Te mau uiraa & te mau pahonoraa
« Eaha te auraa o te parau ra ia faatura i te autahu‘araa o te Atua ? »
Te autahu‘araa, o te mana ïa ta te Metua i te Ao ra e Iesu Mesia e faaohipa nei no te rave i Ta raua ohipa. Oia te mana rahi roa a‘e i ni‘a i te fenua nei. Na roto i te autahu‘araa, te ravehia nei te mau oro‘a, te horo‘ahia nei te mau haamaitairaa, te ravehia nei te ohipa hiero, te porohia nei te evanelia e te faatupuhia nei te mau semeio.
Te ti‘a nei te feia e mau nei i te autahu‘araa no te Faaora, no reira te faatura nei ratou i te autahu‘araa na roto i te raveraa i te mea ta te Faaora e rave ahani o Oia teie i ô nei. Te faatura nei ratou i te autahu‘araa na roto i te ora-ti‘amâ-raa no te reira. Te faatura nei ratou i te autahu‘araa na roto i to ratou huru ahu, ta ratou mau raveraa, ta ratou mau parau, ta ratou taviniraa e to ratou atoa ho‘i mau mana‘o.
E nehenehe atoa ta te feia apî tamahine e faatura i te autahu‘araa na roto i te tape‘araa i ta ratou mau fafauraa no te bapetizoraa e na roto atoa i te haereraa e te feruri-hohonu-raa i te mau oro‘a no te autahu‘araa mai te oro‘a mo‘a e te ohipa hiero. E nehenehe ta ratou e faaitoito i to ratou metua tane, to ratou mau taea‘e e te tahi atu na feia e mau nei i te autahu‘araa na roto i te haapa‘oraa i te mau faaueraa e na roto i te ora-ti‘amâ-raa no te rave i ta ratou mau hopoi‘a o te autahu‘araa.
E nehenehe ta tatou paatoa e faatura i te autahu‘araa na roto i te tavini-maitai-raa i roto i ta tatou mau piiraa, na roto i te faaturaraa ia ratou e mau nei i te autahu‘araa, na roto i te faaturaraa i te ohipa e ravehia ra e na roto atoa i te faaturaraa i te mau oro‘a e te mau fafauraa o ta tatou e farii nei na roto i te reira.
A ohipa ei ti‘a na te Atua
Ahani e ua nehenehe ia tatou ia maramarama i te faahiahia i te mea e, ua pûpû mai te Atua i teie horo‘a ia tatou nei, i reira e ohie mai no tatou te faaturaraa i te autahu‘araa : e ohipa tatou ma te mauruuru e e faatura tatou i te mana i tuuhia mai. A ui ia oe iho, ahani e, ua ite te mau taata e faaati nei ia’u e, te mau nei au i te mana o te Atua, eaha ta ratou e mana‘o no ni‘a i te Atua ? Tera te faaturaraa i te autahu‘araa—o te iteraa ïa e, e ti‘a outou na te Atua e o te haaraa ïa ia au i to outou faito maitai roa a‘e no te faaite i te faatura no te tiaturiraa Ta’na i tuu i ni‘a ia outou.
Mason R., 19 matahiti, Colorado, te mau Hau Amui no Marite
Ei oraraa mâ to oe
Ei taure‘are‘a tamahine, ua mana‘o vau e, aita e faufaa ia faatura vau i te autahu‘araa. Tera râ, e mea titauhia i te feia apî tamahine atoa ia na reira. Te faatura nei tatou i te autahu‘araa na roto i te oraraa i te oraraa mâ. Te faatura nei tatou i te autahu‘araa na roto i te tautururaa i te feia apî tamaroa ia tape‘a mâ noa i to ratou mau mana‘o. E oomo tatou i te ahu tano e e paraparau tatou i te mau parau mâ. Na roto i te raveraa i te reira, te tauturu nei tatou i te feia apî tamaroa ia faatura i te autahu‘araa, no reira, te faatura atoa nei ïa tatou i te autahu‘araa.
