O o Tatou Fale, O o Tatou Aiga
O Se Meaalofa o le Alofa
E alala le tusitala i Iuta, ISA.
A o faamanuiaina e lo’u toalua lo ma pepe teine, sa amata ona ou tau iloa atu le loloto ma le lautele o le meaalofa a le Tamā Faalelagi o le alofa—le perisitua.
Ata na tusia e ALE + ALE, Morgan Gaynin
O a’u o se tagata fou o le Ekalesia, o se avā fou, ma o lea ua avea nei ma se tina fou. O le Aso Sa anapogi, ma toeitiiti lava maua e le ma tama teine laitiiti se igoa ma se faamanuiaga. Ou te lei vaai lava i se faamanuiaga o se pepe aua sa matou nonofo i se uarota e toaitiiti aiga talavou sa i ai. Sa ou le iloa po o le a le mea e tupu ai. Ae sa ou lagonaina e ala i le Agaga o se mea e sili ona faapitoa ma taua lea.
O lo’u toalua, faatasi ma isi alii migao sa umia le perisitua, sa luelueina ma le faaeteete lo ma afafine laitiiti faapelepele. O le manaia o le Agaga na faatumulia ai a’u i le olioli. Sa tafe ifo loimata i ou alafau, ma sa soloai mai le anoano o lagona i lo’u mafaufau. Sa ou iloa sa faatoa amata ona ou tau iloa atu le loloto ma le lautele o le meaalofa matagofie o le alofa o le Tamā Faalelagi ia i tatou—o le perisitua.
Ina ua aoaoina a’u e faifeautalai i lesona, sa ou lagonaina lo latou faaaloalo tele i le tauaveina o le perisitua. Sa ou faalogo i ai i a latou upu ma a latou tatalo, e aofia ai ma le taimi na latou faamanuiaina ai a’u ia foia se luitau i le Upu o le Poto. Sa ou faalogoina o latou lima, na tuu malie i luga o lo’u ulu, na amata ona gatete a o latou tautalagia upu na ou iloa na mai le Alii—o upu o le alofa ma le faamalologa.
E lei umi ae ou papatiso, ma sa toe tuu foi lima o e umia le perisitua i luga o lo’u ulu. Sa faamauina a’u o se tagata o le Ekalesia a le Alii, ma na faaee mai le meaalofa o le Agaga Paia i o’u luga. Sa faamamaina a’u ma toe fanaufouina ai. Sa ou lagonaina le mana o le perisitua i lo’u tino atoa, ma mo le taimi muamua i lo’u olaga, na ou iloa ai le olioli.
E lei leva ona uma ona ou papatiso, ae ma faaipoipo loa ma lo’u toalua. O ona matua o ni tagata o le Ekalesia ma o lona aiga sa faaogatotonuina i le talalelei, ae sa ou iloaina sa lei mauaa lelei lana molimau. Ae ui i lea, sa ou le popole. Sa taumasuasua lo’u faatuatua laitiiti i le talitonu o le a lelei mea uma. O le a na ona ou alofa lava ia te ia ma onosai ma loto tatalo.
I masina na ou tauaveina ai le ma ulumatua, sa ou lagonaina e pei lava o tina uma—le matua latalata lava i la’u tamai pepe, ua matua tumu i le ofoofogia i lenei ola fou o i totonu ia te au. Ina ua fanau le ma tama teine, sa avea la’u sootaga ma ia ma se maea o le alofa, malosi ma matagofie.
Ae sa ou popole mo lo’u toalua. Na te lei maua le faamanuiaga o lenei latalata tele i le ma tama teine lea na ou olioli ai. Ioe sa ia alofa ia te ia, ae sa ou mafaufau ma popole pe o le a tupu se sootaga malosi i le va o ia ma lona afafine. Sa ou popole a o ou faaaluina le taimi e tausi ai o ia, faataele o ia, ma siiina o ia, ae o le tele o le taimi o lo’u toalua sa faaalu i le faigaluega e tausi ai lo matou aiga.
I le taimi lenei, i ni nai vaiaso talu ona fanau mai, sa matou i ai i le matou falesa. Sa fofola mai se vavega i luma o o’u mata ma lo’u loto. Sa ataata atu ma le lotomaualalo lo’u toalua le mautonu i ona uso sa i le lio, sa susulu ona mata ma loimatā. O le mea na oo i ai, sa tafe atu le alofa ma le lagolago mai i na uso ia te ia, a o tuu o latou lima i luga o tauau ma fesoasoani e luelue le ma pepe, ma faia ai se lio laitiiti na faatumulia i le alofa mamā ma le paia. A o amataina e lo’u toalua le faamanuiaga, sa ou faalogoina le gatete i lona leo, ma sa ou iloaina sa ia lagonaina le mana o le Alii ma le mamalu o le umiaina o Lana perisitua.
Sa ou lagonaina le mapuna ae o se alofa maoae mai ia te ia mo si a ma tama teine itiiti, ma na ou iloa sa taumafai malosi o ia e saunia ia lava e tuuina atu ia te ia le faamanuiaga sa fuafuaina e le Tamā Faalelagi mo ia. Sa atoatoa lo’u olioli ina ua ou iloaina ua ia lagonaina nei le sootaga mausali ma le ma tama teine. O se sootaga o le a le mafai lava ona faavaivaia.
Ua mavae le tele o tausaga talu mai lena aafiaga. E le mafaitaulia taimi sa ou molimauina ai ma lagonaina le mana ma le matagofie o le perisitua sa faaaogaina i le tele o itu, i le tele o nofoaga, ma mo le toatele o fanau a le Tama Faalelagi. Ua ou vaai o faaeeina mai sauniga faaola matagofie ma loto na faatumulia. Ua ou vaai i le faamamaina, faamaloloina, faamafanafanaina, ma le aoaoina atu. Ua ou vaaia ma lagonaina le siiesea o avega.
Ou te iloa ou te le i matua malamalama lava i le atoatoaga o le matagofie o le perisitua, ae o faamanuiaga uma o pepe ua ou vaai i ai ua faatumulia ai a’u i le maofa lava lea na ou lagonaina i le taimi o le faamanuiaga o la’u ulumatua. Ua ou maofa i le alofa o Tamā Faalelagi ua faaalia e ala i le faasoa mai o Lona mana ia i tatou, ma ua faatumulia a’u i le lotofaafetai e sili atu i upu ona o la’u molimau ia te Ia, Lona Alo Pele, ma la tatou talalelei matagofie toefuataiina.