Tamaitai Talavou: Faamanatuina o le 150 Tausaga
O le faalapotopotoga a Tamaitai Talavou ua atoa i le 150 i le tausaga lenei, ma ua oo i le taimi e faamanatu ai! Siaki ane mea moni nei e uiga i le auala ua tupu ae ai le faalapotopotoga mai le 1870 e oo mai i le asō, po o a mea o loo faia e talavou e pei o outou i Tamaitai Talavou i le taimi lenei, ma pe mafai faapefea ona musuia outou e tamaitai i totonu o le talafaasolopito o e na faaalia le lototetele ma le faatuatua.
1870–1920
Igoa: O le Matagaluega a Tamaitai Talavou o le Asosi Toefaalelei Felagolagomai a Tamaitai sa faatulagaina aloaia i le aso 27 o Me 1870, i lalo o le taitaiga a Polika Iaga.1 Na suia le igoa i le Asosi o le Faaleleia Tutusa o Tamaitai Talavou i le 1877.2
Faalapotopotoga ma Vasega: O le polokalama a Teine o le Ofagapi sa faatulagaina o se polokalama o le taumafanafana mo teine e 14 ma matutua atu.
Faaleleia ma le Faailoa Aloaiaina: Ua lolomiina le Tusitaulima a le Ofagapi i le 1915, ua otooto mai ai “mataupu” e fitu mo le faaleleia faaletagata lava ia: Tapuaiga, Aiga, Soifua Maloloina, Faatufugaga i Totonu o le Aiga, Gaoioiga Faamalositino, Pisinisi, ma le Auaunaga Faalauaitele.3
Mekasini ma Apitalaaga: O le lomiga muamua o le Young Woman’s Journal ua lolomiina i le 1889.4 E toatele Asosi o le Faaleleia Tutusa (po o MIA) i le lotoifale sa atinaeina a latou lava nusipepa sa tusitusilima ma sa na o le tasi pe lua kopi sa pasi faasolo i teine e faitau.
1920–1970
Igoa: Ua suia le Asosi o le Faaleleia Tutusa o Tamaitai Talavou i le Asosi o le Faaleleia Tutusa o Tamaitai Talavou i le 1934.5
Faalapotopotoga ma Vasega: E lua vasega, Teine Ofagapi mo teine laiti ma le Kilina mo teine matutua atu. Ua suia le matua e ulufale ai i le polokalama mai le 14 i le 12. I le 1950, ua faalauiloa mai le vasega a le Maea Meite.
Faaleleia ma le Faailoa Aloaiaina: O le faailoga aloaia o le Kilina Auro e faailoga ai le tulaga sili ona maualuga e mafai e tamaitai talavou ona ausia i le polokalama.
Mekasini ma Apitalaaga: O le Young Woman’s Journal ua tuu faatasi ma le mekasini o le Improvement Era mo le autalavou uma i le 1929.6
1970–2019
Igoa: Ua suia le Asosi o le Faaleleia Tutusa o Tamaitai Talavou i le Faalapotopotoga o Tamaitai Talavou i le 1974.7
Faalapotopotoga ma Vasega: E oo ane i le 1972, o le Faalapotopotoga a Tamaitai Talavou ua tolu ona vasega: Ofagapi (12–13 tausaga), Maea Meite (14 –15 tausaga), ma le Lora (16–17 tausaga). Ua amata i le 2019, e ulufale atu tamaitai talavou i le Ofagapi ia Ianuari o le tausaga e atoa i ai lo latou 12.
Faaleleia ma le Faailoa Aloaiaina: O le polokalama o le Alualu i Luma Faaletagata Lava Ia ma le pine auro (medallion) ua faalauiloa mai i le 1977. O tulaga faatauaina a Tamaitai Talavou o le Faatuatua, Amio Atua, Taua o le Tagata Lava Ia, Poto, Filifiliga ma le Tali Atu Mo A’u Lava, Galuega Lelei, ma le Amio Sa’o ua faaopoopoina i le 1987.8 Ua faaopoopo le Mamā i tulaga faatauaina i le 2008.9
Mekasini ma Apitalaaga: O le mekasini o le New Era mo le autalavou ua amata ona lolomiina i le gagana Peretania i le 1971, ae o le Liahona ua tuuina atu ai tusiga mo le autalavou i le tele o gagana.10
2020
Igoa: Ua tumau le igoa o le faalapotopotoga a Tamaitai Talavou.
Faalapotopotoga ma Vasega: O vasega ua faatulaga i uarota po o paranesi taitasi e tusa ai ma ona manaoga ma iloa lava i le faailoga autasi “Tamaitai Talavou” (mo se faataitaiga, “Tamaitai Talavou 12,” “Tamaitai Talavou 12–15,” po o le na o le “Tamaitai Talavou” pe afai latou te faapotopoto faatasi uma).
Faaleleia ma le Faailoa Aloaiaina: Ua suitulaga le Tamaiti ma Talavou i le polokalama Alualu i Luma o le Tagata Lava Ia. Ua uunaia e le polokalama fou ni avanoa patino e tuputupu ae ai i vaega o Atinaega Faaletagata Lava Ia, Aoaoina o le Talalelei, ma le Auaunaga ma Gaoioiga.11
Mekasini ma Apitalaaga: O le mekasini o le New Era mo le autalavou ua latalata i le faailogaina o lona 50 tausaga.
Ata o se tamaitai talavou o loo asoaina se pine auro (medallion) o le Alualu i Luma Faaletagata Lava Ia na saunia e Alicia Cerva