Mo Kila ni Bera Ni O Lako: Na Veipapitaisotaki e Valetabu

Mai vei Heather J. Johnson

Mekasini ni Lotu

E sega ni gadrevi mo wawa. Na lewenilotu kilikili kece sara, oka kina na itabagone kei na lewenilotu vou, era rawa ni veiqaravi oqo ena valetabu.

iVakatakilakila

standing in front of temple doors

“Me da sa tamata, dau goleva wasoma ka taleitaka na valetabu,” e kaya o Peresitedi Howard W. Hunter (1907–95). “Me da vakusakusa wasoma ki valetabu … me vaka e vakatara na noda ituvaki yadua. Sa dodonu meda lako, sega walega ni baleti ira na wekada sa ra mate ia me baleta talega na noda veivakalougatataki ni sokalou ena valetabu, me baleta na veidokai kei na veitaqomaki era sa tu ena loma ni lalaga rokovi ka vakatabui oya” (“A Temple-Motivated People,” Ensign, Feb. 1995, 5).

Na ivakasala oqo e tautauvata vei ira kece na lewenilotu ni Lotu i Jisu Karisito ni Yalododonu Edaidai—kevaka tale madaga o se qai lewenilotu papitaiso vou. Ni o sa bulakilikili, e sega tale ni dua na gauna ni wawa mo rawa ni curu ki valetabu. Na gauna ga o sa papitaiso kina ka vakadeitaki, e sa rawa ni soli vei iko e dua na ivolatara yalani ni valetabu.

Na ivolatara oqo ena vakatara mo curu ki valetabu mo cakacaka vakadauveisosomitaki ena papitaiso kei na veivakadeitaki vei ira na qase era sa mate. Ni o veiqaravi ka sokalou e valetabu, ena rawa ni o vaqaqacotaka na nomu ivakadinadina ni kosipeli.

Ena imatai ni veika e sotava e valetabu, e a kaya kina o Natalia Lorena Figueroa mai Argentina, “Ena vanua ni papitaiso e valetabu, au sarava e dua na taciqu tagane ni papitaiso ena vukui tukaqu kei iratou noqu momo. Au qai papitaiso vei buqu kei iratou noqu nei. Na reki au vakila e vakasakiti. E drodro mai na wainimataqu, kau vakila na kena raragi na lomaqu kau se sega niu vakila e liu.” Na veivakalougatataki vata oqo e waraki ira na rawa ni vakayagataka na ivolatara yalani ni valetabu.

Taro Dau Tarogi Wasoma

Meu rawata vakacava na ivolatara yalani?

E dodonu mo yabaki 12 se qasecake ka lewe ni Lotu kilikili. Me ra ciqoma na turaga na matabete i Eroni, ena rawa ni caka oqori ena lomani dua na macawa mai na nona papitaiso.
Mo ciqoma na ivolatara, ena vakatarogi iko na nomu bisopi se peresitedi ni tabana. Na veivakatarogi e via tautauvata kei na kena a vakayacori ni bera nomu papitaiso. O na veivosakitaka kina na nomu ivakadinadina ni kosipeli kei na nomu vakamuria na ivunau.
Na volatara e rawa ni vakayagataki tiko ena dua na yabaki.

Na cava eso na veivakalougatataki ni tiko na ivolatara yalani.

Ena rawa ni o qaravi ira na nomu qase e liu kei ira na tani era sa mate ena nomu veisosomitaki ena papitaiso kei na veivakadeitaki ena vukudra.
Ena rawa ni o vakananumi talega ena nomu papitaiso kei na vakadeitaki kei na veiyalayalati o sa cakava.
Kevaka madaga o sega ni rawa ni lako wasoma ki valetabu, ena rawa ni o kauta vata tiko kei iko na nomu ivolatara me ivakananumi ni valetabu kei na nomu iyalayala mo bula kilikili mo curu.
Nomu bula kilikili kaya mo rawata na ivolatara yalani ena vukei iko mo ciqoma na nomu veicakacaka vakalotu ni edaumeni kei na veivauci.

Meu tuva vakacava noqu ilakolako ki na valetabu?

Kerea vua na iliuliu ena tabanalevu se tabana, me vaka na iliuliu ni kaulotu se peresitedi ni Soqosoqo ni Veivukei, me veivuke ena tuvai ni ilakolako ki valetabu.
Na ituvatuva ni vanua ni papitaiso e valetabu e tiko talega ena mataveilawa ena temples.lds.org. E rawa talega ni o qirita na valetabu me baleta na itukutuku.
Kevaka o sa qai lako tiko ena imatai ni gauna, ena rawa ni o qiri ki valetabu mo cakava e dua na nomu veibuku. Ena sala oqo e ratou na rawa ni waraki iko ka kidavaki iko ka vakamacalataka na veika mo cakava e valetabu.
Darama na nomu isulu ni lotu ki valetabu.
Kauta vata tiko mai kei iko na nomu isulu iloma vulavula mo veisau kina. Eso na valetabu era vakarautaka na isulu iloma vulavula, ka so e sega. Ena vakarautaka na valetabu na isulu vulavula ni papitaiso kei na tawelu.

Na cava meu namaka ena gauna au lako kina ki valetabu meu cakava na papitaiso veisosomitaki kei na veivakadeitaki?

Ni o curu yani ki valetabu, o na lako iliu ki na desi ni volatara. E dua na tamata cakacaka ena raica na nomu ivolatara.
Na marama kei na turaga ena duidui na rumu rau dui curu kina me rau veisau. E vakarautaki tu na loka me biu kina na nomu isulu ka o veisau yani kina isulu vulavula e vakarautaki.
Era na vakaraitaka vei iko na liganicakacaka e valetabu na vanua mo gole kina mo laki vakayacora na papitaiso kei na veivakadeitaki veisosomitaki.
Na papitaiso kei na veivakadeitaki o na vakaitavi kina ena via tautauvata kei na nomu papitaiso kei na veivakadeitaki, ia, o na cakava tiko ena vukuna e dua na tamata e sa mate.
Ni o sa vakaitavi oti ena cakacaka vakalotu, o na lesu tale kina rumu ni veisau ka veisau tale kina nomu isulu.
E sega ni dodonu mo lomaleqataka na nomu curu ki valetabu. Era tiko na tamata cakacaka e valetabu ena veivanua cava ga o gole kina ena loma ni valetabu. E ratou na vukei iko.