Wan Waes Laef I Mekem Yumi Rere From Fiuja

Ol Lata dei Sent oli biliv long fasin blong stap rere mo fasin blong stap dipen long yuwan. Yumi biliv blong rere long saed blong edukesen from wok, blong rere long saed blong mane from wan dei we bae i ren, mo blong rere long saed blong ol samting blong wol from ol disasta o ol narafala jalenj. Moa impoten, yumi biliv blong rere long saed blong spirit from Seken Kaming blong Jisas Kraes mo blong go stap bakegen wetem Papa blong yumi we i stap long Heven. Fasin ia blong stap rere, oli singaotem Waes Laef (Providen Living).

Blong laef long wan fasin we i waes, i soem tru se yumi, yumi no save finis: yumi “fri blong jus blong [yumiwan] bakegen mo i no save gat eni samting we i afektem [yumi]” (2 Nifae 2:26). Lod i wantem yumi blong stap responsibol mo indipenden (luk long D&C 78:14). Hem i wantem yumi blong laef long wan waes wei from i soem huia nao yumi taem yumi folem wei ia: yumi responsibol, gat big hat, kam adalt, stap kaen. From moa yumi dipen long yumiwan, bae yumi save helpem gud moa ol famle blong yumi mo ol narafala man. Olsem wanem bae yumi save fidim olgeta we oli hanggri sapos yumi tu yumi hanggri? Olsem wanem yumi save serem save blong yumi sapos yumiwan i nogat inaf save? Olsem wanem yumi save bildim fet blong ol narafala man sapos yumiwan, yumi nogat fet?

Insaed long ol prinsipol blong waes laef, i gat ol samting ia:

Fasin blong stap rere. Lod i talem blong rere from wanem we i stap kam, from Lod kolosap i stap kam (luk long D&C 1:12).
Fasin blong wok. Lod i talem blong no mas stap les (luk long D&C 42:42).
Lukaotem fasin blong lanem samting, tru long stadi, mo tu, tru long fet (luk long D&C 88:118).

Taem ol memba blong Jos oli mekem evri samting we oli save mekem blong olgetawan be oli no save mitim evri smol nid blong olgeta, oli go fastaem long ol famle blong olgeta blong kasem help. Sapos hemia i no inaf, Jos i save help. Ol bisop mo branj presiden oli save yusum ol risos long “stoa haos blong Lod” blong helpem ol memba (luk long D&C 82:18–19). Sapot we Jos i givim i blong helpem ol memba blong helpem olgetawan mo leftemap tingting blong wok long laef blong olgeta.

Yumi save wok blong kam blong dipen long yumiwan long ol eria we oli stap ia:

Paoa long saed blong spirit: Trastem Lod: obei ol komanmen; prea mo stadi long ol skripja evri dei; givim seves long ol narafala man.
Stap helti long saed blong bodi: Obei long Tok blong Waes; eksesaes; gat inaf slip; praktisim ol fasin blong kipim ples mo bodi blong yu i klin.
Edukesen: Kam blong save rid; kasem save long saed blong wok; stadi long ol gudgudfala buk (luk long D&C 88:118).
Kasem Wok: Wok blong save lukluk long ol nid blong yuwan mo hemia blong famle blong yu.
Hom storej: Storem klin wota blong drink mo stat putum smolsmol wan saplae blong kaekae we yu kakae oltaem mo storem ol kaekae we oli save stap longtaem, olsem ol sid mo ol bin.
Faenens: Pem taeting mo fast ofring; stopem kaon; stat sloslo blong bildim wan seving long saed blong faenens.