សារលិខិតគណៈប្រធានទីមួយ
ពរជ័យនៃការគោរពប្រតិបត្តិ
ដោយ ប្រធាន ថូម៉ាស អេស ម៉នសុន
រចនារូបភាពដោយ ជីម មេដសិន
ប្រធាន ថូម៉ាស អេស ម៉នសុន បានបង្រៀនថា « មេរៀនដ៏អស្ចារ្យបំផុតដែលយើង អាចរៀនក្នុងជីវិតរមែងស្លាប់នេះគឺថា នៅពេលព្រះមានបន្ទូល ហើយយើងគោរពតាម នោះយើងនឹងធ្វើរឿងដ៏ត្រឹមត្រូវជានិច្ច » ។១
យើងនឹងត្រូវបានប្រទានពរ ។ ដូចប្រធាន ម៉នសុន បានមានប្រសាសន៍អំឡុងពេលសន្និសីទទូទៅថ្មីៗនេះ ៖ « នៅពេលយើងរក្សាបទបញ្ញត្តិ នោះជីវិតយើងនឹងកាន់តែរីករាយ កាន់តែពេញលេញ ហើយមិនសូវស្មុគស្មាញ ។ យើងនឹងមានភាពងាយស្រួលក្នុងការទ្រាំទ្របញ្ហា និង ឧបសគ្គរបស់យើង ហើយយើងនឹងទទួលបានពរជ័យ [ របស់ព្រះ ] ដែលបានសន្យា » ។២
នៅក្នុងការដកស្រង់ដូចតទៅនេះមកពីការបង្រៀនរបស់ប្រធាន ម៉នសុន ដែលជាប្រធានសាសនាចក្រ លោករំឭកដល់យើងថា ព្រះបញ្ញត្តិពិតជានាំទៅរកសុភមង្គល និង ភាពសុខសាន្ត ។
សេចក្ដីណែនាំសម្រាប់ដំណើរការនោះ
« បទបញ្ញត្តិរបស់ព្រះពុំបានប្រទានមក ដើម្បីធ្វើឲ្យយើងស្មុគស្មាញ ឬ ក្លាយជាឧបសគ្គចំពោះសុភមង្គលរបស់យើងនោះទេ ។ ការពិតគឺវាផ្ទុយពីនោះវិញ ។ ទ្រង់ដែលបង្កើតយើងមក ហើយស្រឡាញ់យើងដ៏ឥតខ្ចោះ បានត្រាស់ដឹងថា យើងចាំបាច់ត្រូវរស់នៅក្នុងជីវិតរបស់យើងយ៉ាងណា ដើម្បីទទួលបានសុភមង្គលដ៏ធំបំផុតនោះ ។ ទ្រង់បានប្រទានដល់យើងនូវការដឹកនាំ ប្រសិនបើយើងធ្វើតាម នោះទ្រង់នឹងដឹកនាំយើងដោយសុវត្ថិភាពឆ្លងកាត់ដំណើរជីវិតរមែងស្លាប់ដ៏គ្រោះថ្នាក់នេះ ។ យើងចងចាំទំនុកបទនៃទំនុកតម្កើងមួយ ៖ ‹ ចូររក្សាបញ្ញត្តិ ! នាំឲ្យមានសុវត្ថិភាព និង ក្ដីសុខសាន្ត › [ សូមមើល « Keep the Commandments » ទំនុកតម្កើង លេខ ៣០៣ ] » ។៣
កម្លាំង និង ចំណេះដឹង
« ការគោរពប្រតិបត្តិគឺជាចរិតលក្ខណៈទូទៅរបស់ពួកព្យាការី វាផ្ដល់ជាកម្លាំង និង ចំណេះដឹងដល់ពួកលោកគ្រប់ជំនាន់ក្នុងប្រវត្តិសាស្ត្រ ។ វាសំខាន់ចំពោះយើង ដើម្បីដឹងថា យើងក៏ត្រូវបានផ្តល់សិទ្ធិឲ្យទទួលបានប្រភពនៃកម្លាំង និង ចំណេះដឹងនេះផងដែរ ។ វាមានរួចជាស្រេចសម្រាប់យើងម្នាក់ៗនាពេលបច្ចុប្បន្ននេះ នៅពេលយើងគោរពតាមបទបញ្ញត្តិរបស់ព្រះ ។ …
ចំណេះដឹងដែលយើងស្វែងរក ចម្លើយដែលយើងចង់បាន និងកម្លាំងដែលយើងប្រាថ្នានាសព្វថ្ងៃនេះ ដើម្បីទប់ទល់នឹងឧបសគ្គនៃពិភពលោកដ៏ស្មុគស្មាញ និង ចេះតែផ្លាស់ប្ដូរនេះ អាចជារបស់ផងយើង នៅពេលដែលយើងស្ម័គ្រគោរពតាមបទបញ្ញត្តិរបស់ព្រះអម្ចាស់ » ។៤
ជ្រើសរើសដើម្បីគោរពតាម
