Vaega o se Aiga Faavavau
E ala i o’u lava aafiaga patino ma la’u tautua i le Au Peresitene Aoao o le Aualofa, ua ou muai vaai ai i le toatele o tagata i le lalolagi e le o ola i tulaga atoatoa faaleaiga. O le mea moni, ou te le o mautinoa pe o i ai se tasi o ola ai! O le tulaga matagofie o loo faamatalaina i le “O Le Aiga: O Se Folafolaga i le Lalolagi” e faamanatu mai ai ia i tatou le aiga matagofie e faavavau lea ua avea mo tatou. O loo aoao mai ai e faapea, o i tatou uma o se vaega o le aiga o le Atua ma ua faamanatu mai ai ia i tatou e faapea, po o a lava o tatou tulaga faaleaiga i le lalolagi, o loo tofu siomia i tatou taitoatasi e uso ma tuagane.
-
Talu ai o i tatou uma o ni tagata e le atoatoa, e ono le mafai lava ona atoatoa o tatou tulaga faaleaiga i lenei olaga. Ae e mafai e lo tatou Faaola ona saunia mo i tatou le faamalologa. I le itulau 26, ua ou faasoa atu ai le ala na aumaia ai e galuega faalemalumalu le faamalologa a le Atua i lo’u aiga i itu uma e lua o le veli.
-
O le aoao atili e uiga i mataupu faavae i le folafolaga e mafai ai ona fesoasoani ia te oe e faamalosia lou faatuatua ma i latou o vagaia oe, pe o a lava tulaga o lou aiga. O le talatusia o loo amata i le itulau 12 e mafai ona uunaia ai oe i manatu mo le faaaogaina o nei aoaoga i lou olaga.
E alolofa o tatou matua faalelagi ia i tatou, o a la fanau, ma o loo i ai i lo tatou Tama Faalelagi se fuafuaga mo i tatou taitoatasi. O lona uiga o loo i ai Sana fuafuaga mo oe. Faamolemole ia faaauau pea ona e agaigai atu ia te Ia i le faatuatua. Fesoasoani i tagata o lou aiga faavavau i le ala e toe foi atu ai ia te Ia. O le a Ia faasoa atu le faamoemoe ma le faamalologa i le aluga o lau malaga. Ma o le a i ai se aso, o le a tofu maua ai e i tatou le avanoa e toefoi atu ai i se aiga faalelagi faavavau atoatoa.
Ia faamanuia ma ia faamalolosia outou e le Atua,
Sister Reyna I. Aburto
Fesoasoani Lua i le Au Peresitene Aoao o le Aualofa