O le Matafaioi Taua a le Perisitua i le Toefuataiga
Saunia e Elder Gary E. Stevenson
O Le Korama a Aposetolo e Toasefululua
Ana le aunoa ma le toe foi mai o le perisitua i le lalolagi, semanu e le mafai ona faataunuuina le Toefuataiga.
E oo ane ia Aperila 1829, ua toeitiiti atoa le sefulu tausaga o maua pea e Iosefa Samita ia asiasiga faalelagi. Na faaali mai le Tamā ma le Alo ia te ia i le 1820 i se togalaau na lata ane i lona fale ina ua 14 ona tausaga (tagai i le Iosefa Samita–Talafaasolopito 1:5–17).1 O le asiasiga muamua a le agelu o Moronae na tupu i le 1823, sosoo ai ma asiasiga faaletausaga i le taimi na aoaoina ma fautuaina ai Iosefa seia oo i le 1827, ina ua ia maua faamaumauga anamua sa tusia i luga o papatusi o le a avea ma Tusi a Mamona (tagai i le Iosefa Samita–Talafaasolopito 1:30–54).
Ae peitai, mo le 18 masina talu ona maua mai papatusi, na tauivi ai Iosefa e faaliliu ia faamaumauga ona o le faalavelave o tagata o le lotoifale, o le fesuisuiai o le au tusiupu, ma le leiloloa o se vaega o tusitusiga. Sa o se taimi faanoanoa lea ma le tiga mo Iosefa. (Tagai i le Iosefa Samita–Talafaasolopito 1:58–62; Mataupu Faavae ma Feagaiga 3.)
Ae na suia mea uma ia Aperila 1829 i le taunuu ai o se faiaoga sa igoa ia Oliva Kaotui, o lē sa avea ma tusiupu tumau a Iosefa. Ona televave ai lea o le faaliliuga o le Tusi a Mamona i se aluga saoasaoa.
Ina ua mavae le faaaluina o le tele o lona taimi i le tautoulu o le 1828 e galue ai i lana faatoaga i Haramoni, Penisilevania, i le tausiga o lona aiga, o le 1829, na liliu atoa atu e Iosefa lana taulaiga i le faaliliuga o le Tusi a Mamona. Mo ni taimi puupuu, sa galulue ai le faletua o Iosefa, o Ema, ma lona uso o Samuelu o ni tusiupu. I le taimi lava lea e tasi, sa nofo totogi ai Oliva Kaotui i le fale o matua o Iosefa i Niu Ioka.
I le faalogo ai e uiga i papatusi ma lo latou faaliliuga, na faapea ona faagaeetia ai Oliva ma sa fia iloa pe o nei mea sa ā le Atua. “I se tasi po ina ua alu o ia e moe, sa valaau atu o ia i le Alii ia iloa pe moni nei mea,” sa tusia e Iosefa, “ma sa faaali mai e le Alii ia te ia ua moni i latou.”2
Sa vave ona malaga Oliva i maila e 140 (225 km) i Haramoni e feiloai ma Iosefa. Sa avea Oliva ma se tali i tatalo a Iosefa. E lua aso talu ona laua feiloai ia Aperila, ae toe faaauau le faaliliuga o le Tusi a Mamona i se saoasaoa televave, na ofoofogia le toeitiiti lava a maea i le pe a ma le 60 i le 65 aso faigaluega. Na maea le faaliliuga atoa i le aso 30 o Iuni.
Atonu na mafaufau le Perofeta o Iosefa e faapea, o lana galuega atoa na lata ina faamaeaina, ina ua maea ai ona faatino lona tiute paia na faatonuina e le avefeau agelu e faaliliu ma lolomi le faamaumauga anamua. Sa lei iloa e le Perofeta i lena taimi e le o le faamaeaina ae nai lo lena, o le faatoa amataina lea o lana matafaioi taua i le Toefuataiga o le talalelei a Iesu Keriso.
