iVaqa ni Veisiko
Ologi ira Era sa Lakosese Tu ena Loloma
Vulica ena masumasu na itukutuku oqo ka vakasaqara na veivakauqeti vakayalo mo kila na ka mo wasea. Ena vakarautaki ira vakacava na luve ni Kalou yalewa ki na veivakalougatataki ni bula tawamudu na kena kilai deivaki na inaki ni iSoqosoqo ni Veivukei?
“Na kena dina e sega ni dua na matavuvale e uasivi … ,” e tukuna o Peresitedi Dieter F. Uchtdorf, na iKarua ni Daunivakasala ena Mataveiliutaki Taumada. Se cava ga na leqa e sotava tiko nomu matavuvale, se cava ga mo cakava me wali kina, na itekivu kei na itinitini ni iwali na loloma cecere, na loloma savasava i Karisito.”1
Vei ira era sega ni vakaitavi sara vakataucoko ena kosipeli, e kaya o Linda K. Burton, Peresitedi vakacegu ni Soqosoqo ni Veivukei: “E lomani ira kece na Luvena na Tamada Vakalomalagi. … Veitalia na vanua cava ga era tiko kina—ena sala dodonu se sega—e vinakati ira lesu tale ki vale o Koya.”2
“Se vakacava sara na ituvaki ni nodra lakosese tu na [luvemu], … ni o vosa se veitalanoa kei ira, mo kakua ni cakava ena cudru, kakua ni cakava codrocodro tu, kakua ni cakava ena yalo ni veicavilaki,” e vakavulica o Peresitedi Joseph F. Smith (1838–1918). “Vosa vakavinaka vei ira.”3
E tokaruataka na idusidusi ni Vakabula o Elder Brent H. Nielson ena Vitusagavulu, vei ira na tiko vei ira e tini na tikini siliva ka qai vakayalia e dua: “Vakasaqara me yacova ni o sa kunea. Ni sa yali o koya, na luvemu tagane se yalewa, tacimu se ganemu, … ni da sa cakava oti na veika kece eda sa rawata, mo lomana na tamata oqori ena yalomu taucoko. …
“Me nodaru na ivakatakila me kilai kina na sala vinaka duadua mera vakalesui mai kina o ira era sa yali tu ena noda bula, ena gauna e gadrevi kina, me tu vei kedaru na vosota kei na loloma nei Tamadaru Vakalomalagi kei na Luvena, o Jisu Karisito, ena gauna vata daru loloma, vakararai tu, ka waraka tu kina na gone cidroi.”4
E kaya o Peresitedi Henry B. Eyring, ena Mataveiliutaki Taumada: “Au sa masu ena vakabauta me vakasaqara ka vakila e dua au lomana na kaukauwa ni Veisorovaki. Au a masu ena vakabauta ni ra na lako yani na agilosi tamata mera vukei ira, ka ra sa tadu mai.
“Sa vakarautaka na Kalou na sala me vakabulai ira kina na Luvena yadua.”5
iKuri ni iVolanikalou kei na iTukutuku
Vakabauta Matavuvale Veivukei