Tautauri Matua
E vakaitikotiko mai Utah, Amerika, o koya e vola.
Ira na noda itokani era wasea e dua na duidui ni rawarawa—se dredre—na noda bulataka na vei vakatagedegede ni noda bula.
Au tubu cake mai ka veimaliwai kei ira na itokani era leweni ni Lotu ka dua na ka na noqu nanamaki tu ni na dua siga au na papitaiso ka lewena na vakataki au. Na gauna au toki kina meu lai vuli, au tekivu tauri lesoni mai vei rau na kaulotu. Kani rarawa, na veivakayarayarataki vakaicaba a vaka dredre taka na noqu muria na vakatagedegede ni kosipeli. Levu vei ira na noqu icaba era vakayagataka tu na gauna mera soqo tu kina ka gunu yaqona ni vavalagi. Au se sega vakadua ni tovolea na yaqona ni vavalagi, ia o ira na noqu itokani era dau vakayarayarataki au meu gunuva.
Au kila ni dina tu na kosipeli, ia na veitemaki mai vei ira na noqu icaba sa dredre saraga na noqu vorata.
Au tekivu masu vua na Tamada Vakalomalagi me solia vei au na kaukauwa meu digitaka na veika sa dodonu. Au sega ni tosoya sobu na noqu ivakatagedegede ni bula, ia au rere ni kila ni sega vei au na kaukauwa meu na vuki tani mai kevaka e soli vei au na yaqona ni vavalagi. Dua na ka na noqu dau vakasamataki ira na noqu itokani era dau wasea tu vata kei au na varau ni noda bula.
Dua na bogi ni Vakarauwai au gole ena dua na soqo vata kei ira na leweni noqu bure. Sega ni bera ira kece na noqu itokani era vakauqeti au meu tovolea ena matai ni gauna na yaqona ni vavalagi.
Au a temaki. Au taura na bilo ni yaqona vavalagi ka soli vei au. Au dreta voleka mai e usuqu, kau rivariva ia au marau niu ni ra tu na noqu itokani. O Nick, dua na cauravou kilai ena nona dau gunu, gole cake yani vei keitou.
“O sega beka ni gunuva na gunu, o ya?” a taroga o koya.
“Se sega,” Au sauma lesu.
“Kevaka o ni gunuva,” a kaya o Nick, “o ni na veivutuni taka tu ena nomu bula taucoko.”
Au Kidacala. Au kila ni dina o koya. Au sega ni via gunuva. Au a vinakata meu lewena na Lotu. Au vakasuka lesu na bilo, au tatau mai na soqo, vakavinavinaka niu sega ni vakayacora e dua na digidigi ca.
Na mataka ni siga tarava au lako iLotu, au kunei rau na kaulotu, ka biuta e dua na noqu tikini siga ni papitaiso. Mai na siga oya au sega vakadua ni gole ena dua tale na soqo ni marau se gunuva na yaqona ni vavalagi. Au sotavi ira na noqu tokani ena lotu ka keimami wasea vata kei au na varau ni bula. Au se tokani voli ga kei ira na lewe ni noqu bure, ia au vakamatatataka vei ira na vakatagedegede ni noqu bula. Na gauna era kila kina na bibi ni noqu maroroya na vakatagedegede ni bula qo, era rokova ka sega ni dau vakayarayarataki au. Era dau raica na noqu dau biuta na rumu na gauna e saravi kina na yaloyalo sega ni dodonu me saravi kei na sere sega ni dodonu me rogo era dau rokovi au.
E vakaukauwa taka na noqu ivakadinadina na veika au lako curuma oqo, kau saga vakaukauwa meu kua ni vakalutuka na vakatagedegede oqo me baleta na nodra vei vakayarayarataki mai vei ira noqu icaba. Au kila ni sala vinaka duadua na gauna eda sotava kina eso na digidigi dredre mo taura dei na vakaitagedegede ni bula ka mo taura dei mai ena vakatekivu.
Au kila ni Tamada Vakalomalagi ena sauma na noda masu ka vakaukauwataki keda meda vorata na veitemaki. Au vakavinavinakataka na Yalo Tabu na nona uqeti au meu digitaka na ka dodonu. Au kila ni vakatagedegede ni bula ni Lotu a tu me taqomaki keda, kau vakavinavinakataka niu digitaka meu muri koya e vukei au meu mai lewena na Lotu.