E itiiti ni mea na tutupu i le talafaasolopito e faatusatusa le taua tele i le mea na tupu i le tautotogo o le 1829. Na faamatalaina e Oliva lenei vaitau mataina o le Toefuataiga o “aso e lē mafai ona faagaloina” (Iosefa Samita—Talafaasolopito 1:71, faamatalaga). I tua atu o le vavega o le faaliliuga o le Tusi a Mamona, sa lei leva ae oo mai agelu ma faaee le pule o le perisitua i luga o Iosefa ma Oliva. O lenei vaitau faafaaaliga o le faaliliuga ma le toefuataiga sa toeagatonuina ma faalauteleina ai le vaaiga a Iosefa ma asaina le ala mo le faatulagaina aloaia o le Ekalesia i le tasi le tausaga mulimuli ane.
Papatiso e Iosefa Samita ia Oliva Kaotui, saunia e Del Parson
Toefuataiga o le Perisitua Arona
A o faaliliuina le Tusi a Mamona, sa fetaiai Iosefa ma Oliva ma le tele o fuaitau e faatatau i le papatisoga ma le pule. “Na ta’u mai muamua ia Iosefa e faapea ‘[o le a] tuuina atu foi e le Alii le perisitua paia i nisi.”3 I le aso 15 o Me, 1829, na tuumuli ai Iosefa ma Oliva i se nofoaga tuufua i se togalaau meipo suka lata ane “e ole atu ai i le Alii, e ala i le tatalo, i Lona finagalo e faatatau ia te au.”4
A o laua tatalo, sa fetalai atu e le siufofoga o le Togiola le filemu ia i laua “a o tatalaina le veli ma afio mai i lalo le agelu a le Atua sa ofu i le mamalu, ma tuuina mai le savali sa tulimatai i ai ma le naunau tele, ma ki o le Talalelei o le salamo” (Iosefa Samita—Talafaasolopito 1:71, faamatalaga). Na faailoa atu e le agelu o ia lava o Ioane, “o lea lava ua ta’ua o Ioane le Papatiso i le Feagaiga Fou, ma ua galue o ia i lalo o le taitaiga a Peteru, Iakopo ma Ioane” (Iosefa Samita—Talafaasolopito 1:72).
Sa tootutuli Iosefa ma Oliva a o tuuina e Ioane toetu ona lima i luga o o laua ulu ma faaee atu ia i laua le Perisitua Arona, “ua umia ki o le auaunaga a agelu, ma o le talalelei o le salamo, ma o le papatisoga i le faatofuina mo le faamagaloina o agasala” (Iosefa Samita—Talafaasolopito 1:69; tagai foi i le Mataupu Faavae ma Feagaiga 13:1). Sa folafola atu ia i laua o le pule faaopoopo o le perisitua o le a faaee atu i o laua luga “i le taimi e tatau ai.” Na valaauina Iosefa “o le Toeaina muamua o le Ekalesia, ma ia (Oliva Kaotui) o le lona lua” (Iosefa Samita—Talafaasolopito 1:72). Sa faatonuina foi i laua e papatiso e le tasi le isi—o Iosefa e papatiso muamua ia Oliva ona papatiso ai lea e Oliva ia Iosefa.
I se taimi o lena aso, sa laua “o atu i le vai” i autafa o le augutu o le vaitafe o le Susikuana ina ia papatiso ai. “Sa uunaia i maʼua e tausi faalilolilo tulaga o le ma mauaina o le Perisitua ma le papatisoina o i maʼua, ona o se agaga o sauaga ua uma ona faaalia i le vaiaai” (Iosefa Samita—Talafaasolopito 1:74). O le vaitafe sa avea o se auala autu mo pisinisi ma femalagaaiga i le taimi o lologa o le tautotogo, faatasi ai ma se solo tumau o vaa vai. E ono mafai ona faapea sa faatalitali Iosefa ma Oliva seia malu ae le afiafi pe sa faaaoga le avanoa o le sua o le vai ma maua ai se vaega e tau le iloa atu talane o le alavai.5
Ina ua uma ona papatiso e le tasi le isi, sa faauuina e Iosefa ia Oliva i le Perisitua Arona. Ona faauuina lea e Oliva ia Iosefa e pei ona poloaiina ai i laua e le agelu. Sa aoao mai Peresitene Iosefa Filitia Samita, sa tatau ai ona toe faamautu le uluai faauuga na maua i lalo o lima o Ioane le Papatiso ina ua uma o laua papatisoga ina ia “toefaamau ai na faamanuiaga i le faasologa tatau.”6
O Le Toefuataiga o le Perisitua Mekisateko, saunia e walter rane.
