Vorata na Veimoici ni “iVakarau ni Tabagone”

iVakatakilakila

breaking the mold

E levu na ka e tukuna o vuravura me baleti ira na itabagone ena gauna oqo. O sa rogoca beka e so na veivakaduiduitaki se o rogoca e dua e vosa kudrukudrutaka tiko me baleti “ira na gone ena gauna nikua.” E levu tu na vakadidike e baleti iko—na nomu ivakarau ni vakayagataka na veimaliwai raraba ena mataveilawa, na veika o volia, na lekaleka sara madaga ni gauna o rawa ni o vakarorogo vinaka kina.

Ia o Peresitedi Russell M. Nelson, na Peresitedi ni Kuoramu ni Apositolo Le Tinikarua, e kaya ni “sega ni daulogaloga vinaka” vua ni dau rogoca ni ra solia na daunivakadidike na veika era kunea me baleti ira na itabagone. “Ia na ka dina,” e kaya o koya, “ni sega soti ni dua na ka vei au na veika era kaya na kenadau me baleti kemuni mai na veika sa tukuna vei au na Turaga baleti kemuni.”¹

E sega ni gadreva na Kalou na vakadidike se veivakaduiduitaki me kilai iko. E sega ni raici iko o koya ni o dua na iwiliwili se dua na tamata e bikai tu ena veika e vakatokai iko kina “o vuravura”.

“E lomani iko o Koya sega ni baleta walega o cei o iko ena siga nikua ia sa baleta talega na tamata lagilagi ka rarama e rawa ka tu vei iko na kena gagadre mo vakakina,” e kaya o Peresitedi Dieter F. Uchtdorf, iKarua ni Daunivakasala ena Mataveiliutaki Taumada.²

E sega ga ni raici iko na Kalou, e lomani iko o Koya.

O via vorata na veimoici kei vuravura? Tekivu mo raici iko vaka e raici iko na Tamada Vakalomalagi kei ira na Nona italai digitaki. Vinakata mo basuraka na veivakaduiduitaki? Oqo na Gauna me da Tucake ka cakacakataka! Me vaka e dua na yabaki 12, e vakananumi rau na Nona itubutubu o Karisito “ni sa kilikili kei au meu tiko ena vale nei Tamaqau” (Luke 2:49).

E sega ni gone sara o Koya, sa vaka talega kina o iko. Na taro e tarava oqo: Ena rawa vakacava vei iko mo kilikili kei Tamamu Vakalomalagi?

Nona “bisinisi” e sa baleta na “tawa mate rawa kei na bula tawamudu ni tamata” (Mosese 1:39), sa rawa vei iko mo sa na baleta na bisinisi nei Tamamu ena nomu solia na nomu vinakaduadua mo rawata na kemui tuvaki dina ka mo yaco mo dua na dau vukei ira na tani me ra rawata na kedrai tuvaki dina.

Oqo na gauna sa gauna mo vakaitavitaki iko ena veika me baleta na nomu bula ena veisiga ni mataka. Na cava o rawa ni cakava ena gauna oqo me rawa kina ni o yacova yani na ituvaki e kila na Tamada Vakalomalagi ni o rawa ni yacova, e sega walega ena tawamudu ia ena bula talega oqo ?

O vinakata mo vakamau e valetabu? Digia oqo me savasava na nomu nanuma, vosa kei na ivalavala. O raici iko beka ni o vuli tiko ena dua na univesiti? Tauyavutaka e na kila matau ni vuli lesoni. O vinakata beka mo kaulotu? Tomana kina na nomu ivola ni vuli kosipeli na Vunautaka Noqu Kosipeli vakabibi na (wase 3). O vinakata beka mo rawa ni qarava e dua na matavuvale? Vulica mo rawa ni cakava ka maroroya e dua na ituvatuva vakailavo ena gauna saraga oqo.

E rawa talega ni o raica na veika e vakamarautaki iko ena gauna oqo. O taleitaka beka na vulici ni veika vakafika? Taba piano? Vola italanoa? Tomana tikoga! Raica na sala o rawa ni vakavinakataka: kalasi e koronivuli, veisisivi, vulitara, kei na so tale.

Vorata na veimoici ka basuka na veivakaduiduitaki! Lewa oqo na nomu veisiga ni mataka. Na cava o sa cakava tiko mo rawa ni yacova na nomu ituvaki vinaka duadua? Tukuna mai vei keitou ena nomu imeli mai ena liahona@ldschurch.org se biuta e dua na itukutuku ena tabana ni LDS Youth Facebook se Instagram.