Marisa B., 14 matahiti, Arizona, te mau Hau Amui no Marite
A rave i ta oe hopoi‘a i te Atua
Te rave‘a matamua roa no te faatura i te autahu‘araa, oia ho‘i ïa, i to’u iho nei mana‘o, te raveraa ïa i te mau mea ta te Fatu Iho e rave ahani tei ô nei Oia i ni‘a i te fenua nei, no te mea ho‘i e, te ti‘a nei tatou no Iesu Mesia. Te auraa ra, e rave faaoti tatou i te mau faaotiraa atoa, te mau hopoi‘a e te mau fafauraa ta tatou i rave i mua i te Atua i te taime a faatoro‘ahia ai tatou i te autahu‘araa. Na roto i te faaturaraa i Ta’na autahu‘araa, te pee nei tatou i Ta’na faaueraa ia « ti‘a mai na i ni‘a e ia anaana mai na, ia riro to [tatou] maramarama ei hi‘oraa no te mau nunaa » (PH&PF 115:5). Te tauturu nei tatou i te tahi mau taata ia ite e, te vai nei e rave rahi tavini mana a te Atua i ni‘a i te fenua nei.
Bismarck B., 18 matahiti, Santo Domingo, République Dominicaine
A faaite i te faatura no te autahu‘araa
I to’u nei mana‘o, te faaturaraa i te autahu‘araa, o te faarahiraa ïa i te faatura e te tiaturi i roto i te faaohiparaa i te autahu‘araa. Ia itehia ana‘e te mau melo no te Autahu‘araa a Aarona o te faatura nei i te autahu‘araa e te oro‘a mo‘a mai tei itehia nei i roto i ta matou nei paroisa, ei reira oe e faahiahia ai i te taime opereraa e te taime faaineineraa i te oro‘a. E ahu uouo e te taamu arapo‘a to matou pauroa. Ua ite roa matou e, e hi‘oraa maitai to te reira i ni‘a i te paroisa e i ni‘a ihoa râ ia’u nei. Ta‘u i ite, te mauraa i te autahu‘araa, o te ohipa maitai roa a‘e ïa tei tupu no’u nei.
Hansen B., 15 matahiti, Texas, te mau Hau Amui no Marite
Eiaha e haafifi i ta outou mau faatureraa
Te faaturaraa i te autahu‘araa, oia ïa, eiaha e tuu ia oe iho i roto i te mau ohipa e ite oe e, e fifi ta oe mau faatureraa. I to matou tuatapaparaa i te Faufaa Tahito i te haapiiraa evanelia, ua ite mai matou i roto i te Genese 39 i te hi‘oraa no Iosepha i Aiphiti tei faatura i ta’na autahu‘araa na roto i to’na aperaa i te mau faahinaaroraa a te vahine a Potiphara.
Te hoê rave‘a no te feia apî tamahine ia tauturu ia matou ia faatura i te autahu‘araa, o te peeraa ïa i te mau faatureraa i roto i te buka No te Puai o te Feia Apî no ni‘a i te ahu tano.
Joseph B., 16 matahiti, Texas, te mau Hau Amui no Marite
Paturu i te autahu‘araa
No‘u nei, te faaturaraa i te autahu‘araa, o te faaturaraa ïa e te patururaa te feia apî tamaroa i te horo‘a ta te Fatu i horo‘a ia ratou. Ia ite ana‘e au i te hoê tamaroa ia faatura i te autahu‘araa, e ite au i te hau rahi e e rahi atu to’u faatura i te reira tamaroa. Ua tuu te Metua i te Ao ra i te autahu‘araa i ni‘a ia’na, no reira, te mana‘o nei au e, e hopoi‘a na te hoê tamaroa eiaha noa ia mau i te autahu‘araa, ia paturu atoa râ i te reira.
Melinda B., 16 matahiti, Washington, te mau Hau Amui no Marite
Haamana‘o i te Faaora
Te autahu‘araa, oia ana‘e ïa te mana mau o te Atua i ni‘a i te fenua nei e te faaite mai nei te reira ia tatou i te e‘a no te ho‘i Ia’na ra. Ia feruri ana‘e tatou i te faaturaraa i te autahu‘araa, e haamana‘o tatou ia pee i te mau haapiiraa a te peresideni Thomas S. Monson e a te tahi atoa mau aposetolo. Te rave‘a maitai roa a‘e no te faatura i te autahu‘araa, o te raveraa ïa i te mau mea tei haapiihia mai ia tatou, o te faahaamana‘o nei ia tatou i te Faaora. Ia haamana‘o ana‘e tatou Ia’na, e parahi mai To’na Varua i rotopu ia tatou. Mai te mea e, tei rotopu te Varua ia tatou, na te reira e faati‘a ia tatou ia tape‘a noa i te avei‘a e ia riro mai ei hi‘oraa no te mau faatureraa o te evanelia.
Piha haapiiraa sabati : Kylie E., Jaiten B., Joseph E., Alexandra R., Kaylie V., Alisha F., e Haylee W. (aita e hoho‘a) ; Idaho, te mau Hau Amui no Marite