“Me kuri ni masu kei na vulica na ivolanikalou, na cava na sala vinaka ni nomu na vaqaqacotaka kina noqu ivakadinadina?”

Ena sega ni lako taucoko mai ena dua na gauna na nomu vakadinadina. Ena tubu cake tiko vakamalua na nomu bula vakayalo ena dua na gauna—me vaka e kaya na ivolanikalou ka kaya, “na ivunau ena ivunau, vakalailai eke ka vakalailai e kea” (2 Nifai 28:30). Ena dodonu mo na vakabulabulataka ka vakaukauwataka tiko na nomu vakadinadina, vaka ga e dua na soreni kau e bula tiko (raica na Alama 32:28–43). Ia me vaka na vunikau ena sega ni rawa ni bula ena wai duadua ga, e sega ni dua ga na sala “vinaka” ni nomu vakaukauwa taka na nomu ivakadinadina. O na gadreva e vica toka na kena sala.

Na masu kei na vulica na ivolanikalou eso na sala vinaka ni nomu vaqaqacotaka kina na nomu ivakadinadina. Ena nomu vulica na kosipeli, ka masu na dina ni nomu via kila ni dua na ka e dina, ena vukei iko na Yalo Tabu mo vakila na dina ni kosipeli (raica na Moronai 10:4–5).

E rawa ni o vakaqaqacotaka na nomu vakadinadina ena nomu maroroya tiko na ivakaro. Na nomu bulataka kina na yavu ni kosipeli—sa ikoya na lolo, maroroi na Siga ni Vakacecegu, se vaka itavi na gauna ni sakaremede—o na tekivu taukena e dua na vakadinadina me baleta kei na vuna e dina kina, mai na kena e dina. E kaya o Jisu kevaka e dua na tamata sa via cakava na “loma i koya,” ena kila nai vakavuvuli” (Joni 7:17).

E dua tale na sala me da vakabulabulataka na noda vakadinadina meda veiwasei. A kaya kina o Peresitedi Boyd K. Packer (1924–2015), ena Qoramu ni Apositolo Le Tinikarua, “Ena qai kune na ivakadinadina ni sa na cavuti!” (“The Candle of the Lord,” Ensign, Jan. 1983, 54; Tambuli, July 1983, 34). Sa rawa mo wasea na nomu ivakadinadina e vale ni Lotu, semineri vakakina vei ira na nomu itokani. Baleta na gauna o cakava kina, ena rawa me vakadinadinataka vei iko na Yalo Tabu ni veika o wasea tiko e dina.

Na gauna o vakaukauwataka kina na nomu vakadinadina ena vuqa na sala, ena tubu ka titobu, o na qai vakila na vakacegu kei na marau.