Mo na Rawa ni Kila ga Vakataki Iko

iVakatakilakila

young man

Kemuni na itokani tabagone, na neitou gagadre me baleti kemuni sai koya mo kila vakataki iko, galala mai vei ira na tani, ni sa dina sara na Kalou ni lomalagi, e kilai iko o Koya, ka sa sorovaka na ivalavala ca ni vuravura na Luvena.

Na neitou vakanuinui ni o na rawata vakataki iko na ivakadinadina tawayavalati rawa ni kosipeli i Jisu Karisito e sa vakalesuimai e vuravura ena iotioti ni gauna. E duidui sara na nona ilesilesi o Josefa Simici, ia na nona masu malumalumu e ivakaraitaki vinaka sara vei iko kei au. E gole ki na veikau o Josefa me masu ena vakabauta ni na sauma e dua na Kalou dauloloma na nona masu ka vakamatatataka na nona lomatarotaro. E rawata na veivakadeitaki oqori mai na wiliki ni vosa ni Kalou ka qai ciqomi e dua na ivakadinadina ni dina na veika oqori. E masu talega o Josefa ena gagadre me sega walega ni rogoca ka muria veitalia ga na kena isau. E a yalayala o koya ni na cakacakataka na cava ga ena tukuna mai vua na Kalou vei koya.

Ena yalo oqori, au via bolei ira na itabagone ni Lotu oqo. Oqo na ibolebole: mo kila ga vakataki iko ni dina na veika oqo. Ena rawa ni o cakava oqo ena nomu vakamuria na ivakaraitaki nei Josefa Simici: vulica na ivolanikalou, me lutu sobu sara vakatitobu ki yalomu na vosa oqori, qai vakasamataka sara vakatitobu vakawasoma, ka qai kerea vua na Kalou, ena gagadre mo ciqoma na Nona veidusi—vakaidina sara me yaco na Nona lewa.

Ena rawa beka ni rorogo vaka veisureti na ibolebole oqo, ia, au yalataka vei iko ena taura e dua na igu bibi. Au sega ni rawa ni yalataka ni na lako mai na kena isau ena loma ni dua na siga se macawa, ia, au yalataka ni na vosa vei iko na Kalou ena Nona sala ga o Koya, kei na Nona gauna, kevaka o kerekere ena vakabauta. Ni o sa ciqoma ka qai cakacaka ena veisureti oqo, o na raica ni na sega walega ni lako mai na kena isau, ia o na tauyavutaka talega na ivakarau ni rawata na kila ka vakayalo ena vakalougatataki iko ena nomu bula taucoko.