Eda Tukuni Karisito
E Sega ni se Bera mo Tovolea Tale Mada Vakarua
E vakaitikotiko na dauvolaivola mai Virginia, Amerika.
Na tamana e dua vei ira na noqu gonevuli e tukuna vei luvena yalewa, “E sega ni se bera mo tovolea mo rawa ka.” E solia talega vei keda na Turaga na itukutuku vata oqori.
Droini mai vei Kelley McMorris
E gonevuli ena noqu kalasi ni vosa Vakavalagi o Sandra ena ivakatagedegede torocake. Ni oti e vica vata na macawa ena loma ni yabaki, e a sega ni cakava o koya e dua na cakacaka ni vuli lesoni e vale. E a dau tetewai voli ga ena nona desi. E dau vakaiulubale voli me baleta na nona sega ni dau vakacavara na nona ka ni vuli, ka a sega saraga ni dua na vakaraitaki se sasaga me rawa ka ena lesoni dredre oqo.
Keirau a duavata kei daunivakasala ni vuli me keitou sa na bose mada kei Sandra, o tamana, kei na so tale na nona qasenivuli me keimami na raicavata na sala cava me sa na taura o koya: e dodonu me taura tiko na kalasi torocake oqo se sa taura ga e dua e rawarawa cake? Ka bibi duadua na taro e sega ni tukuni e bikai tu ena neimami vakanananu kece: ena rawa beka ni keimami kunea e dua na sala me vukei kina o Sandra me rawa ka?
Niu vakabauta tu ni sa soli vakavica vata vei Sandra me tovolea tale me rawa ni rawa ka, ia e digia o koya me vakadrukai, au a gole yani ena bose oya ena yalolailali. Au a nuitaka lo tu me vinakata o koya me biuta na noqu kalasi me rawa niu kua ni leqataki koya tale. Au nanuma au a sa cakava na veika kece e rawa niu cakava ka sa bera sara.
Ena bose oya, na ivakarau nei Sandra e tukuna ga mai ni o koya talega e sa vakatitiqataka na nona rawa ni rawa ka. E wadrava toka ga o koya na teveli niu tukuna tale tiko na nona sega ni rawa ka ena kalasi ni vosa Vakavalagi. Ena nona vakadeitaka tale ga mai na nona qasenivuli ni tukutuku makawa ni a sega ni rawa ka talega ena nona kalasi o Sandra, e sa qai vakasavuya sobu sara na yagona ena idabedabe kau raica rawa ni sa tonawanawa na wai ni matana.
Ena yalololoma, au vakamacalataka vei koya kei tamana kevaka ena vinakata o Sandra me rawa ka ena lesoni dredre eso oqo, e sa na dodonu me veisau na nona ivakarau ka sa mai vakavuna tu na titobu ni qara e sa tu kina o koya, ka ni sa dredre sara.
Na itukutuku mai vei Tamana
Qai vuki yani o daunivakasala ni vuli vei tamai Sandra, e turaga sega soti ni vuli vinaka, ka sega ni matau vua na ituvaki ni koronivuli. Ka qai tarogi koya o daunivaksala kevaka e dua nona taro vei ira na qasenivuli. E kaya o koya ni sega ka vakavinavinakataki keitou ena vinaka keitou sa cakava me baleti Sandra. Ia e gadreva o koya me dua na nona vosa vei luvena yalewa.
E rarawa na yaloqu. Au sa tiko oti ena bose vakaoqo kei ira na itubutubu, ni ra sa vosataki ira vakaca na gone e matadra na qasenivuli kei daunivakasala ni vuli, ka vakalailalitaki ira ni ra sa rui vucesa, sega ni dau vakarorogo, ka sega ni dau sasaga. Au sa tu vakarau meu rogoca tale.
Ia na ka au a rogoca e vakidacalataki au. E a vuki yani na tamani gone yalomalua oqo vei Sandra na luvena yalewa yabaki 16 e sa bikai tu ena madua kei na veivutuni ka kaya yani vua, “E sega ni se bera. E sega ni se bera mo tovolea mo rawa ka. E sega ni se bera dina.”
Au a biuta yani na bose oya ena vakavinavinaka ena nona loloma ia au a leqataka ni a sega sara tu ga ni kila o koya na veika me cakava na luvena yalewa me na rawa ni pasi ena gauna oya. E sa rairai dredre saraga me na rawa. E qai tukuni e muri ni a biuta o koya na nona kalasi ni tukutuku makawa ia a sega na noqu kalasi ni vosa Vakavalagi ni biuta.
Ena bogi ni siga oya niu tekiduru meu masu, niu vakananuma tu na noqu malumalumu kau kere veivosoti vua na Tamada Vakalomalagi me vosoti au, au vakila na veika e dodonu meu vulica mai vua na tamai Sandra. Na lomaleqa kei na yalodruka ena noqu bula e vakavuna meu vakasamataka kevaka e dodonu beka me a soli talega vei au meu tovolea tale mada vakarua. Ena gauna vakaoqori, na Turaga, vaka ga na tamai Sandra, e digitaka me kua ni biuti au ka vakadeitaka vei au: “E sega ni se bera, na luvequ. E sega ni se bera.”
Na iTukutuku ni Kosipeli
Sa vakavica na noda dau vakabauta na nona itukutuku na vunica ni sa sega ni rawa, sa sega nai nuinui? Ia era tukuna vei keda na parofita ni se rawa tiko. E vunautaka o Aisea, “Ka me lesu mai ko koya vei Jiova, ena yalololoma vua, io vei koya na noda Kalou, ni na gugumatua ni lomana” (Aisea 55:7). E vakadinadinataka talega o Momani, “Ia era na vosoti ena veigauna kece ga era sa veivutuni kina,ena yalodina” (Moronai 6:8vakamatatataki). Na reki ni kosipeli oqo ni sega ni se bera. Ni vakawasoma na noda vasaqara na veivosoti, na veivueti ni Turaga ena vakatarai keda meda tekivu vou tale.
E vakauqeti o Sandra ka tekivu tale, ka mai rawa kina na veisau lalai ka bibi. Na veisau oqori e sega ni rawarawa—e gadrevi kina na sasaga bibi me ulabaleta na itovo matau ca—ia e raica kina o koya na isau ni nona sasaga ni sa tekivu me vinaka cake mai vakamalua na nona vuli.
Ena rai vakosipeli, na iotioti ni veika eda rawata ena sega ni wili kina na balavu ni gauna eda a lutu tu kina se na titobu ni qara ena keli eda tu yani kina. Ia, ena yavutaki na nona lewa na noda bula na Turaga na vanua eda sa gole tiko yani kina, eda sa veivutuni beka, ka vakacava na noda a vakararavi ki na Veisorovaki ni Turaga.
Ni yalani tu noqu kila, au a vakatitiqataka nona rawa ni ulabaleta o Sandra nona cala ni veigauna sa oti. Ni vakatautauvatataki, e sega vakadua ni dauguce na Nona vakanuinui tu na Tamada sa cecere sara ni ra na rawata na veivakabulai ka vakataucokotaki vei Karisito. E sega ni dua na ka na noda lakosese kalia sara tu vakacava, ena dau vakasaqara o Koya na dua. E sa vakamasuti keda na Turaga me sa rauta na noda lako tu vakasese ena ivalavala ca ia meda vakasaqarai Koya ena inuinui kei na kalougata ni Nona Veisorovaki. E dina sara, e sega saraga ni bera.