Stap Dresap blong Go long Wan Danis

Taem mi bin yangfala, samtaem i bin had blong laef folem gospel. Eria we mi bin stap long hem, i no gat tumas memba blong Jos long hem, mo ol fren blong mi, we oli no memba blong Jos, samtaem oli mekem i had blong mi stap long stret rod.

“I gud blong yu werem hemia; bae i mekem kala blong ae blong yu i kamaot gud,” wan long ol fren blong mi i bin talem bifo long wan danis. Hem i holem wan dres blong hem i go antap, blong mi save yusum blong sot taem, be dres ia i no gat han long hem. Mi bin disaed blong werem dres ia wetem wan jaket.

Taem mi go kasem danis, i no gat wan i werem wan dres wetem han, mo mi bin filim se mi mi defren long ol narawan. Taem mi stat blong harem ples i hot, ol fren blong mi oli talem long mi blong mi tekemaot jaket ia, mo tu, bae mi luk moa naes.

Mi stap rere blong faenem risen blong tekemaot jaket blong mi, be mi tingbaot petriakel blesing blong mi. Blesing blong mi i bin talem long mi se bae mi gat fulap temtesen, mo sapos mi foldaon, bae plante pipol bae oli folem mi. Long taem ia nao mi bin luksave se mi nidim blong stap long stret rod—i no blong miwan nomo, be tu blong ol narafalawan we oli stap lukluk long mi. Mi bin disaed blong kipim jaket i stap long mi.

Samtaem, oli bin stap jikim mi from mi no stap mekem ol samting we ol narafalawan oli bin stap mekem, be mi bin stanap strong, mo mi bin kasem blesing from. Afta, mi bin lanem se plante pipol i bin stap lukluk long mi. Sam long ol fren blong mi oli talem tu long mi se oli bin stap respektem mi from we mi stap folem ol standet blong mi. Oli bin talem sore from se oli bin stap givim hadtaem long mi from se mi no bin stap mekem ol samting we ol narafalawan oli bin stap mekem long hae skul.

From se mi bin folem ol standet blong Jos, mo mi bin traem blong stap wan eksampol, mi bin save gat ol misinari eksperiens mo tijim gospel long ol narafalawan. Bae mi neva save gat paoa ova long ol narawan sapos mi no bin stap long stret rod.