Ko e Fakatahataha ʻa e Akoʻanga Kilipatí ke Fanongoa e Pōpoaki ʻa e Faifekaú ke ʻʻAlu ʻo Fakahokó’

Naʻe lea ʻa ʻEletā Teo Mangalongo mo hono hoá, ʻEletā ʻĒpolokaafi, ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi ha fakataha lotu maʻá e kau ako mo e kau ngāue ʻi he Ako Māʻolunga Molonaí ʻi Kilipati ʻi he ʻaho 12 ʻo Fēpuelí.

ʻOku kau ʻa ʻEletā Mangalongo ʻi he foʻi vitiō ʻo e kaveinga ʻa e toʻu tupú ki he 2020, ʻa ia naʻe huluʻi ʻi Nuʻu Silá.

Naʻá ne lea fekauʻaki mo ʻene aʻusia lolotonga hono huluʻi ʻo e foʻi vitioó peá ne poleʻi e toʻu tupú ke nau ongoʻi e ivi tākiekina ʻo e Fakamoʻuí ʻi heʻenau moʻuí.

Ko e meʻa makehe ʻi he fakataha lotú ko hono hivaʻi ʻe he kuaea ʻa e Ako Māʻolunga Molonaí e foʻi hiva “ʻAlu ʻo Fakahokó” ʻi he lea faka-Pilitāniá mo e faka-Kilipatí fakatouʻosi.

Fakatatau ki ha faiako ʻi he Ako Māʻolunga Molonaí ko ʻAtaʻake Tekanene, naʻá ne pehē, “Naʻe fonu e lokí ʻi ha fānau ako ne tokolahi ange he toko 700 mo ha kau ngāue (ne tokolahi ange he toko 30), kau ai e puleakó mo e kau tokoni pule akó.”

Naʻe pehē ʻe ʻEletā Mangalongo, “naʻá ku maʻu e tokanga ʻa e tokotaha kotoa pē mei he kamatá ki heʻene ʻosí.”

Ne toe pehē ʻe Tekanene: “Naʻe kehe ʻi he kamatá he naʻe teʻeki ha taha ʻe sio ha tokotaha ʻeti faiva (tokotaha ʻiloa). Ne ʻikai ke nau tui ʻe tuʻu ʻi muʻa ʻiate kinautolu ha tokotaha mei he foʻi filimí!”

Naʻá ne pehē, “Naʻe fuʻu makehe foki e taimi naʻá ne fakamatala ai ki he fānau akó mo e kau ngāué e founga naʻe fili ai ia mei he kakai ʻe toko 700 tupu ne fie ʻahiʻahi feinga ke kau ʻi he foʻi vitiō ko iá. Naʻá ne fakamatala fekauʻaki mo e founga naʻá ne foua ai e loto-hohaʻá ʻi he taimi ne filifili pe fakatokosiʻi ai ha kakai ʻe toko 700 tupu kae lava ke maʻu e kakai totonu ʻe toko faá ʻa ia ne fakahoko ʻi ha ngaahi feʻauhi ʻe fā.

“Naʻá ne kātakiʻi e meʻa ne nau fouá pea naʻá ne fiefia ʻi he taimi naʻe faifai pea tali ai ia ke ne ʻetiʻi ha taha ʻo e kakai ʻi he foʻi vitiō ko iá.”