E Mafai Faapefea Ona Fesoasoani ia Fesili a Alema Tatou te Tuputupu Ae ai Faaleagaga?

Sa fesili atu Alema i tagata o Saraemila i fesili e 36 e fesoasoani ia i latou e iloilo ai lo latou alualu i luma faaleagaga. Sa faamalamalama e Peresitene M. Russell Ballard, Sui Peresitene o le Korama a Aposetolo e Toasefululua e faapea, e aoga se iloiloga faaleagaga. Sa ia fai mai, “E fai ma taiala mo a’u i le taimi o lenei [iloiloga] … , ou te fiafia e faitau ma mafaufau loloto i upu vailiili o loo maua i le mataupu e lima o le Alema.”¹

A o e faitau i le Alema 5:7–13, vaavaai mo mea na aoao atu e Alema e uiga i le ala e mafai ona tatou suia ai ma faalatalata atili atu ai ia Keriso. Mafaufau po o a mea e mafai ona e suia, ma fai se fuafuaga e faatino.

Sa valaaulia foi e Alema ia tagata e manatua le auala na laveaiina ai e le Alii o latou tamā ma toe manatua ai lo latou liua. Mafaufau e tusi le tala o lou liua e manatua ai le auala ua faamanuiaina ai oe e le Alii. E mafai foi ona e faitau i tala e uiga i tala o le liua o ou tuaa po o uluai tagata o le Ekalesia.

“O le a avea ma se mea matagofie pe afai e silafia e le Au Paia uma o Aso e Gata Ai ia tala o le liuaina o o latou tuaa. … O le a matua faamanuiaina i tatou taitoatasi pe afai tatou te iloa tala o le faatuatua ma le ositaulaga sa taitaia ai o tatou tuaa ia auai i le Ekalesia a le Alii.”²