Aveesea o le Mamafa Mai le Sailiga o se Soa Faavavau

I se tasi o konafesi i Polani i le 2010, sa ou feiloai ai ia Radu. Sa sau o ia mai Romania. Sa ma talanoa puupuu, ae sa lei umi ae alu i lana misiona ma na ma le toe feiloai seia oo i le isi konafesi a le YSA i le tolu tausaga mulimuli ane. O iina sa maua ai le taimi e ma te matua faamasani ai ma iloa teisi e le tasi le isi, ae sa ou sauni foi ou te alu i la’u misiona i se masina mulimuli ane. Sa faamanuia mai Radu ia te a’u i mea uma e sili ona lelei ma fai mai, “Ia ta fesootai pea.” Ou te lei manatu o le a ia faia moni, ae na ia faia lava. Sa ia tusi mai ia te au tusi i le taimi atoa o la’u misiona. Sa leai se uiga faamama’i i ana tusi, ae sa avea o ia ma se tasi o a’u uo pele. Ma sa ou matua fiafia lava i lona faaaloalo na i ai mo a’u ma mo le galuega faafaifeautalai i le tulaga lautele.

Ina ua ou toe foi mai i le fale, sa ma matua fiafia lava ma Radu e faamasani ma iloa lelei e le tasi le isi—ua iu lava ina mafai nei ona ma faia i le mavae ai o le tele o tausaga! Sa ma pikiina se nofoaga taugofie ma te feiloai ai (i Peleseuma i le taimi lena) ina ia ma faatasi ai mo sina taimi. Sa ma talatalanoa ma talatalanoa ma talatalanoa atili.

Ma te lei toe tuua lava se mamafa i le ma mafutaga. Sa ma taulai atu i le fausiaina o se faigauo ma tau lava ina iloa lelei e le tasi le isi. Sa ma matua fiafia tele faatasi i taimi uma, ae sa i ai foi a ma’ua talanoaga anoa ma loloto e uiga i mea e sili ona taua. I le isi taimi na sosoo ai, na tuputupu ae ai le malosi o le ma faigauo. Sa toeitiiti ma Skype i aso uma, ma i le aluga o taimi na amata ai ona fai faatasi a ma’ua tatalo i po uma. Na iu lava ina amata ona asiasi le isi i le atunuu o le isi e va va i nai masina.

E lei leva, ae amata ona ou lagonaina le popole aua na ou lagonaina e pei ua atiina ae le ma faigauo i se mea e sili atu. Ae o ia sa sau mai Romania! Ou te lei manao ou te i ai i se mafutaga vavamamao aua o se mafutaga e mafai ona oo atu i le faaipoipoga, o lona uiga e tatau i se tasi o i maua ona siitia atu i se isi atunuu. Sa ou lagona ou te le i saunia mo lena mea.

I se tasi aso a o iloga lo’u lagonaina o lo’u popole, na faamanatu mai ai e Radu ia te au se mataupu faavae faigofie ae mamana. Sa ia fai mai, “Sei o ta tatalo e uiga i la ta’ua mafutaga ma vaai pe faapeī o ta lagona.”

Sa ou le iloa pe aisea na ou le mafaufau muamua ai e tatalo e uiga i le ma mafutaga. Ae o le fautuaga sili lena na ou mauaina i lena taimi. O lea na ou tatalo ai mo le taitaiga.

Ou te lei faamoemoeina ni tali patino i lena taimi, ae sa ou filifili e agai pea i luma ma le faamasani lelei ia Radu. Sa ou faamoemoe o le a tuuina mai e le Tamā Faalelagi se lapataiga ia te au pe afai o le ma mafutaga e le o se mea e tatau ona ou faaauauina. Ae i le aluga o taimi, o le tali sa ou talosaga atu ai na oo mai lava. Sa faia ni a’u talanoaga ma lo’u aiga ma uo e uiga ia Radu, ma i talanoaga uma lava sa faamautinoaina mai ai ia te au sa ou agai i le ala sa’o.

E le i umi ae ou iloaina se mea malie. Ina ua maea ai se isi foi valaau maoae i le Skype ma Radu i se tasi po, sa ou faapea ifo ia te au lava, “O ia moni lava o le uo aupito sili ona lelei ua ou maua.” E fia avea a’u ma ana uo e faavavau!” O le taimi la lena na taia ai a’u. I le taimi lava lena sa tali mai ai se leo i lo’u ulu i la’u lava tala, “Ia ua tatau la ona e faaipoipo ia te ia!” Sa ou iloa sa ataata mai Tamā Faalelagi i le ma mafutaga ma Radu. Sa mafai ona ou iloa atu o ia o la’u uo sili lava ma e mafai ona ma fiafia faatasi.

O lea na ou siitia atu ai i Romania ma faaipoipo atu ia Radu. Sa le’i i ai lava so’u manatu i lo’u mafaufau o le a ou iu ane i Romania. Ae ua fa nei tausaga o ma faaipoipo, ma ua ma maua se tama teine aulelei, o Amelia.

