“Ou Te Le Teena Lava Lo’u Faatuatuaga”

Ata

man reading scriptures

Ata na tusia e Greg Stevenson

E lei leva talu ona faafaigaluegaina au e avea ma faatonu lagolago o se faletusi tele, ae amata loa ona matou amataina ma la’u vaega se galuega tele o le tuua o tusi e 37,000 i luga o le komepiuta e faaeletonika. I se tasi aso na valaauina ai au e lo’u supavaisa i totonu o lona ofisa.

“Edouard,” na ia fai mai ai, “Ua valaaulia a’u e faailoa atu la tatou galuega o le faaeletonikaina o tusi i le Iunaite Setete ma talosagaina ai nisi o tusi fou. Ua talosagaina a’u ou te avatua se soa faigaluega faatuatuaina. Ou te talitonu ia te oe ae le o lau lotu. Afai e te lafoaia lou faatuatuaga, e mafai ona e sau ta te o.”

A o lei mafai ona ou fai atu se tala, sa ia tau mai ia te au ou te mafaufau i ai ona tuu mai lea o a’u ou te aluese.

I lena afiafi, sa ou faasoa atu i lo’u toalua le mea na tupu. Sa ia faamalosiau mai ia te au ia ou maua le faatuatua. O le aso na sosoo ai, sa ou fai atu ai i lo’u supavaisa o le a ou tausisia lo’u faatuatuaga. Sa ita o ia ma fai mai o le a malaga na o ia.

I se tausaga mulimuli ane, sa ou maua se avanoa e malaga ai i Farani e maua ai aoaoga faamasani i le faatupeina, faatauina o punaoa, ma le puleaina o faletusi. Pau lava le mea sa ou manaomia o le faamaoniga a lo’u supavaisa. Sa ia fai mai na pau lava le mea o le a ia faatagaina ai pe afai lea ou te faafitia lo’u faatuatuaga. Sa ou toe teena foi. Ona ia sasaeina lea o le pepa ma togi mai i o’u mata. I se taimi mulimuli ane sa toe oo mai ai foi lo’u supavaisa ia te au.

“O le a ou alu i se isi malaga,” o lana tala lea. “E mafai ona ta o, ae e tumau lava le tuutuuga. O le a ou le malaga lava ma se tagata o le tou lotu.“

“O le a ou le teena lo’u faatuatuaga,” sa ou fai atu ai. Sa alu ese atu o ia e aunoa ma le fai mai o se upu. E lei umi ae amata ona ia talanoa atu i a’u uo e uiga ia te a’u.

“Sa ou ofoina atu ia te ia ni avanoa,” sa ia fai atu ai. “Ae ua ia faaleaogaina uma i latou ona o lona faatuatua tauaso. O ia o se vale.”

Mai lena taimi, sa avea ai au ma se mea ula ma faatauemuga i le galuega. Sa ou lagona le faavaivai. I se tasi afiafi, a o tumu lo’u mafaufau i lenei faafitauli, sa ou susueina ai le Tusi Paia ma faitau ai, “Afai foi e te tausuai i lou mata taumatau, ina sali ese ia, ma e lafoai; auā e lelei ina fano se tasi ou fāsi tino ae e leaga pe a lafoina lou tino uma i kēna” (Mataio 5:29).

Afai e fetalai mai le Alii e tatau ona tatou aveesea se mea ina ia faasaoina ai i tatou lava, aisea na ou pipiimau ai i se galuega na avea ma se lamatiaga i lo’u ola manuia faaleagaga? O le aso na sosoo ai, sa ou tuuina atu ai i la’u tusi faamavae.

I le asō, ua ou fiafia i lenei filifiliga. Faatasi ai ma le lototele ma le faatuatua ia Iesu Keriso, sa ou feagai ma le faalumaina i le galuega ma le leai o se galuega mo se taimi. I la’u galuega fou ua saunia avanoa sa ou le i mauaina muamua. Ua faamanuiaina a’u e le Alii, ma ou te faafetai ia te Ia mo Lona agalelei ma Lona alofa ia te au.