Ol Ansa blong Sandei Skul

Mi gat kaen fasin ia blong stap lukaotem ol bigfala ansa long ol jalenj blong mi—blong askem Lod blong helpem mi faenem wan samting we bae i fiksim evri samting. Mi bin lanem se wei olsem ia i save mekem ol samting i kam moa had.

Taem mi bin stap tijim Gospel Doktrin klas long wod blong mi, mi bin kam long tingting ia blong askem ol kwestin we i hevi we i nidim blong lukluk long hem moa, mo kasem ansa we i bigwan, i niu, mo i givim niu tingting. Long nara toktok, mi no wantem sem olfala ansa blong “Ol Ansa blong Sandei Skul” we ol wod memba oli stap ripripitim evri wik.

Taem mi stap ridim gud NiuTestamen blong rere, mi fas long toktok ia we oli yusum abide, long Inglis, we i kamaot bakegen mo bakegen. Eksampol, Jon 15:10 i stap talem, “Sipos yufala i stap obei long ol tok blong mi, bambae mi mi lavem yufala olwe, stret olsem we mi mi stap obei long ol tok blong papa blong mi, nao oltaem hem i stap lavem mi. (oli ademap italik)

Long taem blong impoten Prea blong Hem long Bihaf blong Man long Getsemani, Sevya i prea se ol disaepol blong Hem “oli save stap wan nomo. Papa laef blong yu i joen gud long laef blong mi, mo laef blong mi i joen gud long laef blong yu. Mo long sem fasin, mi mi prea blong laef blong olgeta ya i save joen gud long laef blong yumitufala, blong oli stap wan nomo …” mo “Laef blong mi i joen gud long laef blong olgeta, mo laef blong yu i joen gud long laef blong mi. … blong olgeta i save kam wan nomo long evri samting …” Jon 17:21, 23

Wanem we mi bin stap lukaotem moa i bin olsem wanem nao blong stap wan wetem Lod, olsem wanem mi save gat oltaem lav blong Hem, mo olsem wanem, blong gat wan ansa, mi save traem blong gat moa fasin blong save wet longtaem—fasin blong save wet longtaem hem i wanem we mi nidim tumas blong tanem ol eksperiens blong mi long ol samting we i mekem mi taed i go long ol samting we i fit mo i mekem mi tabu.

Wanem we mi no save, taem mi lukaotem tugeta blong andastanem toktok ia abide mo ansa long ol had jalenj ia we mi fesem evri dei, i bin lidim mi i gobak long stret Sandei Skul ansa we mi stap traem blong no luksave. Mi faenem ol ansa long ol jalenj blong mi taem mi ridim ol skripja, prea evri dei, givim seves long famle blong mi mo ol narafala man, mo go long tempol mo ol miting blong mi long Sandei. Mi bin laenem se ol simpol samting ia i mekem jenis bitwin fasin blong stap strong, mo fasin blong rili stap strong kasem en mo wetem fasin blong save wet longtaem.

Ol Ansa blong Sandei Skul oli ol bes ansa wantaem.