E dua na iSau ni Taro Veivakauqeti ena dua na Veivakatarogi ni Cakacaka

iVakatakilakila

man standing on clock

iYaloyalo mai na Getty Images

Niu sa mai lesi oti meu liutaka e dua na komiti ni bula rawati koya ena iteki, au vakila niu sega tu mada ga ni cakacaka vinaka. Ena veika au sa kila oqo, au gadreva me vakalevutaki cake na noqu bula ni kila ka vakacakacaka.

Au vakila e dua na gagadre e vakavoui meu vasaqara e dua na cakacaka e vinaka cake kau kere veivuke ena kena volai e dua na ituvatuva baleti au, ni noqu rawaka vakavuli kei na cakacaka. Au vakauta yani na ituvatuva oqori ki na vica na kabani kau sa qiriti sara mai meu vakatarogi.

Ena dua na veivakatarogi oqori, e tarogi au o dauveivakatarogi e dua na ka e tukuni tiko ena noqu ituvatuva na noqu veiqaravi vaka daunivakasala ena mataveiliutaki ni iteki, “E rawa ni o tukuna vei au ena loma ni lima na sekodi na cava na ibalebale ni veiqaravi oqori?”

Au tukuna yani niu a tiko ena dua na veiliutaki ni soqosoqo ka wanonava ka dusimaka na nodra bula raraba e 2,500 na tamata. E via kila o dauveivakatarogi ka kaya, “E soli vei iko e dua na miniti mo vakasamataka e dua na sau ni taro e lima ga na sekodi na kena balavu kina taro: o dusimaki ira vakacava na 2,500 na tamata oqori?”

Au kila ni sai koya oqo na taro ena vakayaco ka ena veivakatarogi. Au masu kau kerea na Tamada Vakalomalagi me vukei au meu nanuma kusa rawa na lesoni au a vulica mai na ilawalawa ni bula rawati koya. Au vakila na yalodei ni sa drodrovi au.

Ni oti na dua na miniti, sa taroga o dauveivakatarogi, “O liutaki ira vakacava na 2,500 na tamata oqori?”

“Keitou vukei ira me ra rawata na nodra lalawa,” au sauma yani.

E tucake o dauveivakatarogi, lululu mai vei au, ka kaya, “Sa nomu na cakacaka.”

E totoka na nona taura na ligaqu na Kalou ka sauma na noqu masu. Au vakavinavinaka vua na noqu iVakabula ni vakauqeti ira na iliuliu me ra tauyavutaka na veiqaravi ni bula rawati koya. Au sa mai raica kina na kalougata, kau sa raica na iwalewale rawarawa, e vakauqeti ni veiqaravi ena bula rawati koya e vakalougatataki ira talega e lewe vuqa ena neitou iteki. Au sa mai vakabauta na veika ena rawa ena ivakavuvuli ni bula rawati koya me laveta cake na bula, ni gauna au liutaka kina e 15 na tamata cakacaka ena noqu cakacaka vou, sa tekivu meu vakavulica na ivakavuvuli ni bula rawati koya.

Au sa mai tubu sara kau vakila ni sa levucake na ka au sa rawata mai na noqu nanuma e liu. Au sa mai rawata tiko oqo e dua na isau keitou bula rawa tiko kina o au kei na noqu vuvale. Na veiqaravi oqo e vukei keda me da vinaka cake e veisiga ni vukei keda me da bula rawati keda vakalevu cake.