Taunuuga mo Faamanuiaga e Faavavau e Ala atu ia Tatou Feagaiga ma le Alii

Ou te faafetai i lo tatou Tama Faalelagi mo le atoatoa o Lona alofa mo Ana fanau uma.

E toatele tatou e feagai ma ni luitau mamafa i lenei olaga. O se tasi o na luitau sili o le pe a

to’esea se tasi e pele ia i tatou i le mavae ai i le tele o tausaga o ni manatuaga fiafia i le mafuta faatasi. E mafai ona lagona e peisea’i o se lē amiotonu mai le Atua, ae i le mea moni, o se suega mamalu i la le ola nei mai se Tama Faalelagi alofa o sē finagalo ia tatou tuputupu a’e i le faatuatua ina ia avea i tatou faapei o ia.

Na faaalia e lo tatou Alii o Iesu Keriso Lona finagalo i le perofeta o Iosefa Samita, o sē sa lagona le leai o se faamoemoe i ona mafatiaga tūgā a o nofo ai, faafalepuipuiina i le falepuipui o Liperate:

“Ma afai e lafo oe i totonu o le lua, po o lima o e fasioti tagata, ma tuu mai le faaiuga o le oti i ou luga; afai e lafo oe i le loloto; afai e taupulepule galulolo o le sami e faasaga mai ia te oe; afai e avea matagi malolosi ma ou fili; afai e faapotopoto e le lagi le pogisa, ma aufaatasi elemene uma e pupuni le ala; ma i luga o mea uma, afai e tatala faamaga lautele mai e auvae lava o seoli le gutu ia te oe, ia e iloa, lo’u atalii e, o nei mea uma e te maua ai le poto masani, ma o le a avea mo ou lelei.

“Na afio ifo le Atalii o le Tagata i lalo o i latou uma. Ua sili atu ea oe ia te ia?

“O lea, piimau i lou ala, ma o le a tumau le perisitua ia te oe; . . . aua le mata’u i mea e mafai ona fai e tagata, aua o le a faatasi le Atua ma oe e faavavau ma faavavau lava” (Mataupu Faavae ma Feagaiga 122:7–9).

I se asiasiga faaleauaunaga, na matou o ai i se aiga ua maliu le tane; sa auauna faamaoni o se taitai o le Ekalesia. O lana ava pele na matua tofotofoina ma ua oo ai lava ina leai sona faatuatua ma se naunautaiga e auai i le Ekalesia; ua mulimuli atu le fanau i lo latou tina i le lē toe toaaga mai. A o matou faatasi ai ma lenei aiga i le taeao o la matou asiasiga, e aofia ai afafine ma fanau a fanau, na matou faailoa atu le alofa o lo tatou Tama Faalelagi ma Iesu Keriso mo i latou taitoatasi.

Na matou faamanatu atu i lo matou tuafafine pele, feagaiga paia na la osia ma lana tane i le malumalu paia o le Alii i nai tausaga na muamua atu. O a matou upu faamafanafana, na lagolagoina e le mafutaga faamalie loto a le Agaga Paia ma lo matou alolofa faamaoni mo ia o ni ona tuagane i le talalelei, na faamaluluina ai lona loto ma ia olioli ai i manatuaga faamalie loto o lana faamauga i le malumalu na faatumulia ai lona mafaufau ma lona loto.

O a tatou sauniga ma feagaiga faalemalumalusa e loloto lo latou paia ma o ni faailoaga o le alofa o lo tatou Tama Faalelagi mo i tatou. O faamanuiaga mamalu ua folafola mai ia i tatou e ala mai i ia feagaiga paia, e pau le ala e oo mai ai lona faataunuuina pe a tatou tumau i le faamaoni se’ia o’o i le iuga.

Sa ou faasoa atu i le aiga, e lei mamao atu le to’esea ai o lo’u toalua pele, ma ua ou misia tele o ia i aso uma. O lenei tuugaogao tele o se satauro o le a ou tauaveina seia ou laasia atu le isi olaga ae sa ou faasoa atu ia i latou lo’u tumau e faaauau ona auauna atu i lo’u Faaola ma lou loto atoa se’ia o’o i le i’uga, i le iloa lea e i ai le aso o le a ou toe feiloai ai i lo’u toalua ma o le a ma nonofo ma ola faatasi i le olioli ma le fiafia e faavavau.

A o faaauau ona matou auauna atu i lenei aiga lelei, sa matou molimau atu e uiga i aao faaloaloa alofa mutimutivale o le Faaola, ma lana valaaulia ia i latou e toe foi mai i le ekalesia ma ia fiafia ai i faamanuiaga o le talalelei. Sa ou liliu atu i tagata taitoatasi o le aiga, amata atu i le tina ma faapea atu:

“E te talia lenei valaaulia mai lo tatou Faaola? Pe o le a e auai mai i sauniga faamanatuga i Aso Sa?”

Na talia e i latou taitoatasi le valaaulia. I le avea ai ma auauna lotomaualalo na faatumulia o matou loto i le olioli a o matou molimauina e nei agaga ua salamo le laasia o sitepu e o mai i le Faaola! Sa ou lagona le olioli o le Lagi faatasi ma matou ao matou mafuta faatasi ma i latou taitoatasi, i le tofotofoga faapea ma le faatuatua.

Ua le na’o le fausia o feagaiga paia, a o le faaauau ona usiusitai i ai lea e faamau atu ai i tatou i e pele ia i tatou. O le malosi o aafiaga o le Togiola o lo tatou Faaola, ma le fafagaina pea o lo tatou faatuatua e ala i le tatalo, suesueina tusitusiga paia ma le auauna atu o le a aumaia ia i tatou le malosi tatou te manaomia e feagai ai ma luitau o le olaga.

O loo manatu mai lo tatou Faaola o Iesu Keriso ia i latou uma o e o puapuagatia. Na te faaloaloa mai ia i tatou Lona aao o le alofa mutimutivale ma le alofa. Ou te valaaulia i latou uma o e o loo feagai ma luitau faigata i o latou olaga, po o a lava ia luitau, ina ia o mai i le Faaola ma ia olioli i le tausamaaga i Lana la’oai a o e taumafa i le faamanatuga i aso Sa taitasi, ma osia ma tausia feagaiga paia i Lona malumalu paia. A o e faia o lea, o le folafolaga lenei e mo oe:

“O le mea lea, aua le faavaivai i le faia o mea lelei, ona o lo o oulua faataatiaina le faavae o se . . . mafaufau malie; ma o e e loto malilie ma usiusitai o le a ‘aia le lelei o le laueleele o Siona i aso nei e gata ai” (Mataupu Faavae ma Feagaiga 64:33–34).

Ou te molimau atu o feagaiga tatou te osia i le papatisoga, pe a tatou mauaina le perisitua paia, ma feagaiga na e ausia i totonu o le malumalu e fesootai atu i faamanuiaga silisili ua saunia mo i tatou e le Alii. E ala atu i lo tatou usiusitai faamaoni i na feagaiga a o tatou tutumau ai se’ia o’o i le iuga, o le a tatou mauaina uma faamanuiaga folafolaina i le suafa paia o lo tatou Alii o Iesu Keriso, amene.