O Le Filifiliga o le Papatisoga
Talu ai nei, sa ma taumafai ai ma lo’u toalua e filifili pe ua saunia lo ma atalii e fitu tausaga e papatiso. E maua o ia i le ma’i o le faigata ona fegalegaleai ma tautala [autism], o lea sa ma le mautinoa ai pe na lava lona malamalama i ai ina ia tali atu ai mo lenei faaiuga. I le itulau e 18, e mafai ona e faitau ai e uiga i le tele o mea sa ma mafaufau i ai a o ma taumafai e fai le filifiliga sao.
I le avea ai ma tagata tomai faapitoa i tulaga o le le atoatoa o le malosi a le Ekalesia, ou te iloa e toatele tagata lelei e i ai manaoga faapitoa e mananao ia lagona le faaaofia ai i le lotu. I o tatou uso ma tuagane uma o e ua i ai se tasi o ituaiga o manaoga faapitoa po o se isi foi ma o latou aiga, matou te faapea atu: Matou te alolofa ia te outou, ma matou te mananao matou te iloa pe faapefea ona auauna lelei atu ia te outou.
O nisi o tusiga o lenei lomiga e fesoasoani ia i tatou e malamalama ai i manaoga faapitoa ma auala tatou te faafaileleina ai le faaaofiaga i totonu o a tatou uarota ma alalafaga:
-
Itulau 28: O Elder Paul B. Pieper o le Fitugafulu ma lona faletua, o Melissa, o e o loo i ai se la tamaitiiti e i ai manaoga faapitoa, ua tuuina atu le faamoemoe ma le faamalosiauga i matua.
-
Itulau e 21: I le faaiuga o la’u tusiga, e mafai ona e maua ni manatu i auala e faaleleia atili ai le taulimaina o tagata e i ai manaoga faapitoa i lesona ma valaauga o le Ekalesia.
-
Itulau U16: E mafai e matua ona faaaoga lenei tala i le Uo e fesoasoani ai ia latou fanau ia iloa se faataitaiga o le avea ma se uo i se tasi e i ai se manaoga faapitoa.
A o e faitauina lenei lomiga, ia manatua “ua tele lava le taua o agaga i le silafaga a le Atua” (Mataupu Faavae ma Feagaiga 18:10). E mafai ona tatou fesoasoani e faafaileleina siosiomaga alofa ma faaaofia i le aiga ma le Ekalesia ina ia maua lena avanoa e i latou uma o e mananao e o mai ma avea e faapei o Iesu.
Ma alofaaga,
Katie Edna Steed
Tagata Tomai Faapitoa I Manaoga Faapitoa, Matagaluega a le Perisitua ma le Aiga