Stap Waes mo Stap Wan Fren
Lanem mo kasem save mo waes tingting taem yu yangfala. Mo leftemap mo mekem olgeta we oli stap raonabaot long yu oli kam strong moa.
Sapos yu tru evriwan se yu wantem gat wan gudfala laef, bae yu wantem blong folem kaonsel we i stap long ol skripja: “Lanem waes tingting long yangfala laef blong yu; yes, lanem long yangfala laef blong yu blong holem ol komanmen blong God” (Alma 37:35). Rod blong lanem samting, yumi save tokbaot sot olsem ia:
Yumi evriwan i stat wetem stamba waes tingting. Yumi ademap save long hemia, wetem ol samting we yumi stap lanem insaed long klasrum mo taem yumi ridim buk. Yumi ademap ol eksperiens blong laef. Mo afta, yumi kasem nambafo step: waes tingting. Ples ia nao wol i stap long hem. Be yumi gat samting we wol i no gat. Taem yumi kasem baptaes mo konfemesen, yumi bin kasem presen we i Tabu Spirit. Folem hamas yumi stap fetful long ol loa, ol odinens, mo ol kavenan we yumi bin tekem long yumiwan long taem blong baptaes blong yumi, se bae yumi oltaem mekem ol komitmen blong sakramen, mo ol mekem ol kavenan blong prishud mo tempol, sapos yumi fetful long olgeta samting ia, nao bae oltaem yumi gat presen we i Tabu Spirit blong tijim mo lidim yumi. Spirit i stap lidim yumi blong tekem aksen mo mekem samting. Yumi evriwan i gat ol presen mo ol talen long saed blong spirit (luk long D&C 46).
Waes tingting, plasem ol presen long saed blong spirit, i mekem se hat blong yumi i haremsave samting. “Waestok ya, hem i nambawan samting blong yu yu kasem. I nomata wanem samting we yu yu gat, be yu mas kasem fasin ya blong luksave mining blong ol samting we i had.” Ol Proveb 4:7). Hem i impoten tumas blong kasem moa waes tingting mo haremsave samting long taem we yu yangfala.
I gat wan eksperiens blong yangfala laef blong mi, we i bin tijim wan samting long mi abaot waes tingting. Mi bin wan boe blong taon, mekem se papa blong mi i bin sendem mi blong mi go wok long fam blong angkel blong mi long Wes Yuta. Taem mi bin stap longwe, mi no save andastanem from wanem ol buluk mo nara animol, wetem fulap open graon we oli save jusum blong go stap long hem, bae oli wantem putum hed blong olgeta i fas long babwaea mo stikimaot hed blong olgeta tru long hem blong kakae gras long narasaed blong fanis. Traem tingting. Hamas long yumi i bin olsem ia? Oltaem bae yumi mas pusum hed blong luk wanem nao i stap long narasaed blong fanis, mo yumi mekem hemia speseli taem yumi yangfala. Yumi olsem ol man—man blong wol ia—yumi stap gat fasin blong stap pusum hed i go tru long babwaea. From wanem oli mekem samting ia?
Yumi save gat fulap glad long laef, mo no nid blong pusum hed i go aotsaed. Tingbaot, “Waestok ya, i nambawan samting blong yu kasem,” mo wetem waestok ya, “Bambae yu no mas folem rod ya, we ol man nogud oli stap folem, mo yu no mas tekem fasin blong olgeta. Yu no folem rod ya! Yu gowe long ol samting nogud ya! Yu livim! Yu go long rod blong yu nomo!” (Ol Proveb 4:14–15). Yu no kam kolosap long nogud rod ia. Yu no pusum hed blong yu i gotru long babwaea fanis ia.
Yu Yu Gat Ol Gudfala Fren?
Bae yu luksave se, wetem ol tijing ia long saed blong waes tingting, buk blong Ol Proveb i tijim yu long saed blong fasin blong stap jusum ol gudfala fren: “Yu no mas folem rod ya, we ol man nogud oli stap folem, mo yu no mas tekem fasin blong olgeta” (Ol Proveb 4:14). “Pikinini blong mi, yu no mas go wetem ol man olsem. Yu mas stap longwe long olgeta. Fasin blong ol man olsem, oltaem oli kwik blong mekem ol samting nogud, oli no save wet. Oli rere oltaem nomo blong kilim man i ded” (Ol Proveb 1: 15–16).
Ol pikja oli kam long Kit Larson
Olsem wanem nao bae yu save sapos yu gat ol gudfala fren? Bae mi givim tufala tes long yu. Sapos yu yusum ol tes ia, bae yu neva save wokbaot i go long ol defren kaen rod mo kamaot long “stret mo smol rod we i lid i go long laef we i no save finis” (2 Nifae 31:18).
