Rawata na Vakarokoroko Yadua ena Bula Rawati Koya

Au vakamau, e tolu na luvequ, kau sega ni cakacaka. Au vakila na druka niu bikai tu ena dravuisiga ni sega na cakacaka. Au leqataka na nodratou taqomaki na noqu matavuvale, ka sa mai cava na noqu vakabauti au.

E a vakauqeti au na watiqu o Carla, meu curu ena dua na ilawalawa ni bula rawati koya. E a ka vakamadua vei au meu vakadinata ni sa sega na noqu cakacaka, ia e vakayaloqaqataki au o koya meu curu ena ilawalawa oya me rawa niu qarava kina na neirau matavuvale.

Au sa mani tovolea ena lomalomarua. Niu lewena tiko na ilawalawa oya, au vakila mai kina ni rawa ni dua na noqu iyau ena vuravura ni cakacaka na noqu kila ni vosa Vakavalagi. Au a vulica na vosa Vakavalagi ena noqu kaulotu, ia, au kila ga na tukuna na veika baleta na kosipeli. Au a volayaca ena kalasi in vosa Vakavalagi e vakarautaka na Lotu meu vakavinakataka na noqu kila na vosa. Niu suka mai ena dua na siga, ena noqu kalasi ni vosa Vakavalagi, a solia mai vei au o Carla na talevoni.

“O cei beka qo?” Au taroga.

“Au sega ni kila,” e sauma mai o koya. “Eratou vosa tiko Vakavalagi.”

Eratou a vinakata meu gole yani meu vakatarogi vua e dua na ivakalesilesi ni tamata cakacaka ena dua na kabani levu mai Costa Rica. Au a kurabui sara, ia a lako vinaka na veivakatarogi. Au qai kila e muri ni a vakarautaka na veivakatarogi oya o Carla.

E qai soli vei au na cakacaka, kau vakasamataka ni a vukei au sara na noqu ilawalawa ni bula rawati koya. Kau qai vakananuma ena rawa vakacava meu bulataka vakavinaka na veika au sa vulica. Au sa qai vaqara e dua na cakacaka e vinaka cake, ka soli sara mai. Au sa qai cakacakataka yani meu tekivuna e dua na noqu bisinisi vakamatai.

Au sega niu vakasamataka rawa na vanua keitou na tiko kina vakamatavuvale ke a sega na itautauyavu keitou a ciqoma mai na veiqaravi ni bula rawati koya. Au vulica meu yalomalua ka kerea vua na Turaga na veivuke. Au vulica talega meu vakatarai ira na via vukei au me ra vakalougatataka na noqu bula. E sa mai levu na neitou veivakalougatataki. Au rawa ni vakalougatataka na noqu matavuvale ena ilavo au sa rawata, kau sa mai rawata na vakarokoroko yadua. Au kila ni vakalougatataki keda na Yalo ni da yalomalua.