Yaco me Tisaipeli Dina

iVakatakilakila

youth, woman, man silhouettes

Ena veisoqoni kece ni sakaramede, e noda na madigi meda yalataka vua na Tamada Vakalomalagi ni da na daunanuma na iVakabula ka muria na Nona ivakaro me tiko ga kina kei keda na Yalona (raica na Moronai 4:3; 5:2; V&V 20:77, 79). Na daunanumi Koya ena yaco ga mai vei keda ni da taura na Yacana vei keda. Eda cakava vakakina ena sala e vuqa ia vakabibi ga ena gauna eda qaravi ira na tani ena Yacana, wilika na Nona vosa tabu, ka masulaka meda kila na cava e vinakata o Koya meda cakava.

E yaco vei au ena noqu papitaisotaka e dua na cauravou. Au kila niu sa kacivi mai vei ira na italai digitaki ni iVakabula ena kaulotu meu vakavulica na Nona kosipeli ka vakadinadinataki Koya kei na Nona Lotu dina. Keirau a yalataka kei na noqu itokani vakadaukaulotu vua e dua na cauravou ni na vakasavasavataki o koya ena kaukauwa ni Veisorovaki i Jisu Karisito, ni papitaiso ena nona vakabauta na iVakabula mai vua e dua na Nona italai sa tiko vua na lewa.

Niu laveta cake mai na cauravou ena wai ni tobu ni veipapitaisotaki, e vakasolokakana mai ki daligaqu, “Au sa savasava, au sa savasava.” Ena gauna vata oya, au vakananuma na Nona papitaiso na iVakabula mai vei Joni na Dauveipapitaisotaki ena Uciwai na Joretani. Ka levucake, niu qai nanuma niu cakava tiko na cakacaka ni veivakabulai ni iVakabula sa vakaturicake mai na mate ka sa bula tiko—ka tiko kina na Yalo Tabu, me vakataki Joni.

Vei au kei keda kece, na noda vakasamataka na iVakabula e dodonu me levucake me na vakararavi tiko ga ki na dua na kila se veika e sotavi kei Koya. E rawa ni da vakayacora na digidigi ena veisiga ka na toro voleka tiko yani Vua ena gauna oqo.

E digidigi rawarawa duadua beka sai koya na wiliki ni ivolanikalou. Ni sa caka vakakina, eda vakila ni da sa voleka Vua. Vei au, na volekati koya sara e yaco mai niu wilika na Vola i Momani. Ena matai ni miniti au wilika kina na veiwase ena 2 Nifai, au rogoca ena noqu vakasama na domodrau o Nifai kei Liai ni rau vakamacalataka tiko na iVakabula me vakaga e rau kilai Koya vakatamata. Au vakila ni yacovi au mai e dua na yalo ni volekati koya.

Vei iko, ena rawa ni so tale na vanua ena ivolanikalou ena toroi iko voleka yani Vua. Ia, ena gauna cava kei na vanua cava ga o wilika kina na vosa ni Kalou, ka vakananuma na iVakabula ena yalomalumalumu kei na gagadre dina, ena vakalevutaki cake na nomu gagadre mo taura vei iko ena veisiga ni nomu bula na Yacana.

Na gagadre oqori ena veisautaka na nomu veiqaravi ena Lotu ni Turaga. O na masu vua na Tamada Vakalomalagi me veivuke ena kena vakalevulevui na veikacivi ena vaka e lailai vei iko. Na veivuke o na kerea sai koya na nomu guilecavi iko ka vakanamata vakalevu cake ki na veika e vinakata na iVakabula vei ira o sa kacivi mo veiqaravi kina.

Au sa vakila na Ligana kei na Nona volekati au ena noqu veiqaravi vei iratou na luvequ niu a masu meu kila meu na vukei iratou vakacava me ratou kunea na vakacegu ena solia duadua ga na kosipeli. Ena veigauna oqo, au sega ni kauwai vakalevu ena noqu rawaka vakaitubutubu, ia, au kauwaitaka ga vakalevu na nodratou rawaka na luvequ.

Na gagadre me da solia vei ira eda veiqaravi kina na veika ena solia vei ira na iVakabula ena veimuataki ki na masu e vakatakekere vua na Tamada Vakalomalagi, ena yalodina ena yaca i Jisu Karisito. Ni da masu ena sala oqori—ena yacana na iVakabula, ni da vakabauti Koya—ena sauma na Tamada. E dau tala mai o Koya na Yalo Tabu me veituberi, veivakacegui, ka vakayaloqaqataki keda. Baleta na Yalo e dau vakadinadinataka tu ga na noda iVakabula (raica na 3 Nifai 11:32, 36; 28:11; Ica 12:41), na noda rawa ni lomana na Turaga ena yaloda taucoko, noda nanuma kecega, ena vakalevutaki cake na noqu kaukauwa (raica na Marika 12:30; Luke 10:27; V&V 59:5).

Na veivakalougatataki ni nanuma tale mai ni veisiga sa oti kei na gauna oqo ena tekivu me lako mai vakamalua ka dei ni da qaravi Koya, kana magiti ena Nona vosa, ka masu ena vakabauta ena Yacana. Na vakalesui mai ni nanuma oqo ena moici keda me da tisaipeli dina ni Turaga o Jisu Karisito ena Nona matanitu e vuravura oqo—kei na noda na tu kei Tamana ena vuravura lagilagi oya.