Toefuataiga o le Perisitua Mekisateko
E itiiti lava se faamatalaga ua tatou maua e uiga i le asiasiga a Peteru, Iakopo, ma Ioane ia Iosefa ma Oliva e toefuatai mai le Perisitua Mekisateko. O faaliliuga eseese na faavae i luga o tala sa toe tomanatu i ai, sa faatulaga ai le mea na tupu i le tautotogo o le 1829 atonu o le faaiuga o Me po o Iuni, i masina mulimuli ane.7 Sa lei tusia lava e Iosefa ma Oliva le aso o le faaali mai o Peteru, Iakopo, ma Ioane, e pei ona la faia mo Ioane le papatiso ma le Toefuataiga mo le Perisitua Arona. Atonu la te le i matua malamalama atoatoa i le natura o le perisitua po o ona vaevaega i le amataga mai. O le malamalama o Iosefa e uiga i le perisitua na auauai mai i vaega.
Mai le 1830 i le 1835, sa faamanino mai ai tofi o le perisitua, ma faatuina ai korama, aufono, au peresitene, ma au epikopo. E oo lava i le faaupuga Perisitua Mekisateko sa lei faaaogaina o se igoa mo le “Perisitua Maualuga” po o le “perisitua tele” (Mataupu Faavae ma Feagaiga 107:9; 84:19) seia oo i le 1835 (tagai i le Mataupu Faavae ma Feagaiga 107:2–4).
Sa tuuina mai e Iosefa ni faamatalaga le maoti e uiga i le nofoaga. I le 1842, na ia manatuaina le faalogo “i le leo o Peteru, Iakopo, ma Ioane i le vao i le va o Haramoni … ma Kolesavile … i luga o le vaitafe o Susikuana, ua tau mai o i latou lava ua i ai ki o le malo” (Mataupu Faavae ma Feagaiga 128:20).
O lenei mea ua tau mai ai o le Toefuataiga o le Perisitua Mekisateko na tupu i se vaimea o se auala e 28 maila (45 km) i le va o le fale o Samita i Haramoni, Penisilevania, ma le aai o Kolesavile, Niu Ioka, lea na nonofo ai le aiga o Iosefa Knight. O le aiga o Knight o tagata muamua o le Ekalesia ma o ni uo tuuto a Iosefa Samita. Sa latou tuuina atu ni pepa ma ni meaai i le taimi o le faaliliuga o le Tusi a Mamona, ma faatuina mulimuli ane ai le vaega tutotonu o le Paranesi o Kolesavile a le Ekalesia.
E faaopoopo i le mauaina o le Perisitua Mekisateko mai ia Peteru, Iakopo, ma Ioane, na faauuina Iosefa ma Oliva “e avea o ni Aposetolo, ma molimau faapitoa” a le Alii (Mataupu Faavae ma Feagaiga 27:12) ma mauaina ki e tatau ai mo le tatalaina o le tisipenisione o le atoaga o taimi. Sa i ai nei ia i laua le pule e taitai ai sauniga uma o le perisitua, e aofia ai le faaeeina atu o le meaalofa o le Agaga Paia.
Sa laua mauaina foi “ki o faamanuiaga faaleagaga uma o le Ekalesia” (Mataupu Faavae ma Feagaiga 107:18) e alagatatau e faatulaga ai le Ekalesia ia Aperila 1830 ma maua ai faaaliga e toefuatai mai ai mea uma i lo latou faatulagaga tatau. O faamanuiaga faaleagaga na faaalia mai e ala i vavega, faamalologa, ma sauniga e faatinoina e ala i le pule o le perisitua. I le 1836, na tuuina mai ai e avefeau agelu faaopoopo ia ki o le perisitua e faatatau i le faapotopotoina o Isaraelu ma galuega o le malumalu (tagai i le Mataupu Faavae ma Feagaiga 110).
