Aau e Pei o se Solofanuasami

Ata

Swimming Like a Seahorse

Na sioa atu Ropini i totonu o le vai taele. Sa ia taumafai e aua le mafaufau po o le a le mamao e ao ona aau ai o ia. Pau le mea na taua o le mauaina o le pine. O le pine seepferdchen (solofanuasami) o le a faaali ai i tagata uma i Siamani sa ia iloa le auala e aau ai na o ia lava.

E mafai ona ou faia lenei mea! Na manatu ai Ropini. Sa manava loloa o ia ma oso loa.

PISI!

Sa matua manaia le faalogoina o le malū o le vai i lena aso vevela.

Aau ia tasi le mita i le taimi, sa fai atu Tama ia te ia. Aua le mafaufau i le 25 mita atoa i le taimi e tasi.

Sa punou pea i lalo le ulu o Ropini. Sa ia sii i luga ona lima ma ona vae i le auala sa ia faataitai ai mo le tele o masina. Pe na tai tolu lava sekone ma manu a’e i luga mo le ea.

Kiki. Aau. Kiki. Aau.

Na faafuasei lava, ona ili e le faiaoga aau lana faaili. Sa ea ae i luga Ropini i le te’i.

“Seki au faiga,” o le tala lea a lona faiaoga.

Ua ia mauaina!

Na ata Ropini ma ta ni nai ana fiti i lalo o le vai e patipatia ai. O ia o se solofanuasami!

Ina ua oo atu Ropini i le fale, sa faatopetope atu o ia e sue Tama.

“Tama, vaai!”

Na tuu i lalo e le tamā o Ropini lana samala. O le taimi lava na vaai ai e Tama i le pine seepferdchen, sa matua ataata o ia.

“I lau taumafaiga muamua?” Sa matua fusi e Tama ia Ropini. “O le a le mea e te manao e fai e faailoga ai?”

Sa mafaufau Ropini mo sina sekone. “O le mea e sili ona ou manao i ai o le ta o i le vai. Ou te manao e faaali atu ia te oe le mea e mafai ona ou faia.”

Sa ataata atili Tama. “Ia o lena mea o le a avea ma patipatiga mo i taua uma. O le taimi lava e maua ai sina o’u taimi, o le a ta o loa.”

Sa tu’i e Ropini lana moto i le ea. Sa le mafai ona tatali e ia i le fia su’i o lana pine i luga o lona ofutaele ma o loa ma Tama e feausi.

Na mavae ni nai aso. Sa fesili pea Ropini e uiga i le vaitaele, ae sa i ai lava se mea sa faalavelave ai. E foliga mai sa pisi lava Tama i taimi uma.

I se tasi taeao sa tootuli ai Ropini i autafa o lona moega e tatalo. I le faaiuga o le tatalo, sa ia faaopoopo atu se isi mea se tasi.

“Faamolemole tuu atu i lo’u tama se taimi faasili ina ia mafai ai ona ma o i le vaitaele. I le suafa o Iesu Keriso, amene.”

E pupula loa mata o Ropini, ae faalogo loa o tuitui mai Tama i le faitotoa.

“Ta o loa i le vaitaele. Ou te fia vaai i lau faatinoga!”

Na matuai ofo Ropini. “Tama! O le a e le talitonu i le mea lenei. Sa faatoa uma lava na ou tatalo ia maua sou taimi faasili ia mafai ai ona ta o.”

Sa piilima Tama ma faalagolago i le gutu o le faitotoa. “Ia, pe le malie ea lena mea? Vaai oe, sa ou faato’a faalogo atu lava i se musumusuga filemu ma manino mai le Agaga Paia ua tatau ona ou alu e ave oe i le vaitaele. E foliga mai ua tatau loa ona ta o!”

Sa matua maoae le manaia o le malaga. Sa faaali atu e Ropini ia Tama le ala e mafai ona ia aau ai i le 25 mita e aunoa ma se malolo. Sa faagaeetia lava Tama. Ma sa faagaeetia foi Ropini i tagafiti a Tama i lalo i le vai. E mafai ona fai sosoo lava le lima a Tama!

“Ou te fiafia na tuuina atu e le Tamā Faalelagi ia te oe sina taimi faasili i le asō,” o le tala lea a Ropini.

“O le mea moni lava,” o le tala lea a Tama, “ou te manatu sa ou tuu lava a’u ia ou pisi tele. Ou te manatu sa faamanatu mai e le Agaga Paia ia te au e tatau ona tatou faaavanoa le taimi mo le tasi ma le isi, a ea? Ou te folafola atu o le a faia la’u vaega.

Sa ataata Ropini. “Ma a’u foi!”

Na nunumi mata o Tama i lana ataata. “Toe tasi a le mea. Pe ua ou ta’u atu ea ia te oe ou te le i faiaina lava i se tauga pisipisi?”

Na toe ataata atu Ropini. “E lei uma lelei le aso!” ●