“Hem i minim wanem blong givim ona long prishud blong God?”

Sapos yumi save stat blong andastanem olsem wanem i gud tumas we God i bin givim yumi presen ia, nao, blong stap givim ona long prishud i kam wan simpol samting: mekem samting wetem fasin blong talem tangkyu mo fasin blong gat respek long paoa we oli givim yu wetem tras. Askem yuwan: Sapos evriwan raon long mi oli save se mi bin holem paoa blong God, bae oli tingting hae o oli tingting daon long Hem? Hemia nao wanem hem i blong givim ona long prishud—hem i blong luksave se yu yu wan riprisentativ blong God, mo yu stap mekem evri samting blong mekem samting long wan wei we i soem respek long tras we Hem i gat long yu.

Olsem wan yang woman, bae mi save talem se mi no nidim blong givim ona long prishud. Be evri yang woman oli nidim blong mekem. Yumi givim ona taem yumi gat klin fasin. Yumi givim ona long prishud taem yumi helpem ol yang man blong oli gat ol klin tingting. Yumi dresap gud mo yumi toktok wetem ol klin toktok. Taem yumi mekem olsem, yumi helpem ol yang man blong givim ona long prishud, mekem se yumi tu, yumi stap givim ona long prishud.

Long tingting blong mi, stamba wei blong givim ona long prishud i blong mekem ol samting we Lod Hemwan, bae i mekem sapos Hem i bin stap ia long wol, from se yumi ripresentem Jisas Kraes. Hem i minim se yumi stap mekem ol komitmen, ol diuti mo ol promes we yumi bin mekem long God taem we oli bin odenem yumi long prishud. Taem yumi stap givim ona long prishud, yumi folem oda blong Hem, blong girap mo saenaot blong mekem se laet blong yumi bae i stap olsem wan flag long ol nesen (luk long D&C 115:5). Yumi stap helpem ol narafala man blong save se i gat ol wokman blong God we oli gat atoriti we oli stap long wol.

Mi ting se blong givim ona long prishud, i blong gat respek mo tras blong yusum prishud. Taem yu gat ol memba blong Aronik Prishud we oli respektem prishud mo sakramen olsem olgeta ia we oli stap long wod blong mifala, nao bae yu save gat ol bigfala eksperiens blong pasem mo mekem rere long sakramen. Mifala evriwan i werem ol waet sot wetem ol nektae. Mifala i save se hemia i mekem bigfala samting insaed long wod blong mifala, mo hemia i bin mekem wan samting long mi. Mi save se blong gat prishud i samting we i moa gud we i bin hapen long mi.

Blong givim ona long prishud i minim blong no putum yuwan long ol situesen we yu save se bae yu save lusum ol standet blong yu. Taem mifala i bin stadi long Ol Testeman long seminari, mifala i bin faenem, long Jenesis 39, eksampol blong Josef blong Ijip we i bin stap givim ona long prishud blong hem taem hem i bin ronwe long ol nogud samting we waef blong Potifa i bin stap askem long hem.

Wan wei we ol yang woman oli save helpem mifala blong givim ona long prishud i blong folem ol standet we oli stap long buk ia, Blong Ol Yut Oli Kam Strong, mo blong oli dresap long gud fasin.

Blong stap givim ona long prishud, long mi, hem i minim se ol yang man oli respektem mo oli difendem presen ia we Lod i bin givim long olgeta. Taem mi luk wan yang man we i gat respek long prishud, mi filim se mi stap long pis, mo mi gat moa respek long yang man ia. Papa long Heven i bin gat tras blong givim prishud long hem, mekem se mi filim se hem i diuti blong wan yang man, i no blong gat prishud nomo, be tu, blong hem i difendem.

Prishud, hem i wan tru paoa ia nomo blong God we i stap long wol, mo i soem yumi rod blong gobak long Hem. Taem yumi tingting blong stap givim ona long prishud, yumi tingting blong stap folem ol tijing we oli kam long Presiden Tomas S. Monson mo ol narafala Aposol.