O Upu a le Perofeta mo Tagata Uma

Ata

woman looking at paper on a wall

Ata na tusia e Merrilee Liddiard

Sa ou vave ala i se tasi taeao ina ia ou sauni mo le galuega. E ui e masani ona ou fiafia i la’u galuega i le avea ai ma se faiaoga, ae sa ou le fiafia ma sa na ona ou manao lava e toe totolo i lalo o le ieafu ma faafoliga ua toe oo i le taimi moe.

Ina ua ou taunuu atu i le aoga maualuga, sa ou taumafai ia saunia lo’u mafaufau mo le galuega. Sa ou iloaina ua vave le taimi e tatau ai ona aoao se vasega o le matematika, ae o lo’u loto ma lo’u ulu sa lagona uma le vaivai ma le faanoanoa. Sa leaga uma o’u lagona.

Sa ou filifili loa e asiasi i le faleletaua a o lei amataina le vasega. E tai tasitasi lava ona faapipii e se tagata se faasalalauga i totonu o faletaele e i ai faamatalaga mo tamaiti aoga ma le aufaigaluega. Mai le tausiusiuga o la’u vaai, na ou tosina atu ai i se faasalalauga. Sa i ai se upusii manaia na faitauina faapea, “Afai e te manao e avatu se malamalama i isi, e tatau ona e susulu atu oe lava ia.”¹ Sa ou tei i le vaai atu o lenei upusii na sau mai ia Peresitene Thomas S. Monson (1927–2018).

Ou te lei faamoemoe e vaai i se upusii mai se perofeta a le Atua i luga o puipui o le aoga. Ou te nofo i se nuu laitiiti i Penisilevania, ISA, ma ou te mautinoa o au o se tasi o se vaega toaitiiti, pe atonu e na o a’u foi, le tagata o Le Ekalesia a Iesu Keriso o le Au Paia o Aso e Gata Ai i le aoga. Sa ou iloa o a’u o se tasi o se vaega toaitiiti o e o le a malamalama i le taua o upu a Peresitene Monson—o se tamalii sa ou lagolagoina mo le tele o tausaga o le perofeta. Sa ou lagonaina o lenei savali sa faatatau tonu mo a’u. Na faamalūlūina ai lo’u loto ma siitia ai o’u lagona. Na faatumulia lo’u loto i le agaga faafetai mo la’u molimau, ma sa siomia a’u i le alofa o le Tamā Faalelagi.

Sa ou manao e toso ese le pepa mai le puipui ma tuu i totonu o la’u taga i le aso atoa e siitia ai au, ae sa vave ona ou iloaina se mea. O Peresitene Monson sa le na o se perofeta mo au ma isi tagata o le Ekalesia—o ia o le perofeta mo le lalolagi. O ana upu, e pei o upu a Peresitene Russell M. Nelson i aso nei, e mo tagata uma. O upu a se perofeta e fesoasoani ma siitia ai i latou uma o le a faalogo i ai. Sa ou pueina se ata o le upusii i la’u telefoni ma tuu ai le pepa mo soo se tasi e ono manaomiaina.

Ou te faafetai na tuu mai e le Tamā Faalelagi lenei savali i lo’u ala. Ou te manao e avatu le malamalama i isi. E ala i le usiusitai ma se vavalalata ma lo tatou Faaola, e mafai ai lava ona ou susulu atu e oo lava i aso e manao le pogisa ia leiloa ai lo’u ala.