សំណួរ និង ចម្លើយ
« មនុស្សមួយចំនួនប្រាប់ខ្ញុំថា ខ្ញុំត្រូវការមានមិត្តភក្តិដែលគ្មានបទដ្ឋានដូចខ្ញុំដើម្បីពង្រឹងបទដ្ឋានខ្ញុំឡើង ។ តើការណ៍នេះពិតឬទេ ? »
ការពង្រឹងបទដ្ឋានរបស់អ្នកកើតមកពីការរៀនសូត្រ និង ការរស់នៅតាមដំណឹងល្អរបស់ព្រះយេស៊ូវគ្រីស្ទ ហើយមិត្តភក្តិអាចជួយ ឬ រារាំងអ្នកក្នុងការធ្វើវា ។ មិត្តភក្តិមានឥទ្ធិពលយ៉ាងខ្លាំងលើអ្នក—ទាំងរបៀបដែលអ្នកគិត និយាយ និង ទង្វើរបស់អ្នក ។ សៀវភៅ ដើម្បីកម្លាំងនៃយុវជន ផ្តល់អនុសាសន៍ថា « ចូរជ្រើសរើសមិត្តភក្តិណាដែលឲ្យតម្លៃដល់អ្នកដើម្បីអ្នកអាចពង្រឹង និង លើកទឹកចិត្តគ្នាទៅវិញទៅមកក្នុងការរស់នៅតាមបទដ្ឋានដ៏ខ្ពង់ខ្ពស់ » ( [ ឆ្នាំ ២០១១ ] ទំព័រ ១៦ ) ។ មិត្តភក្ដិបែបនេះជួយអ្នកឲ្យរស់នៅតាមដំណឹងល្អរបស់ព្រះយេស៊ូវគ្រីស្ទ រក្សាបទដ្ឋានរបស់អ្នក ហើយប្រែជាមនុស្សកាន់តែប្រសើរឡើង ។
ប៉ុន្តែមិនមែនមនុស្សទាំងអស់ដែលអ្នកទាក់ទង នឹងមានបទដ្ឋានស្រដៀងគ្នានឹងអ្នក ឬ ជាសមាជិកសាសនាចក្រឡើយ ។ វាសំខាន់ណាស់ដើម្បីមានភាពរស់រាយចំពោះមនុស្សគ្រប់គ្នា ហើយប្រព្រឹត្តដាក់ពួកគេតាមរបៀបដែលព្រះអង្គសង្គ្រោះនឹងប្រព្រឹត្តដាក់ពួកគេ—ដោយសេចក្តីស្រឡាញ់ និង ចិត្តសប្បុរស ។ នៅពេលអ្នកបន្តរស់នៅតាមបទដ្ឋានរបស់អ្នក នោះអ្នកអាច « ធ្វើជាគំរូដល់ពួកអ្នកជឿ ដោយពាក្យសម្ដីកិរិយាប្រព្រឹត្ត សេចក្ដីស្រឡាញ់ សេចក្ដីជំនឿ និងសេចក្ដីបរិសុទ្ធ » (ធីម៉ូថេទី ១ ៤:១២) ។ តាមរយៈគំរូរបស់អ្នក នោះពួកគេនឹងឃើញពីរបៀបដែលអ្នកបានទទួលពរ តាមការរស់នៅតាមបទដ្ឋានខ្ពង់ខ្ពស់ ហើយអ្នកអាចលើកទឹកចិត្តពួកគេឲ្យធ្វើដូចអ្នកដែរ ។
ចូរស្វែងរកការណែនាំពីព្រះវិញ្ញាណបរិសុទ្ធ—ហើយមានចិត្តក្លាហានដើម្បីធ្វើតាមការបំផុសគំនិតរបស់ទ្រង់—នៅពេលអ្នកជ្រើសរើសមិត្តភក្តិ ហើយព្យាយាមពង្រឹងបទដ្ឋានរបស់អ្នក ។
មិត្តភក្តិពិតប្រាកដ
