Stap Kliarem Kalenda blong Yumi blong Konfrens

Ol yia i pas, taem ol sikis pikinini blong mitufala i yang yet, mifala i plan se mifala i wantem blong mekem jeneral konfrens i moa impoten long mifala. Mifala i tokbaot olsem wanem i impoten blong lukluk konfrens wetem ol maen we i klia mo ol bodi we i fit. Konfrens i wan impoten taem blong kasem tijing long ol profet blong yumi tedei. Mekem se mifala i putum wan gol blong no mekem eni moa samting blong sam dei bifo konfrens o long taem blong wik blong konfrens. Mifala i blokem ol dei ia long kalenda blong mifala, mo wanwan long mifala i komitim hemwan blong no gat eni ekstra aktiviti long ol dei ia.

Sapos yu jusum blong mekem sem samting ia, bae i mas stret nomo long famle blong yu mo situesen blong yu, be famle blong mifala i faenem se “ekstra aktiviti” olsem go long ol skul aktiviti, mekem ol pikinini blong neiba i kam long haos, mekem sam samting wetem ol fren samples, gat ol pati o dina wetem ol fren o famle, mekem ol projek o wok long yad long bitwin o long taem blong ol konfrens sesen, sevem ol skul projek kasem las minit, mo akseptem ol ekstra wok long wok.

Taem wik bifo jeneral konfrens i kam, i bin had samtaem blong talem no long ol aktiviti ia, be plante taem ol famle memba blong mifala oli glad taem oli mekem ol joes we i stret blong kasem gol blong mifala. Mifala i faenem se ol yangfala pikinini blong mitufala i wantem blong stap pat long jeneral konfrens. Mi ting se from mifala i bin tokbaot oltaem mo oltaem truaot long wik bifo konfrens, from wanem konfrens i impoten.

Mi mi hapi blong talemaot se blong kipim program blong mifala i simpol long ol dei bifo mo long taem blong jeneral konfrens i bin jenisim fulwan eksperiens blong famle blong mifala. Ol hat mo maen blong mifala i bin rere blong konfrens. Taem blong mifala i no bin fulap wetem ekstra aktiviti, mekem se mifala i save filim Spirit taem mifala i bin sidaon mo lisin long ol toktok blong kaonsel we i kam long ol lida.

Mifala i bin stanap long gol ia nomo long konfrens ia i go long nekis konfrens from i fulumap hom blong mifala wetem pis. Nomata we sam long ol pikinini blong mitufala i nomo stap wetem mifala long hom, mitufala i leftemap tingting blong olgeta blong gohed blong kliarem kalenda blong olgeta sam dei bifo mo long taem blong jeneral konfrens, olsem we mifala i stap mekem long hom. Mifala i traem tu blong putum wan taem blong lukluk wan sesen blong konfrens tugeta olsem ful famle. Mi stap hop se taem ol pikinini blong mitufala i mared mo gat ol pikinini, bae oli gohed blong mekem samting ia wan impoten samting blong protektem eksperiens ia taem oli kliarem ol kalenda blong olgeta.