Na ilakolako nei Jane

iVakatakilakila

janes journey

E sarava tu o Jane Manning na kena sa soko yani na waqa mai na Drano o Erie. E vakila o koya ni sa vaka sa soko talega yani kina na nona tatadra.

Ena dua na yabaki sa oti, e lewena o koya Na Lotu i Jisu Karisito ni Yalododonu Edaidai ka vakatulewa me toko yani me tiko kei ira na Yalododonu e Nauvoo. Eratou a lakovata kei koya ena Drano o Erie ki Buffalo, New York, na tinana kei na vitu tale na leweni matavuvale. Ia e Buffalo, eratou a sega ni vakatarai me ratou vodo ena waqa baleta na roka ni kulidratou.

“Na cava eda cakava oqo?” e taroga malua yani na tacina, o Issac.

E voqa na taro oqori ena cagi batabata. E tiko mai na 800 na maile (1,287 na kilomita) o Nauvoo. E rawa ni ratou soro ga ka gole yani ki vale, qai tovolea tale vakamalua. …

Ia, e sega ni rawa ni wawa o Jane! E kila o koya ni dina na Vola i Momani. E vosa tale mai vei ira na parofita na Kalou. E gadreva o koya me yaco yani e Nauvoo kei na nona matavuvale.

E vakadodonutaka na tabana o Jane ka rai yani kina ra. “Tou taubale.”

Ka ratou cakava sara. Me yacova ni sa yavu yani na nodratou ivava. Me yacova ni sa mavoa mai ka kavida na boto ni yavadratou ka ratou masu me ratou vakabulai. Ena so na gauna eratou moce ga e tautuba, na vavaku ni kabu e sa vakatale na lutu ni uca cevata. Eso na tamata era tukuna ni ratou na vesu, baleta ni ra nanuma ni ratou tamata daucakacaka ka ratou dro mai. E sega ni kila na matavuvale na Mannings eratou matavuvale loaloa ka galala. Ka ratou taubale yani, ka laga serenilotu me toso tiko kina na gauna.

E ratou sa voleka sara ki Nauvoo ni ratou sa yacova yani e dua na uciwai.

“E sega na kawakawa,” e kaya o Issac.

E deguvacu o Jane. “Edatou na taubale takosova ga yani.” Ni butu yani e lomani uciwai, e yaco mai nona qurulasawa na wai. E toso toka ga yani vakamalua. E kui mai na wai ki duruna ka qai yaco yani ki tolona. Ni sa yaco yani na lomadonu ni uciwai, sa yaco tu na wai e domona! Kalougata, ni sega ni qai titobu tale, ka ratou takoso yani vakavinaka na matavuvale na Manning.

E ratou sa qai yaco yani ki Nauvoo. E raica rawa tu yani o Jane na lalaga totoka ni Valetabu e Nauvoo ena dua na delana ka raica sobu tu yani na veibuca. E dina ga ni se bera ni oti e kauta saraga na nona icegu. E dua e qai dusi iratou yani ki na vale e tiko kina na parofita o Josefa.

E duri tu e mata ni katuba e dua na marama balavu ka buto na roka ni uluna. “Dou curu mai, dou curu mai!” e kacivaka yani o koya. “O au o Ema Simici.”

Na veiminiti e tarava e sega ni matata. E sotava na Parofita o Jane, ka qai tuva yani eso na dabedabe ena loma ni rumu vei iratou na matavuvale na Manning. E dabe yani ena vakavinavinaka o Jane, ka qai vakarogoci Josefa ena nona vakamacalataki iratou ki vei ira kece e kea, oka kina na nona itokani o Dr. Bernhisel. Sa qai vuki yani vei Jane o Josefa, “O iko sa liutaka mai na ilala lailai oqo, e dina beka?” e taroga yani.

“Io, saka!” e sauma yani o Jane.

E dredre o Josefa. “Me vakalougatataki iko na Kalou. Ena gauna oqo au via rogoca na vei ka me baleta na nomudou ilakolako.”

E tukuna o Jane me baleta na mavoa ni yavadratou kei na moce ena ucacevata kei na tokosovi na uciwai. Era vakarorogo kece. “Ia, e sega soti ni ca sara,” e tinia yani o koya. “Keitou sa lako tiko ka marau, laga serenilotu ka vakavinavinaka tiko Vua na Kalou ena Nona vinaka tawayalani kei na veivakalougatataki vei keitou, veitaqomaki kei na kena vaka mavotaki na yavai keitou.”

Keirau a vagagalu mada vakalailai. “Na cava o vakasamataka mai kina oya, Vuniwai?” E qai kaya yani o Josefa, ni sabica na durui vuniwai. “E sega beka ni vakabauta o ya?”

“Kevaka o au oqori, keu sa vakasuka ka lesu yani ki vale!” E vakadinata o Vuniwai Bernhisel.

E deguvacu o Josefa ka qara yani vei Jane kei na nona vuvale: “Vakalougatataki iko na Kalou. Dou sa tiko maliwai ira na itokani.”