“I le aso 23 o Aperila 2011, sa Papatiso ai A’u.

“I le aso 26 na faatōina ai a’u e lo’u aiga.

“I le aso 27 na aveina a’u e tagata o le Ekalesia.”

O le faaaloalo ma fesootaiga a lona aiga ua le na’o le pau lena o mea ua māumau ina ua ia auai i Le Ekalesia a Iesu Keriso o le Au Paia o Aso e Gata Ai ae e ui i mea uma ua māumau a e sa ia faapea mai e aunoa ma se faalotolotolua: “O mea uma i lo’u olaga ua sili na lelei talu lo’u auai i le Ekalesia.”

“. . . a o le faamāumau lona ola ona o a’u ma le tala lelei, e faasaoina e ia” (Mareko 8:35).

Ina ua fesootai atu faifeautalai ia Neal e uiga i le aoaoina o le talalelei, na ia teena atoa i latou e aunoa ma se taumafaiga faaaloalo.

“Na ou maofa i o’u uiga sa faaalia i faifeautalai a e na le suia ai lo latou agaalofa ia te a’u,” na manatuaina e Neal e faapea, “Na’o na latou faapea mai ua toeitiiti ona ou malamalama lea i mea o loo latou taumafai e faasoa mai ma o le a ou taliaina.”

“I lena po na ou tatalo ai. A o o’u tatalo, na ou lagonaina se lagona ou te lei faalogoina muamua. Sa ou fesootai atu i faifeautalai, o le taimi la lea, na ou filifili ai e faalogo.”

Na tali agalelei e faifeautalai fesili uma a Neal a o latou aoaoina o ia i lesona ma i totonu o se taimi itiiti lava na papatisoina ai Neal. E ui ina vave le faaiuga e auai i le Ekalesia, a e sa le’i faigofie ma sa manaomia ai o ia e faia ni osigataulaga. Ina ua fesiligia o ia pe faapefea ona ia fai mai o lona auai i le Ekalesia ua sili ona lelei ai lona olaga, sa ia faapea mai:

“O le mea na ou faamāumauina e le mafai ona faatusalia lea i le mea na ou mauaina ina ua ou opomauina le talalelei. Ioe, na faato a’u e lo’u aiga, a e na ala atu i le talalelei ma le suiga na oo mai ai ia te a’u, i le taimi nei, ua latou faaaloalogia o’u talitonuga ma ua matou fevaaia’i i le tele o taimi.”

Na faaauau Neal e faapea, “O a matou fesootaiga ma o’u matua sa tele lava ina faavaivai loto i lo’u olaga atoa. I lo’u aoaoina o le talalelei ma le ola ai i ona mataupu faavae, ua mafai ai ona ou faamagaloina i latou, alofa atu ia i latou, vaai atu ia i latou e ala atu i fofoga ma foliga o le Faaola; ua sili ona matou felatai nei nai lo le taimi ua tuanai.”

Na faasoa mai e Neal se isi aafiaga i se faatalanoaga mo se avanoa faigaluega o se faatalanoaga sa sologa lelei, a e ina ua iloa e le falefaigaluega o ia o se Mamona, ma latou faapea mai ai e latou te le faafaigaluegaina se tasi e auai i se ekalesia e tapuai i se atua sese ma lē talitonu i le Tusi Paia.

“Na ou tali atu ma le agaalofa ma le toafimalie ma ta’u atu ia i latou, e tatou te lē tapuai atu i se Atua sese ma e tatou te talitonu i le Tusi Paia.” Sa toe faamatalaina e Neal faapea, “Na uunaia a’u e faailoa atu o loo aoao mai tatou e le Tusi Paia, e aua le faamasino atu i isi ma sa ou fesili atu ia i latou pe o latou lagonaina o le mea lea ua latou faia ia te ia i le taimi lea.”

Na faafaigaluega ai lava Neal i le taimi a lea.

Toetoe lava a misi lea avanoa faigaluega taua ona o lona auai i le Ekalesia e ono avea ma se ‘alofaga ma se mafuaaga o le faavaivai, ae peitai ia Neal, o le taunuuga na tupu mai o le faaiuga a nei tagata e faafaigaluega o ia, o se “Mamona” e latou te lei faia muamua, o se vavega lava lea!

Atonu o le ositaulaga silisili a Neal sa fai ina ia papatiso ai, o lona iloa o ia lava.

“Mai le taimi o o’u itiiti, sa ou talitonu sa tatau ona avea a’u o se teine.” Sa ia faasoa mai, “Ina ua avea au ma se tagata o le Ekalesia, na tatau ai loa ona ou taliaina po o ai moni lava a’u ma suia le ala sa ou ola ai. E lei faigofie lea a e ala atu i le tatalo ma le anapogi na faamalosia ai a’u.”

O lenei mataupu o le ituaiga o loo avea pea ma luitau mo Neal, a e e le fiu le Alii ia i tatou ma ua lagonaina e Neal le aafiaga a le Agaga Paia i le tele o taimi.

“Na ou faalogo i se lauga i le Konafesi e uiga i le salamo,” sa ia faapea mai ai. “I le vaiaso lena, na sili ai ona ou ma’i ma na leai ai sa’u filifiliga a e liliu atu i le Alii. Na ou iloa e leai se mea e maua mai i le olaga faalelalolagi ma sa ou mana’o ia i ai pea faatasi ma le Atua. Sa ou anapogi ma tatalo mo le malosi ma le taitaiga ma na i’u ai lava ina oti lo’u ulu uumi o se faailoga o la’u tautinoga.”

E ui i lona tuueseina atu o se mea sa loloto i lona loto ua sili ona faigata, o loo ia mauaina lona faasinomaga paia o se atalii moni faapelepele o le Atua. Faapei o le Faaola o Iesu Keriso, o se tasi o vaega o lena faasinomaga paia o se meaalofa ma le manaoga mo le aoao atu. Toe tasi le tausaga o Neal e aoga ai ona avea lea ma faiaoga o le aoga maualalo; a o ia aoga, e faigaluega o se faiaoga mo vasega faaopoopo.

O se tasi lenei o meaalofa a le agaga ua maua e Neal mo ia lava a o ia auauna ai ma le faamaoni o se sui o le YSA a le uarota.

Ina ua fesiligia pe o le a le mea o loo faaosofia ai o ia e faaauau pea faaleagaga i taimi faigata, e faapea mai o ia ma le faigofie, “Tatalo, o le tali lava e tasi, o le tatalo.”