O Atatosi o le Faatuatua
Lini Uilaau
Savaii, Samoa
Sa i ai se taimi na tauivi ai Lini ma lagona o le ita ma le le onosai. Ae ina ua auai i laua ma lona toalua i le Ekalesia a Iesu Keriso o le Au Paia o Aso e Gata Ai, sa lagonaina e Lini le mou atu o na lagona a o soifua ai i le talalelei.
Leslie Nilsson, pueata
Sa amata ona ou suesue i le talalelei ma aoao e ala i aoaoga a le Ekalesia i le auala na alofa ai Iesu i tamaiti. Sa matua agalelei lava o Ia ia i latou.
Sa amata ona ou taumafai e avea atili e pei o Iesu. Ua ou taumafai nei e alofa atili i tagata uma o lo’u aiga. Ua ou faaaluina atili le taimi ma i latou ma tele atu se taimi e faamasani ai i o latou manaoga. Matou te faitau faatasi o se aiga ia tusitusiga paia ma tatalo i po uma lava.
O lea ua matua faamalūlūina ai lo’u loto. Ua faateleina lo’u lagonaina o le alofa ma le filemu ma le fiafia i lo matou aiga a o matou mulimuli i aoaoga a Iesu Keriso. Ou te faafetai mo le auala ua fesoasoani ai le talalelei ia te a’u e aoao i le auala e avea ai ma se ava, tina, ma se tinamatua e sili atu ona lelei.
O nisi o la ma’ua fanau matutua e auai i lotu eseese, ae o loo ma faamoemoe pea o le a latou auai uma i le Ekalesia moni i se aso. E i ai se ma sini ma lo’u toalua e ulu atu i le malumalu i le tausaga a sau. Ae ua na o le ma sini amata lena. Ma te mananao i le ma aiga atoa ina ia mafai ona matou ulu atu i le malumalu ma faamauina faatasi.
E mafai e le talalelei ona suia o tatou olaga. E le gata ina le lava lo’u onosai, ae sa masani ona ou tauivi ma nisi o vaega i le Upu o le Poto. Ae o le taimi lenei ua le o toe avea na mea ma faafitauli mo a’u. Afai e mafai ona fesoasoani le talalelei ia te au ia avea ma se tagata sili atu ona lelei, ou te iloa e mafai foi ona faia le mea lava lena e tasi mo lo’u aiga atoa.
Ua fiafia uma Lini ma lona toalua, o Ioane, i faamanuiaga o le lotogatasi vavalalata o le aiga ina ua la taliaina le talalelei a Iesu Keriso.
I avanoa uma lava, ua fusia faalatalata mai ai e Lini ia fanau a lana fanau. Ua i ai ia Lini ma lona toalua le sini o le vaai i lo la aiga atoa o faamauina i le malumalu i se aso.
O le alofa ma le filemu sili atu i totonu o le aiga ua na o se tasi lea o faamanuiaga ua maitauina e Lini talu mai ona auai i le Ekalesia ma ola ai i mataupu faavae ua ia aoaoina.