Fas Stek long India I Oganaes

I bin gat wan filing blong bigfala glad mo tangkyu taem moa bitim 1,500 memba mo fren i kam tugeta long Novotel Konvensen Senta long Haederabad, India, blong krietem Haederabad India Stek, fas stek long kantri, long 27 Mei 2012. Elda Dalin H. Oks blong Kworom blong Ol Twelef Aposol i bin prisaed mo i bin kam wetem Elda Donal L. Holstrom blong Presidensi blong Olgeta Seventi mo Elda Antoni D. Pekins blong Olgeta Seventi, we i stap olsem Eria Presiden blong Esia. Wanwan lida ia i bin joenem konfrens ia wetem ol waef blong olgeta.

Jon Gati oli bin sastenem hem olsem stek presiden wetem Sures Nararajan olsem fas kaonsela mo Rajaratnam Busi olsem seken kaonsela. Fas Petriak blong India hem i foma distrik presiden, Prasad Rao Gudi.

Long toktok blong hem i go long bigfala grup blong ol Sent we i bin kam tugeta long India, Randi D. Fank, presiden blong India Bangalor Misin, i talem, “Hemia i wan dei blong histri we i naes tumas blong luk, wan dei we bae yumi oltaem tingbaot. Bae yumi oltaem tingbaot se wan Aposol blong Lod i bin kam ia.”

Elda Pekins i bin talemaot lav blong Esia Eria Presidensi i go long ol memba long India mo talem, “Yumi stap luk stat blong wan gudgala wok tumas long graon ia. Jos i gro mo oli jes krietem stek folem ol gospel prinsipol we i no save finis mo putum ol prishud paten.”

Taem hem i luksave se hem i bin wan seken witnes long koling blong niufala stek presidensi ia, Elda Holstrom i bin eksplenem fasin mo rod blong jusum ol niufala stek lida folem revelesen. Hem i talem se olsem wan memba blong Olgeta Seventi, oli bin givim wan wok long hem mo hem i bin kam, i no wetem tingting blong hemwan nomo. Hem i bin kam long wei blong Lod, i dipen long Spirit blong Hem blong kasem revelesen. “Tingting blong Lod i blong Presiden Guti i kam stek presiden,” Elda Holstrom i talem.

Kristen Oks, we i bin go wetem hasban blong hem, i bin toktok long saed blong tijim ol pikinini blong mekem se oli biliv, “from ol mama blong olgeta i bin save hemia” (luk long Alma 56:48).

Olsem las spika long miting ia, Elda Oks i bin talemaot bigfala tangkyu long nesen blong India, wan kantri wetem fridom blong relijin we i letem ol memba blong Jos “blong mit mo tokbaot ol prinsipol blong fet blong yumi.”

Elda Oks i bin testifae se hem i gat wan witnes blong Spirit se Lod i bin rere mo i bin jusum ol lida we oli bin singaotem olgeta. Elda Oks i bin tokbaot tu ol niu responsabiliti blong wan stek.

Hem i talem se long OlTesteman, profet Aesea i bin komperem Israel long wan tenet we ol pikinini blong Israel i stap andanit long hem. “Jos tedei i wan tenet. Yumi evriwan i save se wan tenet i mas gat ol stik (ol stek) blong sapotem. Naoia we Haederabad i wan stek blong Saeon, bae yu mas putum wan step i go fored mo givim sapot long wei blong pem taeting mo sendem ol misinari.”

Olsem wan risal blong wan stek we oli jes mekem, ol memba blong Haederabad bae oli save kasem ol petriakel blesing. Elda Oks i bin eksplenem wanem i stap insaed long wan petriakel blesing, mo talem se ol blesing oli olsem “ol praevet skripja.”

“Wan petriakel blesing i talemaot laen blong yu insaed traeb blong Israel, we plante gudfala blesing i kam tru long hem,” Elda Oks i talem. “Wan petriakel blesing i stap talemaot tu ol blesing mo ol promes we yumi save kasem sapos yumi stap fetful.”

“Taem we Jos long India i stap gro, bae taem i kam we Profet bae i kasem insperesen blong bildim wan tempol long India,” hem i gohed. “Taem oli krietem ol stek, i givim tingting ia se bae i save gat wan tempol. Taem pipol i soem fasin blong stap klin inaf mo komitmen, wan tempol bae i kam.”

Blong endem, Elda Oks i bin givim wan blesing: “Long fas stek long bigfala kantri blong India, mi blesem yufala blong tingbaot ol tijing we i stap hapen naoia. Mi blesem yufala blong tingbaot ol kavenan we yufala i bin mekem taem yufala i bin kasem baptaes. Mi blesem yufala wetem wan save mo strong tingting blong kipim ol komanmen blong God blong yufala i save stap glad long ol blesing blong Hem.”