Pe Ua Saunia ea La’u Tama e i ai se Manaoga Faapitoa e Papatisoina?

Saunia e Katie Edna Steed

E alala le tusitala i Iuta, ISA.

Ua lata mai le aso fanau lona valu o lo ma atalii. Ae e faapefea ona ma mautinoa ua saunia o ia mo le papatisoga?

Ata

feet in baptismal font

Ata na pueina e Randy Collier

O le ma atalii o Tavita, o le a atoa le valu i le itiiti ifo ma se tausaga. Sa ma mananao ma lo’u toalua ina ia saunia o ia e osia feagaiga paia o le papatisoga. O lona uiga o le faia o mea e pei o le faitauina o le Tusi a Mamona, suesueina o feagaiga o le papatisoga, ma le iloiloina o fesili o le faatalanoaga o le papatisoga. Sa matou faia nei mea uma muamua ma le tuafafine matua o Tavita, ae o Tavita e aafia i le ma’i o le otesime [autism], o le filifili la pe tatau ona papatiso o ia sa le o se tulaga tuusao mo ma’ua.

Ioe, sa ma iloa le mea e tatau ona fai e fesoasoani ai e saunia o ia, ae o le faamalumalu mai i luga o nei sauniuniga uma o fesili: Pe tatau ea ona papatisoina ia Tavita? Pe sa saunia ea o ia? Pe na manaomia ea ona papatisoina o ia? Pe na malamalama o ia i le mea o le a ia tuuto i ai? E mafai faapefea ona ma iloa ma le mautinoa sa ma faia le mea sao?

E pei o le toatele o matua o loo i ai se tamaitiiti e le atoatoa le malosi, o nei fesili na taitaia i maua i se faigamalaga o le sailia o malamalamaaga faaleaoaoga faavae ma faaaliga faaletagata lava ia.

O le Matua e Tali Atu Ai e faatusatusa i le Tali Atu o le Tagata Mo Ia Lava

O le Mataupu Faavae ma Feagaiga 68:27 ua faitauina, “Ma ia papatisoina a latou fanau mo le faamagaloina o a latou agasala pe a valu tausaga le matutua, ma maua le faaeega o lima.

Afai sa tatou faalagolago atoa i lenei mau, o le a tatou faaiu ai e faapea, o soo se tagata lava e valu tausaga le matua ua saunia e papatiso. Ae ui i lea, o loo aoao mai foi tusitusiga paia:

“Ua togiolaina tamaiti laiti … e ala i lo’u Atalii e Toatasi na Fanaua;

“O le mea lea, e lē mafai ona agasala i latou … sei oo ina amata ona tali mai i latou i o’u luma” (Mataupu Faavae ma Feagaiga 29:46–47; tagai foi Moronae 8:7–22).

Pe faapefea ona ma malamalama ma lo’u toalua pe mafai ona tali atu Tavita? Sa faaauau pea ona ma sailiili.

Sa ma aoao mai aiaiga faavae a le Ekalesia e faapea, o le tali atu o le tagata e faalagolago lea i ona moomooga ma lona tulaga o le malamalama: Afai sa agavaa Tavita ma manao e papatiso ma faaalia e mafai ona tali atu o ia, e le tatau ona ma taofia le papatisoga mai ia te ia.

Na ma iloa foi afai e faatapulaa e le manaoga faapitoa o Tavita lona gafatia faaleatamai e pei o se tamaitiiti laitiiti, o le a le mafai ona tali atu o ia i faamasinoga ma o le a le manaomia foi ni sauniga faaola (tagai i le Tusitaulima 1: Peresitene o Siteki ma Epikopo [2010], 16.1.8; o tagata o le Ekalesia e i ai fesili e uiga i aiaiga faavae a le Ekalesia e mafai ona feutagai ma o latou epikopo).

O le gafatia faaleatamai o Tavita sa o se tulaga masani moni lava. Ae peitai, sa ou fesiligia pea pe na oo Tavita i se tulaga talafeagai e tali atu ai mo ia lava. Sa faaauau pea ona ou sailiili ma le loto tatalo ma le faamoemoe mo se taitaiga o le a aumaia ai ia te au le filemu.