« បែបបទនៃសម័យកាលរបស់យើងគឺមានភាពអនុញ្ញាត ។ ទស្សនាវដ្តី និង កម្មវិធីសម្តែងក្នុងទូរទស្សន៍បង្ហាញពីឆុតឆាកតារាភាពយន្ត វីរបុរសនៃវិស័យអត្តពលកម្ម—ជាអ្នកដែលយុវវ័យជាច្រើនយកត្រាប់តាម—ដែលមិនខ្វល់ពីក្រឹត្យវិន័យរបស់ព្រះ ហើយបង្អួតពីការអនុវត្តដ៏ពោរពេញដោយអំពើបាប ដែលហាក់បីដូចជាគ្មានឥទ្ធិពលអាក្រក់អ្វីសោះ ។ តើអ្នកមិនជឿរឿងនោះទេឬអី ! មានគ្រាដែលនឹងទទួលផល—វាស្មើនឹងបញ្ជីដែលបានកត់ចេញចូល ។ មនុស្សគ្រប់រូបមានពេលវេលាកំណត់រៀងៗខ្លួន—ប្រសិនបើមិននៅក្នុងជីវិតនេះទេ ក៏នៅក្នុងជីវិតបន្ទាប់ដែរ ។ ថ្ងៃនៃការជំនុំជម្រះនឹងកើតឡើងចំពោះមនុស្សគ្រប់រូប ។ …ខ្ញុំសូមទទូចឲ្យអ្នកជ្រើសរើសគោរពតាម » ។៥
អំណរ និងភាពសុខសាន្ត
ពេលខ្លះអ្នកឃើញថា អស់អ្នកដែលនៅក្នុងលោកិយកំពុងមានភាពសប្បាយរីករាយជាងអ្នកទៅទៀត ។ បងប្អូនមួយចំនួនអាចមានអារម្មណ៍តានតឹងចំពោះបទដ្ឋាននៃឥរិយាបថដែលយើងមានក្នុងសាសនាចក្រនេះ ។ ប៉ុន្តែបងប្អូនប្រុសស្រីរបស់ខ្ញុំអើយ ខ្ញុំសូមប្រកាសប្រាប់អ្នកថា គ្មាន អ្វីដែលអាចនាំមកនូវអំណរក្នុងជីវិតយើង ឬ ភាពសុខសាន្តក្នុងព្រលឹងយើងជាងព្រះវិញ្ញាណ ដែលកើតមានចំពោះយើងពេលយើងធ្វើតាមព្រះអង្គសង្គ្រោះ និង គោរពព្រះបញ្ញត្តិនោះទេ » ។៦
ដើរដោយទៀងត្រង់
« ខ្ញុំថ្លែងទីបន្ទាល់ថា ពរជ័យដែលបានសន្យារបស់យើង គឺហួសពីការអាចវាស់វែងបាន ។ ទោះជាពពកខ្មៅប្រមូលផ្ដុំគ្នា ទោះជាភ្លៀងធ្លាក់មកលើយើងក្ដី ចំណេះដឹងរបស់យើងអំពីដំណឹងល្អ និង សេចក្តីស្រឡាញ់របស់យើងចំពោះព្រះវរបិតាសួគ៌ និង ព្រះអង្គសង្គ្រោះរបស់យើង នឹងលួងលោម និង គ្រាំទ្រយើង ហើយនាំអំណរមកកាន់ដួងចិត្តយើង នៅពេលយើងដើរដោយសុចរិត និងកាន់តាមបទបញ្ញត្តិនានា ។ គ្មានអ្វីនៅក្នុងពិភពលោកនេះ ដែលអាចរារាំងយើងបានឡើយ » ។៧
ដើរតាមព្រះអង្គសង្គ្រោះ
« តើទ្រង់ដែលមានសេចក្តីសោកសៅ និងមានទុក្ខព្រួយនេះជានរណា ? តើនរណាជាស្តេចនៃសិរីរុងរឿង ដែលជាព្រះអម្ចាស់នៃពួកពលបរិវារនេះ ? ទ្រង់ជាលោកចៅហ្វាយយើង ។ ទ្រង់គឺជាព្រះអង្គសង្រ្គោះយើង។ ទ្រង់គឺជាព្រះរាជបុត្រានៃព្រះ ។ ទ្រង់គឺជាអង្គនិពន្ធនៃសេចក្តីសង្រ្គោះយើង ។ ទ្រង់មានបន្ទូលថា ‹ ចូរមកឯខ្ញុំ › ។ ទ្រង់បានត្រាស់បង្គាប់ថា ‹ ទៅចុះ ចូរអ្នកប្រព្រឹត្តបែបយ៉ាងដូច្នោះដែរ › ។ ទ្រង់អង្វរថា ‹ ចូរកាន់តាមបញ្ញត្តិទាំងឡាយរបស់យើងចុះ › ។
ចូរយើងដើរតាមទ្រង់ ។ ចូរយើងត្រាប់តាមគំរូទ្រង់ ។ ចូរយើងគោរពតាមបន្ទូលទ្រង់ ។ តាមរយៈការធ្វើបែបនេះ នោះយើងថ្វាយអំណោយទាននៃការដឹងគុណដ៏ទេវភាពចំពោះទ្រង់ » ។៨