O se Fale Tatala o le Malumalu na Tatalaina ai Lo’u Fatu
Ricardo Matamoros, Ahuachapán, El Salvador
Faatasi ai ma le faasilasilaga o le faletatala o le malumalu, sa ou lagonaina ai le pei na valaaulia patino au e le Alii e ulufale atu i Lona maota.
Ata na tusia e Bradley Clark
Sa ou papatiso ina ua 15 o‘u tausaga. E toatele tagata sa lei malamalama i la’u tapuaiga fou. O nisi, e aofia ai ma au uo, sa ulagia a’u ona o la’u filifiliga e auai i le Ekalesia. O o’u matua e le o ni tagata o le Ekalesia, o lea ou te lei maua ai le la lagolago.
O se taunuuga, na faigata ia te au le faaauau pea ona auai i le lotu ma faaauau ai pea ona ola ai i le talalelei. E oo atu i le taimi na 19 ai o’u tausaga, ua ou le toe alu i le lotu.
O le sefulu tausaga mulimuli ane, sa ou faalogo ai o le a fausia se malumalu i El Salvador. Sa ou tei i lo’u faalogo o le a fausia se maota o le Alii i lo’u atunuu! Fa tausaga mulimuli ane, na faamaeaina ai le malumalu o San Salvador El Salvador, ma fofogaina mai ai se fale tatala o le malumalu. Ina ua ou iloa o le a tuu mai e le fale tatala ia te au le avanoa e ulu atu ai i le malumalu, sa ou lagonaina e pei o loo valaaulia patino a’u e le Alii e ulufale atu i Lona maota.
O le aso na ou savali ai i totonu o le malumalu o se tasi o aso sili ona matagofie o lo’u olaga. I le taimi o le fale tatala, sa ou aoao atili ai e uiga i mea e tutupu i totonu o malumalu faapaiaina. Sa ou aoao foi e uiga i feagaiga paia o le malumalu e osia e tagata taitoatasi ma le Atua.
A o ou savali atu i potu taitasi o le malumalu, sa ou lagonaina le afio ai o le Atua. Sa ou lagonaina le filemu. O le asiasi atu i le malumalu na tuuina mai ai ia te au le manao e toe foi mai i le Ekalesia ma toe ola ai i le talalelei. Ina ua ou iloa e mafai ona ou auai i le galuega tele a le Atua, sa ou manao e faamaea le galuega o le malumalu mo o’u tuaa ma faaaoga le perisitua.
O lo’u aafiaga i le malumalu i lena aso na suia ai a’u. O lea la ua ou fesoasoani i tagata o la’u uarota e saunia mo le malumalu ma fesoasoani ia i latou i talafaasolopito o aiga ina ia mafai ona latou faia galuega o le malumalu mo o latou tuaa.
E le mafai lava ona tuai tele le toe foi mai i le Ekalesia. E le mafai lava ona tuai tele le faia o mea lelei. O le Alii, faatasi ai ma Lona alofa e le iu, e faatasi pea lava ma i tatou. O le malumalu o se nofoaga lea e tuufaatasia ai i tatou ma Ia ma faatagaina ai i tatou ia toe foi atu i se aso e mau faatasi ma Ia.