កាលឆ្នាំទីមួយរបស់ខ្ញុំនៅអនុវិទ្យាល័យ ខ្ញុំមានការភ័យខ្លាចថា ខ្ញុំមិនអាចរកមិត្តភក្តិដែលគោរពបទដ្ឋានរបស់ខ្ញុំឡើយ ។ បន្ទាប់ពីមួយរយៈពេលខ្លីក្រោយមក ខ្ញុំក្លាយជាមិត្តភក្តិល្អជាមួយមិត្តរួមថ្នាក់ម្នាក់របស់ខ្ញុំ ហើយខ្ញុំបានប្រាប់គាត់ថាខ្ញុំជាពួកមរមន ។ គាត់បានសួរខ្ញុំអំពីរឿងនោះ ហើយខ្ញុំបានឲ្យសៀវភៅ ដើម្បីកម្លាំងនៃយុវជន ទៅគាត់ ។ ចាប់តាំងពីថ្ងៃនោះមក គាត់ឈប់និយាយពាក្យជេរនៅចំពោះមុខខ្ញុំ ។ ប្រសិនបើមិត្តភក្តិរបស់អ្នកជាមិត្តពិតប្រាកដ នោះពួកគេនឹងគោរពដល់ការសម្រេចចិត្តរបស់អ្នក ហើយជួយអ្នកឲ្យរក្សាបទដ្ឋានរបស់ខ្លួន ។
ខេនដេឡា អិម អាយុ ១៣ ឆ្នាំ ប៊ូណូស អ៊ែរ៉េស ប្រទេសអាហ្សង់ទីន
ធ្វើតាមការទូន្មានរបស់ព្យាការី
ពេលខ្លះ វាមានការលំបាកដើម្បីតទល់នឹងការល្បួង ប្រសិនបើយើងដើរលេងជាមួយមិត្តភក្តិ ដែលជ្រើសរើសធ្វើអាក្រក់ ឬ ព្យាយាមឲ្យយើងធ្វើអាក្រក់នោះ ។ ព្យាការីបានប្រាប់ពួកយើងនៅក្នុងកូនសៀវភៅ ដើម្បីកម្លាំងនៃយុវជន ថាមិត្តភក្ដិ « នឹងមានឥទ្ធិពលដ៏ក្រៃលែងមកលើការគិត និង ការប្រព្រឹត្តរបស់អ្នក ហើយថែមទាំងជួយកំណត់ឲ្យអ្នកក្លាយទៅជាមនុស្សម្នាក់ផ្សេងទៀតផងដែរ » ( [ ឆ្នាំ ២០១១ ] ទំព័រ ១៦ ) ។ ខ្ញុំគិតថាយើងគួរមានមិត្តភក្តិ ដែលមានឆន្ទៈគោរពបទដ្ឋានរបស់យើង ហើយបង្ហាញចំណាប់អារម្មណ៍លើយើងក្នុងការរក្សាបទដ្ឋានរបស់យើង ។
ខាវីន ដបុលយូ អាយុ ១៦ ឆ្នាំ អារីហ្សូណា ស.រ.អា.
ចងចាំពីបទដ្ឋានរបស់អ្នក
មិត្តភក្តិដែលពុំមានបទដ្ឋានដូចអ្នក ពិតជាអាចធ្វើឲ្យបទដ្ឋានរបស់អ្នកចុះខ្សោយ ហើយខូតខាតបាន ។ កាលខ្ញុំប្តូរសាលាទៅរៀននៅសាលាថ្មីមួយ ខ្ញុំបានព្យាយាមសម្របខ្លួនជាមួយពួកគេ ដោយនិយាយអ្វីដែលមនុស្សនៅជុំវិញខ្លួនខ្ញុំនិយាយ ។ ខ្ញុំស្ទើរតែភ្លេចបទដ្ឋានមួយចំនួនរបស់ខ្ញុំ ខណៈខ្ញុំព្យាយាមធ្វើខ្លួនដូចពួកគេ ។ ឥឡូវនេះខ្ញុំដឹងថា ដើម្បីស្ថាបនាបទដ្ឋានរបស់អ្នក នោះអ្នកត្រូវការមិត្តភក្តិដែលគាំទ្រ និង មានបទដ្ឋានដូចអ្នក ។ ទីបំផុត ខ្ញុំមានអំណរគុណដែលរកបានមិត្តភក្តិដែលមានលក្ខណៈបែបនោះ ដោយសារពួកគេរំឭកខ្ញុំពីបទដ្ឋានរបស់ខ្ញុំ ។
ឡូហ្គេន ជេ អាយុ ១៥ ឆ្នាំ រដ្ឋយូថាយ៍ ស.រ.អា.