Aafiaga o le Toefuataiga o le Perisitua
Na aoao mai Peresitene Tavita O. MaKei (1873–1970) e faapea, o le vaega aupito tulagaese lava o le Ekalesia toefuataiina a le Faaola o le “pule paia lea e ala mai i faaaliga tuusao.”8 A aunoa ma le toe foi mai o le perisitua i le lalolagi, na semanu e le mafai ona faataunuuina le Toefuataiga. O le perisitua e faataga ai le faatinoga o sauniga ma tuuina mai ai le auivi mo le puleaina o le Ekalesia a le Alii i le lalolagi.
Na faatulagaina aloaia e Iosefa le Ekalesia i le aso 6 o Aperila, 1830. I nai tausaga na sosoo ai, na faatulagaina ai le Au Peresitene Sili ma le Korama a Aposetolo e Toasefululua. I lalo o le taitaiga a le Peresitene o le Ekalesia, o ki o le perisitua ua faamatuu atu i taitai o le lotoifale i le lalolagi atoa, ua mafai ai e le talalelei ona “taavale atu i tuluiga o le lalolagi” (Mataupu Faavae ma Feagaiga 65:2).
O le Toefuataiga o le perisitua sa totonugalemu i le valaauga paia o Iosefa Samita i le avea ai ma uluai perofeta o lenei tisipenisione. I le faatomuaga o le Mataupu Faavae ma Feagaiga, na faamalamalama mai ai e le Alii, “O le mea lea, o A’u o le Alii, ona ua Ou iloa le malaia o le a oo mai i luga o e o nonofo i le lalolagi, na Ou vala’au atu ai i luga o la’u auauna o Iosefa Samita, Laitiiti, ma tautala atu ia te ia mai le lagi, ma tuu atu ia te ia poloaiga” (Mataupu Faavae ma Feagaiga 1:17).
A o lei oo mai le asiasiga a Ioane le Papatiso ia Me 1829, sa taulai atu Iosefa i le faaliliuina o le Tusi a Mamona. O le toefuataiga mai o le Perisitua Arona ma le Mekisateko, na ia iloaina ai o lona valaauga e matua tele lava mea e aofia ai. O le mauaina o le pule mai le lagi na saunia atili ai Iosefa e amoina ona tiutetauave o se “tagatavaai, o se faaliliutusi, o se perofeta, [ma] o se aposetolo a Iesu Keriso” (Mataupu Faavae ma Feagaiga 21:1).
Na faamatala e Elder Robert D. Hales (1932–2017) o le Korama a Aposetolo e Toasefululua le tulaga o le a i ai o tatou olaga e aunoa ma le perisitua: “Ana faapea e le i ai le mana o le perisitua i luga o le fogaeleele, semanu o le a maua e le fili le saolotoga e fealuai ma nofotupu ai e aunoa ma le taofiofia. O le a leai se meaalofa o le Agaga Paia e taitai ma faamalamalamaina ai i tatou; leai ni perofeta e saunoa mai i le suafa o le Alii; leai ni malumalu e mafai ona tatou osia ai feagaiga paia faavavau; leai se pule e faamanuia pe papatiso ai, e faamalolo pe faamafanafana ai. A aunoa ma le mana o le perisitua, “o le a faama’umauina atoa le lalolagi” (tagai i le Mataupu Faavae ma Feagaiga 2:1–3). O le a leai se malamalama, leai se faamoemoe—na o le pogisa.”9
O le mauaina o sauniga o le perisitua e totonugalemu i le galuega a le Alii i le “aumaia le tino ola pea ma le ola faavavau o le tagata” (Mose 1:39). O le papatisoga ma le faamauga, o faaeega paia o le malumalu, ma faamauga mo le taimi nei ma le faavavau e taua mo lo tatou faaolataga. O le mafai ona fusifusia ma faamau o aiga i malumalu mo i latou o i itu uma o le veli, ua mafai e ala i le na o le pule lava o le perisitua ma ki e pei ona faatonuina ai e le Peresitene o le Ekalesia.