-
Ol gudfala fren oli mekem samting i isi blong stap laef folem ol komanmen taem yu stap wetem olgeta. Wan tru fren i wan we i stap mekem yu kam strong moa mo i stap helpem yu blong laef folem ol prinsipol blong gospel we bae i helpem yu blong stap strong kasem en.
-
Wan tru fren, i wan we bae i no mekem yu jusum bitwin ol rod blong hem mo ol rod blong Lod, mekem se hem i stap tekemaot yu long stret mo smol rod. Enemi i stap ronron olbaot long wol ia mo i wantem tumas blong gat wan long yumi i foldaon. Sapos ol fren blong yu oli stap tekem yu i go long ol rod blong nogud fasin, livim olgeta naoia. Jusum ol fren blong yu wetem waes tingting.
Yu Yu Wanem Kaen Fren?
Naoia, mi askem wan had kwestin: Yu yu wanem kaen fren?
Long laef, i gat moa samting blong mekem bitim blong sevem laef blong yumiwan. Yumi gat wok ia blong leftemap mo mekem evriwan raon long yumi oli kam strong moa. Lod i wantem yumi evriwan i gobak tugeta, long Hem.
Yu yu wan laethaos, mo i no gat wan samting moa we i wan bigfala denja, be wan laethaos we i foldaon. Tingbaot huia yu: yu yu wan laet long wol, long ol fren blong yu, long ol brata mo sista blong yu. Yu ia nao, bae oli lukluk i go long hem.
Ol Proveb 4 i gohed i talem se:
“Rod we ol stret man oli stap wokbaot long hem, fasin blong hem i olsem eli moning, we i stat brok delaet, we oltaem, ol samting we oli stap kam klia moa, gogo i delaet gud, mo san i kam antap.
“Be rod blong ol man nogud i tudak olgeta, i olsem naet. Oltaem olgeta oli stap foldaon, be oli no save luksave ol samting we oli stambol long hem” (ol ves 18–19).
Oli no save stret from wanem oli stap mestem rod. Oli no gat laet, oli no gat daereksen.
Yu yu save se i olsem wanem blong dipen long wan laethaos taem laet blong hem i no laet? Tudak i kamaot, mo yumi lus.
Taem wan paelot i lusum lektrik paoa, hem i no gat masin blong talem rod blong hem, be hem i gat ol samting ia nomo we oli no wok wetem lektrik. Hem i filim se hem i no save mekem tumas samting taem hem i sidaon insaed long plen blong faet we i gat wan jea nomo, mo hem i stap flae long 12,200 mita antap long skae, mo klaod mo narafala samting oli raonem hem. Hem i no luk rod blong hem. Mi bin kasem wan kaen ekperiens olsem, mo mi glad se mi stap long ples ia naoia. Hem i wan eksperiens we bae mi neva fogetem. Yu tu, bae samtaem yu faenem se yu stap long wan situesen olsem. I no gat wan samting we i moa denja bitim wan laethaos we i foldaon, speseli taem yu stap dipen long laet ia.
I gat wan we i stap dipen long laet blong yu blong i saenem rod blong hem? Stap wan gud eksampol. Stap wan laet long wol mo lidim mo gaedem olgeta we oli stap raonabaot long yu long ol rod blong stret mo gud fasin. Oli stap dipen long yu olsem wan fetful laethaos. Yu mas stap taem oli nidim yu.
Spirit i laet ia we i lidim man, we i tekem glad mo hapines i kam. Mi prea se bae Lod i neva stopem Spirit blong stap wetem yumi from fasin blong yumi i no stret. O, mi prea se bae yumi neva stap yumiwan mo harem nogud long wol ia we “tudak mo [i gat harem nogud]” long hem (1 Nifae 8:4).
Bae ol blesing blong Lod oli stap wetem yufala taem we yufala i stap traehad blong lanem mo kasem save mo waes tingting long yangfala laef blong yufala. Mo tu, bae yufala i kasem waes tingting mo stap haremsave long hat blong yufala long saed blong ol trutok blong gospel tru long fasin blong stap obei, mo tu, tru long laet blong Spirit, we i Tabu Spirit. Stap wan gudfala fren. Leftemap mo mekem olgeta we oli stap raonabaot long yufala oli kam strong moa. Mekem wol i kam wan ples we i gud moa from se yu bin stap ia. Helpem ol fren blong yufala blong stap long stret mo smol rod, stap strong kasem en, mo gobak wetem ona.
Stap wan gud eksampol. Stap wan laet long wol mo lidim mo gaedem olgeta we oli stap raonabaot long yu long ol rod blong stret mo gud fasin. Oli stap dipen long yu olsem wan fetful laethaos.