រក្សាបទដ្ឋានរបស់អ្នកឲ្យបានខ្ពស់
មិត្តភក្តិដែលមានបទដ្ឋានផ្សេងពីអ្នក ពុំអាចពង្រឹងបទដ្ឋានអ្នកឡើយ ប៉ុន្តែការធ្វើជាមិត្តភក្តិរបស់ពួកគេ អ្នកអាចធ្វើជាគំរូល្អដើម្បីធ្វើតាម ។ នៅពេលអ្នកមានមិត្តភក្តិ ដែលមានសេចក្តីជំនឿដូចនឹងអ្នក វាអាចជំរុញចិត្តអ្នកឲ្យរក្សាបទដ្ឋានរបស់អ្នកឲ្យបានខ្ពស់ ហើយជួយអ្នកឈរយ៉ាងរឹងប៉ឹងចំពោះអ្វីដែលត្រឹមត្រូវ ។
វ៉រ៉ែន អេស អាយុ ១៤ ឆ្នាំ អូរីហ្គិន ស.រ.អា.
មិត្តភក្តិល្អគឺជាពរជ័យ
ប្រសិនបើមិត្តភក្តិរបស់អ្នកពុំមានបទដ្ឋានដូចអ្នក វាកាន់តែពិបាកពង្រឹងសេចក្តីជំនឿផ្ទាល់របស់អ្នក ។ ដោយអានកូនសៀវភៅ ដើម្បីកម្លាំងនៃយុវជន វាជួយខ្ញុំជានិច្ចឲ្យជ្រើសរើសមិត្តភក្តិល្អដែលគោរពខ្ញុំ ។ ឥឡូវខ្ញុំកំពុងរៀបចំខ្លួនទៅបម្រើបេសកកម្ម ហើយខ្ញុំដឹងថា ការនៅជួបជុំជាមួយអ្នកដែលមានបទដ្ឋានដូចខ្ញុំ បានជួយខ្ញុំបន្តនៅស្មោះត្រង់ក្នុងដំណឹងល្អ ។
នែ អិម អាយុ ១៩ ឆ្នាំ ប៊ូណូស អ៊ែរ៉េស ប្រទេសអាហ្សង់ទីន
កាន់ខ្ជាប់ទៅនឹងដំបងដែក
ការមានមិត្តភក្តិដែលមានបទដ្ឋានល្អគឺពិតជាអ្វីដែលអ្នកចង់បាន ។ អ្នកចង់មានមិត្តភក្តិនៅជុំវិញអ្នកដែលនឹងជួយអ្នកឲ្យគោរពបទបញ្ញត្តិ ហើយជំរុញអ្នកឲ្យរស់នៅដោយសុចរិត ។ ចូរក្តាប់ដៃឲ្យជាប់ទៅនឹងដំបងដែក ដែលនាំទៅកាន់ដើមឈើជីវិត មិនមែនទៅអគារដ៏ធំ ហើយទូលាយនោះឡើយ ។ ការនៅជាមួយអ្វីដែលមិនសុចរិត នឹងនាំទៅរកការល្បួង ។ ការមានមិត្តភក្តិល្អនឹងជះឥទ្ធិពលលើអ្នកឲ្យរស់នៅតាមដំណឹងល្អ ។
អែននី ភី អាយុ ១៣ ឆ្នាំ រដ្ឋ យូថាហ៍ ស.រ.អា.
អធិស្ឋានស្វែងរកមិត្តភក្តិ
បន្ទាប់ពីគ្រួសារខ្ញុំ និង ខ្ញុំបានប្តូរទៅរស់នៅរដ្ឋផ្សេងមក ខ្ញុំបានអធិស្ឋានជានិច្ច ដើម្បីស្វែងរកមិត្តភក្តិដែលខ្ញុំអាចនិយាយជាមួយពួកគេអំពីដំណឹងល្អ ។ នៅពេលខ្ញុំអធិស្ឋានខ្ញុំទទួលអារម្មណ៍លួងលោម ហើយពីរបីខែក្រោយមក ខ្ញុំបានជួបមិត្តភក្តិដ៏អស្ចារ្យមួយចំនួន ។ ខ្ញុំអាចពឹងផ្អែកលើការគាំទ្ររបស់ពួកគេ ហើយពួកគេបានជួយខ្ញុំបង្កើនសេចក្តីស្រឡាញ់ចំពោះដំណឹងល្អកាន់តែច្រើនឡើង ។ ខ្ញុំដឹងថាមិត្តភក្តិគឺសំខាន់ណាស់ ហើយពួកគេអាចធ្វើឲ្យយើងមានភាពងាយស្រួលរស់នៅតាមដំណឹងល្អ ។
សារ៉ា ភី អាយុ ១៦ ឆ្នាំ រីយ៉ូ ដេ ជែនៀរូ ប្រទេសប្រេស៊ីល