O le Toefuataiga Faifai Pea
E mafai faapefea e le pule o le perisitua ona musuia lou auai i le Toefuataiga faifai pea o le Ekalesia? Atonu tatou te le iloa po o le a faapeī le lumanai, ae ua manino lava o le Toefuataiga e faifai pea. E lei faaalia mai e le Alii ia aoaoga faavae po o sauniga uma, pe tuuina atu faatonuga uma ia Iosefa i le Vao Paia, e ala ia Moronae i Kumora, po o le sauniga o le faavaeina o le Ekalesia. E lei tupu le Toefuataiga o se mea se tasi na tupu. Nai lo lena, na faaali mai e le Alii ia mea i “lea fuaitau i luga o lea fuaitau” (2 Nifae 28:30) ia Iosefa e pei lava ona faaauau ona ia faaali mai mea i Ana perofeta i le asō e tusa ai ma Ona faamoemoega ma [Lana] taimi.
O se laina lē motusia o perofeta talu mai aso o Iosefa Samita ua saunoa atu e fai ma sui o le Alii ma faaauau pea ona faailoa mai Lona finagalo. E vaaia e perofeta le vaaiga lautele ma maua ai se taitaiga patino mo luitau o o latou aso. Ua folafola mai e Peresitene Russell M. Nelson o i tatou uma o “molimau i se faagasologa o le toefuataiga. Afai e te manatu ua toefuatai mai atoatoa le Ekalesia, ua na o le amataga ua e vaaia. E tele naua isi mea e oo mai.”10
O Le Toefuataiga ma Oe
Tau ina ia avea i tatou taitoatasi ma tagata auai i le Toefuataiga faifai pea o le talalelei e ala i le talisapaia ma le naunautai ma ola ai i mea na faaali mai i perofeta o aso nei. O faataitaiga e aofia ai le ola i le tulafono maualuga ma le paia atu o le auauna atu i o tatou uso ma tuafafine.11 Ma tau ina ia mafai e i tatou taitoatasi ona maua le olioli tumau o le talalelei e ala i le fuafuaga ogatotonu i le aiga, lagolagoina e le Ekalesia e aoao ai aoaoga faavae, faamalosia le faatuatua, tausia poloaiga, ma faafailele ai se tapuaiga sili atu faaletagata lava ia, e aofia ai se afiafi faaleaiga e fetaui ma manaoga o tagata taitoatasi ma le aiga.12
E mafai ona tatou saunia mo le Afio Mai Faalua o le Faaola e ala i le faatelevaveina o le faapotopotoina o Isaraelu i itu uma o le veli.13 E mafai ona sili atu ona tatou avea le aso Sapati o se aso fiafia ia tatou sauniga tapuai i le Aso Sa ma i le aiga.14 E mafai ona tatou tumau i le gauai sili atu i le Agaga Paia e ala i le faia o galuega faaleagaga e manaomia e maua ai faaaliga patino i aso taitasi.15
Ou te molimau atu e tumau pea ona tatala le lagi ma e matua tele atu mea e oo mai a o saunia i tatou e le Alii mo aso sili ona fiafia o i luma atu. O le toefuataiga o le perisitua ua mafai ai e fanau a le Atua ona faatautaia ma maua sauniga faaola, ma faataga ai perofeta, tagatavaai, ma talifaaaliga o aso nei e taitaia le malo o le Alii.
E le mafaitaulia faamanuiaga e oo mai i aso uma i le Ekalesia ma ona tagata ona o le faigofie ona maua o le perisitua a le Alii. Ia tatou faaali atu lo tatou loto faafetai i aso uma ona o le faaali mai o Ioane le Papatiso ma Peteru, Iakopo, ma Ioane ma mo le toe foi mai o le Perisitua Arona ma le Mekisateko i lenei tisipenisione mulimuli ma faaiu e sauniuni ai mo le toe foi mai o lo tatou Alii ma le Faaola, o Iesu Keriso lea.
ata pito i tua mai ia Getty Images