirit mo laef folem wan laef we i klin evriwan mo i klin gud, wan laef we i fulap long tabu fasin.

Presiden Godon B. Hinkli i bin anaonsem hemia long wan jeneral Konfrens: “Sam pipol oli save askem yumi long ples we yumi stanap long hem abaot olgeta pipol we oli stap singaotem olgetawan ol man we i go wetem man, o woman we i go wetem woman. Ansa blong mi i we yumi lavem olgeta olsem ol boe mo gel blong God. Oli gat wan fasin we i strong mo i had blong kontrolem. Plante pipol oli gat ol defren kaen temtesen long ol defren taem. Sapos oli tekem aksen folem ol temtesen ia, oli save go fored mo mekem wanem we evri memba blong Jos oli mekem. Sapos oli foldaon long loa blong jastiti, mo ol standet blong gud fasin blong Jos, nao, oli fesem disiplin blong Jos, semmak olsem ol narafala memba.

“Mifala i wantem help blong mekem olgeta oli kam strong moa, blong helpem olgeta wetem ol problem blong olgeta mo blong helpem olgeta wetem ol hadtaem blong olgeta. Be yumi no save stanap nating sapos oli stap folem ol rabis aktiviti, sapos oli stap traem blong sapotem mo difendem mo laef long wan laef we oli singaotem sem seks mared. Blong letem hemia, i olsem blong no tingting hevi long bigfala mo tabu fandesen blong mared we God i putum, mo stret stamba tingting biaen long hem we i blong lukaotem ol famle.”²

Presiden Hinkli i bin stap toktok long bihaf blong Jos.

Fas presen we Adam mo Iv i bin kasem i fridom blong joes. Lod i talem long tufala se tufala i save jusum wanem we tufala i wantem, from Hem i givim paoa ia long tufala (luk long Moses 3:17).

Yufala i gat semfala fridom blong joes ia. Yusum wetem waes blong yufala i no tekem aksen long eni filing we i no klin o temtesen we i nogud we i save kam long maen blong yufala. Yufala i no go long ples ia; mo sapos yufala i stap ia finis, kambak, kamaot long ples ia. “Yufala i tanem baksaed blong yufala bakegen long evri fasin we i no olsem blong god” (Moronae 10:32).

Yu no spolem ol paoa blong givim laef we oli stap insaed long bodi blong yu, o wetem ol memba we oli gat semmak seks olsem yu. Hemia standet blong Jos, mo bae hem i no save jenis. Taem bae yu kam bigwan, bae i gat temtesen blong traem mo traem luk ol samting we oli rabis. Yu no mekem hemia!

Ki toktok i disiplin—disiplin blong yuwan. Toktok ia, disiplin, i kam long toktok ia, disaepol, o man we i folem. Stap wan disaepol o man blong folem Sevya, mo bae yu sef i stap

Wan i save tingting olsem: “Mi mi rong finis long samting ia, o bigfala mistek ia. I let finis long mi.” Hem i neva let tumas.

Long hom blong yu, oli bin tijim yu mo tu, long seminari, abaot Atonmen blong Jisas Kraes. Atonmen i olsem samting we i waepemaot samting. Hem i save waepemaot rong mo risal blong wanem we i stap mekem yu filim se yu bin rong.

Blong filim se yu rong, i wan soa long saed blong spirit. Yu no stap safa long soa we i kam wanwan taem. Karemaot samting ia. Finis wetem samting ia. Sakem sin, mo sapos i nid, sakem sin bakegen, mo bakegen, mo bakegen, mo bakegen kasem taem we yu—be i no enemi—i stap kontrolem yu.

Bae yu luk se laef i ol tes mo ol mistek we oli joenjoen i go. Ademap “sakem sin fulap taem” long lis blong ol samting blong mekem. Hemia bae i tekem pis we man i no save pem long mane blong wol. Blong andastanem Atonmen, i wan impotent trutok we yu save lanem taem yu yangfala.

Sapos yu stap joenem ol narafalawan we oli stap pulum yu i go daon be oli no stap bildimap yu; yu stop mo yu jenisim grup blong yu; Ating bae yu stap yuwan sam taem. Impoten kwestin, yu save askem: “Taem yu stap yuwan, yu gat wan gudfala kampani?”

Blong katemaot wan fasin we yu bin letem i fasem gud yu, i save had. Be paoa i stap insaed long yu blong yu mekem. Yu no givap. Profet Josef Smit i bin tijim se “evriwan we i gat wan bodi i gat paoa ova long olgeta we oli no gat bodi.”³ Yu save stanap agensem temtesen!

Ating bae yu no mitim enemi blong yu stret; hem i no stap soemaot hemwan long wei ia. Be sapos hem i kamaot long yu blong testem mo temtem yu, yu gat wan moa samting. Yu save talemaot fridom blong yu, mo bae hem i lego yu.

Yu no man o woman olbaot. Yu yu spesel. Yu yu wan kaen nomo. Olsem wanem mi save samting ia? Mi save hemia from se yu bin bon long wan taem mo wan ples we gospel blong Jisas Kraes i save kam long laef blong yu tru long ol tijing mo ol aktiviti insaed long hom blong yu mo long Jos blong Jisas Kraes blong Ol Lata-dei Sent. Hem i olsem we Lod Hemwan i bin talem wan jos nomo we i tru mo i laef long fes blong ful wol (luk long D&C 1:30).

I gat ol nara samting we yumi save ademap long lis, be yu save wanem we yu mas mekem mo no mas mekem long laef blong yu. Yu save gud mo nogud, mo yu no nid blong oli talemaot evri samting long yu.

Yu no sakemaot ol yia blong seminari tijing. Tekem janis long bigfala blesing we yu gat blong lanem ol doktrin blong Jos mo ol tijing blong ol profet. Lanem wanem we i moa gud. Bae i blesem yu mo laen blong yu blong plante jeneresen we i stap kam yet.

I no longtaem i kam, bae yu mared mo gat ol pikinini, wan mared we i mas sil insaed long tempol. Prea blong mifala i blong yu stap, long stret taem, sef insaed long wan family wod o branj.

Yufala i no fraet long fiuja. Yufala i no fraet long wanem i stap long fored. Go fored wetem hop mo fet. Tingbaot bigfala paoa ia we i Tabu Spirit. Lan blong Hem i tijim yufala. Lanem blong lukaotem spirit ia. Lanem blong laef folem. Lanem blong prea oltaem long nem blong Jisas Kraes (luk long 3 Nifae 18:19–20). Spirit blong Lod bae i stap wetem yufala mo bae yufala i gat blesing.

Mifala i gat bigfala, bigfala fet long yufala.

Mi talemaot testemoni blong mi long yufala—wan witnes we i kam long mi taem mi yangfala. Mo yufala semmak olsem mi, i no defren long eni narafala man. Yufala i gat raet blong gat wan testemoni mo witnes semmak olsem eniwan. Bae i kam long yu sapos yu wok from. Mi askem blong ol blesing blong Lod oli stap long yufala—ol blesing blong witnes ia i stap long laef blong yufala, blong gaedem yufala taem yufala i mekem wan hapi fiuja.