Ou te iloa le mea o loo e mafaufau i ai—Ua na o a’u o se tasi o talavou nofofua matutua lea sa feiloai i la’u “paaga moni” i se konafesi a le YSA ma na taunuu mea uma e aunoa ma se taumafaiga. Ae e le moni lena mea! O le mafuaaga ou te ta’u atu ai ia te oe lenei tala, ina ia taofi ai lou faatigainaina o oe lava e sue lau soa faavavau ae nai lo lena ia tuu atu i le Atua e taialaina oe.

Pe na ou alu i na konafesi a le YSA e sue ai sa’u tane? Leai.

Pe na ou mafaufau o se tasi o alii sa ou feiloai i ai o le a avea ma a’u tane? E le moni atoatoa.

Nai lo lena, sa ou aveesea le mamafa mai le sailiga o se isi sa ou manao ou te faaipoipo i ai, ae sa na o lo’u alu lava i nei konafesi e fesootai ai ma isi ma fausia ni faauoga—o le mea tonu lava lena sa ma faia ma Radu mai le amataga.

O le faamalosia e sue a tatou soa faavavau i le vave e mafai ai e mafai ona moni lava i nisi taimi. Ae e leai se taimi faatapulaa i mafutaga e faavavau. E leai se manaomia e matua faamamafa ai fua. O le olaga e le faatatau i le ia faaipoipoina, ae ia avea i tatou lava ma ituaiga tagata sili ona lelei ma tuu atu i le Atua e faatino Lana fuafuaga i o tatou olaga. Ioe, e tatau ona tatou o uma i ai, ia aliali i ai, feiloai atu i tagata, fai ni uo fou, ma o ese atu ma o tatou siosiomaga ua lagolelei ma mafanafana ai. Ae e tatau ona tatou faia ma le manatu faapea, “O le a ou maua le fiafia ma feiloai atu i ni uo lelei” nai lo le “E tatau ona pupula o’u mata ia iloa ai ‘le tasi’ pe o le a faaletonu uma ai la’u fuafuaga atoa o le olaga!”

O se tasi o mea na ta’u mai e Radu ia te au a o ma faamau, e ui lava e masani lava ona ia lagonaina sina atuatuvale pe a latalata i teine e fiafia i ai, ae na te le i lagona lava faapena i le faatasi ai ma a’u. Sa ia fai mai ona o le ma faigauo, sa ia lagonaina i taimi uma le toamalie ma e pei e mafai ona ia faia mea e fiafia lava e fai.

O le mea lea, ia vaavaai ai mo tagata lelei e siomia ai oe lava ma fiafia i le mea o loo e i ai i le taimi lenei. Aua o le mea moni, a tuu lou atuatuvale tele ae tau o le filifili e fausia ni faauoga ma aoao e alofa ia te oe lava ma le mea o loo e i ai, o le taimi lena o le a sili atu ai ona faafiafiaina i le olaga.

Ma te le atoatoa ma Radu. Ma te lei saili moni lava mo le tagata “atoatoa”—sa na ona ma ola lava i o ma’ua lava tagata moni. O le mea ua ou maitauina, o lou lava tagata moni ma le auala e te ola ai o le mea sili lena ona manaia i isi. Pe a e taumafai e mulimuli ia Iesu Keriso, o le a tosina atu ia te oe isi o e o loo faia foi le mea sili e mulimuli ai ia te Ia.

Ua ou aoao foi a oo ina tatou lelei atu ma maua le faatuatua atoatoa o le Atua e pule, o le a tatou valaaulia Lona aao i o tatou olaga—ma pe a tatou iloa Lona aao, e leai se mea e tatau ona matatau ai mo le lumanai. Manatua le mea na aoao atu e le Alii ia Nifae: “Ma o le a avea foi Aʼu ma o outou sulu i le vao; ma o le a Ou saunia le ala i o outou luma, e tusa ma tou tausiga o aʼu poloaiga; o le mea lea, afai tou te tausia aʼu poloaiga, o le a taitaia outou agai i le laueleele na folafolaina; ma o le a outou iloa ai o aʼu lava ua taitaia outou” (1 Nifae 17:13).

Sa le i faapea sa tatau ona tatou faamamafa pea lava pea i o tatou luga le le ausia o ni faamoemoega patino po o ni mea taua i o tatou lava taimi tuupoina. E moni lava, e ese le taimi a le Tamā Faalelagi nai lo o tatou—e faavavau. O loo i ai Sana fuafuaga mo i tatou e faataunuu ai faamanuiaga uma tatou te sailia. Ma a tatou faia le mea sili tatou te mafaia e faatuatuaina ai Lana fuafuaga ma maua le faamalieina i soo se tulaga tatou te oo i ai, o le taimi lena o le a tatou maua ai le fiafia moni. O Lana fuafuaga o le a sili atu lava ona lelei nai lo la tatou fuafuaga mo i tatou lava.