Manaoga Faapitoa ma le Mamā

Ou te iloa ni matua e i ai se tamaitiiti e i ai manaoga faapitoa, o e e maua le faamafanafanaga tele mai le faitauina faapea, o i latou o e ui atu i le olaga faaletino e aunoa ma le mafai ona tali atu e faatumauina le tulaga o le ta’umamāina: “Ua ola fanau laiti uma ia Keriso. … Aua e oo mai le mana o le togiola i luga o i latou uma o e ua aunoa ma le tulafono; … ma o e faapena ua le aoga i ai le papatisoga” (Moronae 8:22).

Sa faamatalaina foi e le Perofeta o Iosefa Samita le tulaga o tamaiti o e maliliu ma e lei mafai ona tali atu: “Ma sa ou vaai foi o tamaiti uma o e e maliliu ae lei oo atu i latou i tausaga e tali mai ai ua faaolaina i le malo selesitila o le lagi” (Mataupu Faavae ma Feagaiga 137:10).

Ou te iloa mo nei tagata taitoatasi, e le manaomia le papatisoga i lenei olaga. Sa ou iloaina foi o le a fesoasoani mai le Atua ia i maua ia iloa le mea e sili ona lelei mo Tavita.

Sailia o le Taitaiga Faalelagi

Mo i latou e i ai manaoga faapitoa, o loo i ai se eseesega tele o gafatia. O le toatele o tagata e i ai manaoga faapitoa e oo le gafatia i luga atu o le valu tausaga ma e mafai ona papatisoina ma faamauina pe afai e mafai ona latou tali atu (tagai i le Tusitaulima 1, 16.3.5). O isi tagata o le a le mafai ona tali atu. Sa ou iloaina e mafai ona matou talanoa ma lo’u toalua ma le ma atalii, ma le Atua, ma le matou epikopo, o le o loo tu o se “faamasino i Isaraelu,” e fesoasoani e faia le faaiuga musuia e faatatau i le saunia o Tavita ina ia papatisoina (tagai Mataupu Faavae ma Feagaiga 107:76).

O upu nei mai ia Alema na aumaia ia te a’u le filemu sili: “O lenei foi, ona ua outou mananao e o mai i le lafu a le Atua, ma ta’ua o ona tagata, … se a se mea tou te tetee ai i le papatisoina i le suafa o le Alii, o se molimau i ona luma ua outou ulu atu i se feagaiga faatasi ma ia, o le a outou auauna atu ia te ia ma tausi ana poloaiga, ina ia mafai ona liligi atili tele mai e ia lona Agaga i luga o outou?” (Mosaea 18:8, 10).

I le maea ai o a matou sauniuniga uma, o a matou lesona uma i le fale ma le Peraimeri, sa amata ona ou tuuina atu ia Tavita ni fesili sa ou iloaina o le a fesiligia ai o ia i lana faatalanoaga mo le papatisoga.

O nisi taimi o ana tali na faaalia ai le malamalama, ae o nisi taimi na te le iloa pe faapefea ona tali i ai. Sa ou mafaufau pe o ma faia ea le mea sao.

Mulimuli ane, sa musumusu mai le Agaga i lo’u loto, “Aisea e te le fesili ai ia Tavita po o le a sona manatu?”

Sa ou liliu atu ia Tavita ma fesili i ai, “Tavita, e te fia papatiso?”

Sa ia tilotilo sao mai ia te au ma fai mai, “Ioe!”

Ina ua ou fesili atu ia te ia pe aisea na manao ai e papatiso, na ia fai mai, “Ia faapei o Iesu.”

Sa faatumulia a’u i le filemu ma le taialaina. Sa ou iloaina i lena taimi e tusa lava pe le i malamalama atoatoa ia Tavita i fesili uma, ae sa saunia lava o ia e papatiso ma faamauina. Sa ia iloa le mea na tatau ona ia iloa, ma o le mea silisili ona taua, sa ia iloa lava lona manao e ulu atu i le malo o le Atua e ala i le papatisoga.

