Sa Ma Manaomiaina se Vavega Lona Lua

O lo’u toalua o Sara, sa 24 vaiaso le maitaga ae amata loa ona ia oo i ni tiga tetele. Sa ou tuuina atu ia te ia se faamanuiaga ona ou alu lea i le galuega. Sa ou i ai pea i le galuega ae telefoni atu o ia ou te sau i le fale e ave o ia i le falemai.

“O le a fanau le lua pepe,” o le tala mai lea ina ua ma taunuu. Talu ai ona sa na o le 24 vaiaso o le maitaga o Sara, o le avanoa sili mo le pepe ia ola ai o le faia o se taotoga faavavevave e faafanau ai.

“E le manaomia ona feagai lau avā ma se isi mafatiaga faaopoopo,” o le tala lea a le fomai ia te au. “O le a ma’umau lava lana pepe.”

Sa ma talanoa ma Sara ma tatalo e uiga i le mea na fai mai ai le fomai. Sa ma lagonaina afai e i ai se avanoa e ola ai le ma pepe, e manaomia lo ma faaaogaina o lena avanoa. Sa faigata ia i maua ona maua ni fanau. Sa vaetamaina mai le ma atalii matua, o Teila. Ina ua maitaga Sara i le lua tausaga talu ona ma vaetamaina Teila, sa ma lagonaina o se vavega. A o lea ua ma manaomia se vavega lona lua.

I se taimi itiiti mulimuli ane, ae oo mai se fomai faapitoa ia i ma’ua ma faapea mai, “Ou te manatu atonu o loo lava se taimi e avatu ai lau avā i se falemai o tamaiti i El Paso, Texas, o loo lava tapena e tausi pepe fananau le au ma pepe fou e mamai tigaina. O le a maua se avanoa o le pepe iina!”

Na alu ese atu se taavale a le falemai mai lo matou falemai i le lotoifale faatasi ma Sara ma faataalise loa e agai atu i le falemai o tamaiti e 45 minute le mamao. Sa ou mulimuli latalata atu i tua, ma aioi atu i le Alii i le tatalo ina ia tuuina mai ia i ma’ua se vavega. Sa ou folafola atu ia te ia o le a ou tumau i le ala o le talalelei ma taumafai ia sili atu ona lelei.

I le falemai, sa ou fai atu ai i le fomai i le iunite mo pepe tigaina: “Ma te iloa ua tasi le ma vavega na i ai i le maitaga a lo’u toalua. O le taimi lenei ua ma faamoemoeina se isi [vavega].”

Sa lelei le faafanauga, ma na faasaoina le ma pepe. Ina ua uma ona ia faaaluina le fa ma le afa masina i le iunite mo pepe tigaina, sa ma aumaia loa Shanna i le fale. Ma na ma mauaina se vavega lona lua. E lei tele ni tausaga mulimuli ane, ae ma mauaina foi se isi vavega—sa faamanuiaina i ma’ua e le Alii i se masaga.

O Shanna e maualalo teisi lava lona atamai (IQ), ma e faaaoga e ia se nofoa faataavalevale, ae e tumu o ia i le olioli, e manatu fiafia i taimi uma, ma o se uo i tagata uma. E fiafia o ia e faamatala atu ia te oe e uiga i lona aso, ma e fiafia o ia i le olaga. Na te faa’ata’ataina i ma’ua i taimi uma ma aoao maua ina ia fiafia. Ma te alolofa ia te ia ma faafetai mo ia. O Shanna o se faamanuiaga moni lava.