Faalagolago i Uunaiga Lona Lua ma le Taitaiga a le Agaga

Saunia e Marie Netzler

O le taimi muamua na ma feiloai ai ma Kurt, sa le avea o ia ma se tasi e mafai ona aveina au i le malumalu. E mafai faapefea ona tatou agai i luma i la tatou sootaga?

Ia Fepuari 2013, sa ou feiloai ai i se alii talavou e igoa ia Kurt i se pati i le afiafi. O ia o se tagata e foliga palapala, e lei seleina lana ava, ma sa ona. Ou te lei mafaufau tele i ai. E fa masina mulimuli ane, sa ou vaaia ai se alii talavou aulelei lea na tauleai ai sa’u manava. Sa matou fetaui lelei i le lima minute, ae i lena taimi, sa ou iloaina ai o Kurt — o le alii lava lea foliga palapala sa ou feiloai i ai muamua. Sa ou mafaufau e uiga i le suiga o ona foliga.

E lua vaiaso mulimuli ane, sa ou tei i le mauaina o se feau tusitusia mai ia Kurt e faatasi ma ana uo e matamata i se ata tifaga. Sa ou finauina i lou mafaufau pe tatau ona ou alu. Na faapefea foi ona ia maua lau numera? Sa ou tau le iloaina lenei alii, o ou manatu muamua lava ia te ia e le o le mea sili lea ona maoae, ma e foliga mai e le tele ni mea ma te fiafia faatasi i ai. Ma le le mautonu na ou filifili e alu pea.

Ina ua uma le tifaga, sa valaaulia au e Kurt i le taumafataga o le afiafi, ma sa na ona ou fai atu ioe aua sa ou fiaai, ae na suia mea uma i lena taumafataga. O lau uunaiga muamua lava na suia ina ua ou iloaina o ia o se tagata e mafai ona faaata ma faafiafia moni a’u. Sa faigofie ona ou talanoa atu ia te ia, ma na avea i maua ma uo i se taimi vave.

“O Le A Le Mea o Loo Ta Faia?”

A o mavae atu le taimi, na tuputupu ae le ma faigauo ma sa faapena foi o maua lagona. A o lei mafai ona atiina ae se mafutaga mafana, sa ou feagai ma se taua i totonu o au lava; e le o ia o se tagata o le Ekalesia. Sa ou iloa sa ou manao ou te faaipoipo i le malumalu ma tausia lau fanau i le talalelei. Sa ou manao i se aiga e faavavau. O le a la lau mea sa ou faia i le atiina ae o se sootaga ma ia?

Sa ou iloaina e tatau ona ou faia se mea. I se tasi afiafi sa ma toe tietie atu ai i lou fale, ma sa ou fesili, “O le a le mea o loo ma fai?” Sa ou fai atu ia te ia, e tatau ona ma toe laa i tua ma aua nei faatagaina le ma faigauo e tuputupu ae i se mea e sili atu. Sa ou fai atu ai ona ou te lei manao e ta’e lo’u loto po o lona loto pe afai ua ma i ai i se mafutaga, e na o le o eseese ai ona sa ou manao i se faaipoipoga i le malumalu. Sa ou fai atu ia te ia, o le olaga e le na’o a’u, po o maua, ae e faatatau i o ma’ua lumanai ma fanau i le lumanai. Sa ou tautino atu sa ou iloa e faavalevalea lenei mea ma sa oso i le lumanai ae sa ou taumafai lava ia moni ma faasaoina i maua mai le lototiga i le lumanai.

Sa faafofoga mai o ia, ona sosoo ai lea ma lou tei, i lona tali mai, “O le a ou aveina oe i le malumalu.” Sa ou masalosalo ia te ia — e faapefea ona ia folafola mai lena mea? Sa ia faamautinoa mai ia te au e ala i le folafola mai ou te aveina au ma aioi mai ia te au e talitonu ia te ia.

Ou te lei iloa moni po o le a le mea e fai, ae masalo o le taimi muamua lea o lou olaga sa ou tatalo ai ma se faamoemoega moni ina tele. A o ou anapogi ma tatalo i le faigamalaga atoa, sa ou maua ai i taimi uma se lagona mautinoa o loo sao ma o loo faaauau pea le aluga o lenei ala. O au sootaga na i ai muamua na maua ai se lagona lelei, ae o le faatasi ai ma Kurt, mo le taimi muamua i lou olaga, na lagona ai le sao o mea uma—e le na o le lelei ae na sao, ma sa ou lagona le i ai i le fale.

Faatasi ai ma lena faamautinoaga mai le Agaga, sa ou ioe ai e talitonuina Kurt ma faaauau ai le ma mafutaga. Sa ou iloa o le a le sologa lelei lava mea uma, ae na ou iloa foi o le a ou tumau i la’u tautinoga i se faaipoipoga i le malumalu.

Faalagolago i le Alii ma Agai i Luma

Na amata ona feiloai Kurt ma faifeautalai. I le taimi o lesona, sa ou iloa ai sa ia sailiili i le Ekalesia mo le silia i le tausaga ae ma te lei feiloai. Sa ou iloaina foi sa ia faia ma le iloa le le fesili faalelotu mai ia te au ona sa ia manao e saili le upumoni mo ia lava ma ia aua nei faatagaina ona lagona mo au e tosina ai o ia.

Sa papatisoina o ia, ma sa ma faaipoipo ma faamauina i le malumalu o Hamilton Niu Sila i le tausaga mulimuli ane. Sa ia tausia lana folafolaga ia te au e ave au i le malumalu, ma sa ia umia pea ana feagaiga latalata i lona loto. Ua mavae le ono ma le afa tausaga talu le ma faaipoipoga, ae o loo i ai pea se mea mataina o loo tupu pea. E i ai se ma atalii ma te faapelepele i ai, ma ma te taumafai i aso uma e aoao o ia i le talalelei a Iesu Keriso.

Ua ou fiafia ona ou te lei faatagaina ou uluai uunaiga o Kurt e avea ma o’u lagona mulimuli. E le o ia le tagata lea sa ou feiloai i ai muamua. Ou te fiafia ona sa ou faatuatuaina o ia ma le taitaiga a le Agaga i la maua mafutaga. Ou te faafetai ona sa ou tu atu mo le mea na ou talitonu i ai, mo au lava ma lou aiga i le lumanai. Sa ou iloaina sa ou fia faamau i le malumalu, e le faapea ona o le “mea sao lea e fai,” ae ona o feagaiga tatou te faia, ae maise lava i le malumalu, e tuu ai i tatou i luga o se ala e faataga ai lo tatou aiga ia tuputupu ae, alualu i luma, ma ia faavavau. E pei ona manino ona taua e Peresitene Russell M. Nelson, “O le faaolataga o se mataupu e faia e le tagata lava ia; o le faaeaga o se mataupu faaleaiga” (“Faaolataga ma le Faaeaga,” Liahona, Me 2008, 10).