O le aso na papatiso ma faamauina ai Tavita o se tagata o Le Ekalesia a Iesu Keriso o le Au Paia o Aso e Gata Ai, sa tumu i le alofa, faauo, ma le filemu. Sa faatumulia le potu i aiga, tagata o le uarota, uo i le aoga, faapea foi ma faiaoga mai le aoga a Tavita. O le faataitaiga na faatuina e Tavita i lena aso o le filifili e mulimuli ia Iesu ma papatisoina, o se faataitaiga na uunaia ai le toatele mo le lelei. Ua malosi atu lo matou aiga aua sa matou maua le avanoa e aoao ai i le ala o le a faaalia mai ai galuega a le Atua e ala i le ma atalii, o Tavita (tagai i le Ioane 9:3).

E Mafai Faapefea Ona Tatou Fesoasoani i Tagata o le Ekalesia e i ai Manaoga Faapitoa?

A o mulimuli ia taitai ma le alofa i le faataitaiga a le Faaola o le fesoasoani atu i isi ia lagona le aofia ai, o le a lagonaina e tagata o le Ekalesia e i ai manaoga faapitoa ma o latou aiga Lona alofa ma malamalama i lo latou nofoaga taua i totonu o le tino o Keriso (tagai 1 Korinito 12:12, 18). A o e taitai ma auauna atu, mafaufau i mea nei:

Aua le fefe e fesili atu. O nisi taimi tatou te fefefe ai e talanoaina ni eseesega, ae a o e fai atu ma le faaaloalo ni fesili, o le a talisapaia e tagata taitoatasi lou manao faamaoni ia malamalama i o latou tulaga. Fai fesili i se auala alofa, e pei o le: “E mafai faapefea ona ou fesoasoani ia atili anoa ou aafiaga i le lotu?” O tagata e i ai manaoga faapitoa ma o latou aiga e masani lava o punaoa sili ia i o latou manaoga faapitoa ma e mafai ona ta’uina atu le mea e manaomia ai le fesoasoani.
Faafaileleina le agaga malamalama. A uma ona feutagai ma tagata e uiga i o latou manaoga faapitoa, ia talanoaina ma i latou pe lelei o latou lagona i lou faasoa atu i isi. Ma, pe a talafeagai ai, fesoasoani i taitai o le uarota ma isi tagata o le Au Paia ia malamalama i manaoga faapitoa ma manaoga o tagata taitoatasi. E mafai e lenei mea ona faatupuina le agaalofa ma le malamalama sili atu faapea foi ma musumusuga i le auala e tuuina atu ai le lagolago.
Saunia ni fetuunaiga. E tele ni fetuunaiga faigofie e mafai ona e faia e siitia ai le aoaoina ma le auai ai mo tagata uma, e aofia ai le faatagaina o se taimi faaopoopo e tali atu ai i fesili, ma faaaoga ai ia faamatalaga pupuu i vitio, ma faatagaina ai i latou e i ai tapulaa i le faalogo po o le vaai e nonofo ai i le mea e mafai ona latou faalogo pe iloa lelei atu ai, ma le faaaogaina o ala o faasalalauga eseese e tuuina atu ai lesona. E mafai foi ona e talanoa i se tagata tomai faapitoa o le uarota po o le siteki mo manaoga faapitoa e uiga i ni fetuunaiga fitoitonu e mafai ona e faia.
Fatu ni avanoa o auaunaga. Feiloai ma tagata taitoatasi ma tagata e tausia i latou ina ia saili ai po o a o latou tomai ma taleni. Ona maitau lea ma le agaga tatalo ni auala anoa mo i latou e auauna atu ai. E tofu tagata uma ma se mea e mafai ona latou saofaga ai i le galuega.
Aapa atu ma le alofa. Saili e faataitai i le taliaina o soo se tagata i upu a Elder Jeffrey R. Holland: “I le avea ai ma tagata o le Ekalesia, ua tatou i ai uma i lenei malaga. … Po o le a lava lou tulaga, matou te taliaina oe” (“O Mea Ou Te Manao ia Iloa e Tagata Fou Uma o le Ekalesia— ma Manatua e Tagata ua Leva I le Ekalesia,” Liahona, Oke. 2006, 10). Mai punaoa uma lava a le Ekalesia, o se tasi e silisili ona maoae o tagata taitoatasi ia e auauna atu le tasi i le isi i le alofa ma le faauo.