Toe Fausia Lo’u Olaga ina ua Uma ona Tatalaina le Faaipoipoga

Tumau le toaga. A o faaopoopo mai isi tiutetauave ia te a’u, sa faateleina lou lagonaina o se manaoga e toe iloilo le tulaga o loo o’u ola ai i le talalelei. Atonu o se tasi lea o au filifiliga e sili ona taua i le taimi lava lea: o le a ou toaga pea i le Lotu ma auai i gaoioiga a le uarota, e tusa lava pe ou te alu na o au pe lagona foi le le lelei e auai ai na o a’u. E ui lava ina sa ou nofofua, ae sa fesoasoani lava lenei faaiuga ou te faaauau ai ona lagona le avea ma se vaega o le aiga toatele o le uarota.

Faitauina o tusitusiga paia. E ui ina sa ou faitauina le Tusi a Mamona i lou olaga atoa, ae talu mai le tatalaina o le faaipoipoga sa ou faitauina i aso taitasi. Ua i ai i tusitusiga paia se uiga fou mo au. Latou te faamafanafana ma taiala au. Latou te faalatalata atili atu ai au i le Tama Faalelagi. Latou te aumaia ia te au ni tali.

I se tasi po, i le maea ai ona auai atu i se faeasaite e uiga i ni sootaga fegalegaleaiga, sa ou sau i le fale ma se lagona matua le nofoleleia lava. Sa ou ita i lou mafaufau o a’u o se tamaitai ua tatala le faaipoipoga. Ina ua uma ona fai a’u tatalo, sa ou susueina le Tusi a Mamona, ma o le mau muamua sa ou faitauina na faapea mai: “Ma o lenei … , talu ai ona ua tatou vaai ua tuu mai e lo tatou Atua alofa mutimutivale ia te i tatou se malamalama tele naua e uiga i nei mea, ia tatou manatua o ia … ma aua le faatautau i lalo o tatou ulu, ona ua lē lafoaiina ese i tatou”(2 Ni. 10:20). A o faaauau ona ou faitau i ai, sa mafai ona aumai e le Agaga Paia ni faatonuga patino ia te au. Sa ou lagonaina le savali ia te au, ua ese le tulaga ua iai nei ae o le a taitaia au ma na manatuaina au e le Alii.

Sa ou toe lagonaina le silafia e le Atua o au ma lou tulaga na i ai, ma na ou lagonaina Lona alofa. E le manaomia ona faatautau i lalo lou ulu i le maasiasi ona ua tatala lau faaipoipoga. Ioe, o nisi mea ua suia i lou olaga, ae o mataupu faavae e faavavau e tutusa lava. Afai ou te latalata tumau i le Tama Faalelagi, o faamanuiaga uma na folafolaina e mafai ona tumau pea mo a’u. Ou te faafetai na ou tatalaina au tusitusiga paia i lena afiafi.

Tausia o poloaiga. O tupe maua a lo matou aiga na matua faaitiitia i le taimi o le faagasologa o le tatalaina o le faaipoipoga, ma sa matou feagai ma faigata i mea tautupe. Sa ou feagai ma le faafitauli pe totogi le sefuluai ina ua manino le le lava ai o se tupe e fafaga ma tausia ai lou aiga toatele ma faia ai lipea e tatau ona faia o le fale. Sa ou saili atu i fautuaga mai ou taitai perisitua ma iloa ai lau tali. Sa ou filifili loa o le a ou totogia se sefuluai atoa. Ou te talitonu o lenei vaega e tasi o le faatuatua na tatala ai pupuni o le lagi, mo le tele o faamanuiaga sa foaiina atu i lo matou aiga. A o ou matua faafetai tele mo le fesoasoani mai o isi, sa ou tauivi ai foi ma le atiina ae o le lotomaualalo ma le agaalofa, aua sa lei manaomia muamua e lou aiga se fesoasoani. O lau malaga muamua i le faleteuoloa o epikopo na maligi ai o’u loimata, ae sa ou saili atu i le Alii po o le a se mea e finagalo o Ia ou te aoaoina mai lea aafiaga. E ese mai le tauivi ma le faamaualuga, sa ou aoaoina le tele o mea e uiga i le alofa ma le faamoemoega mo le polokalama o le uelefea. E ui lava matou te le o toe manaomia se fesoasoani faaleuelefea, ae ou te faafetai lava mo lena aafiaga.

Taliaina o se valaauga. A e lei amataina ona faia pepa o le tatalaina faaletulafono o le faaipoipoga, sa toe faatulagaina la matou au peresitene o le Aualofa, ma sa valaauina au e avea ma failautusi. Mulimuli ane sa ta’u mai e lo matou peresitene fou ia te a o lo’u igoa na oso ane i lona mafaufau a o manatunatu loloto i le malumalu. I le toe tepa i tua, ua ou iloa ai ua tuuina au e le Tama Faalelagi i se tulaga e maua ai le fesoasoani alofa, agalelei, ma le popole mai ou uso o le au peresitene i le taimi o na aso faigata i le taimi o le tatalaina o le faaipoipoga.

O la’u galuega i le Aualofa na manaomia ai au e saunia puletini faalevaiaso ma nisi o lipoti faalemasina. Sa amata ona ou mauaina ni tomai faakomepiuta. A o ou tauaveina isi o’u tiute, sa ou faatautaia i nisi taimi ni fonotaga ma iloa ai le faaleleia atili o o’u tomai faaletaitai. Sa tuputupu a’e lou lototele faaletagata lava ia. Ina ua ou toe foi i le galuega o se tausima’i i le mavae ai o le tele o tausaga, sa ou iloaina ai le manaomia e le galuega o tomai o le komepiuta, ma sa ou faafetai mo mea uma sa ou aoaoina e ala i lo’u valaauga. O le faaleleia o o’u tomai na fesoasoani ia te au i le toe foi atu ai ma le mautinoa i le galuega.

Talanoaga faufautua ma le epikopo. Sa ou lagona le agaga talisapaia o le taitaiga a lo’u epikopo i le fesoasoani mai ia te au i le faiga o ni filifiliga taua. Sa ia siaki mai lo matou aiga i le tele o taimi ma faamautinoa o loo o’u manuia ma o loo tausia lelei fo’i lou aiga. Sa avea o ia ma ou fesoasoani i le faaletino ma le faaleagaga.

I se tasi aso na valaau mai ai le epikopo ia te au i lona ofisa ma talanoa mai ia te au ma lau fanau taitoatasi, e vaai po o a mai i latou. Sa matou faia se fuafuaga ina ia mautinoa ua maua e ou atalii taitoatasi le lagolago faaleperisitua e ala i o latou taitai o korama ma ausilali. Sa ia talanoaina foi lou tulaga tautupe ma faamautinoa sa i ai a matou meaai i le fale, ma ina ua oo mai le Kerisimasi, sa ia toe siaki matou ina ia mautinoa ua i ai ni meaalofa i lalo o la matou laau kerisimasi.

E le gata i le fesoasoani i lau fanau, ae na ia tuuina mai ia te au faamanuiaga faaleperisitua ma fesoasoani ia te au i le faalauteleina o lou tiute fou o se tuafafine nofofua. Oka se mafanafana o le iloa o lo’o ia lagolagoina a’u.

Faalagolago i faiaoga o aiga. Ina ua valaauina Brother Mark ma ona atalii e aoao lo matou aiga, sa ia faaalia lona manao e auauna i lo’u aiga. I le aluga o taimi na ou malamalama ai i le loloto o lana tautinoga. Sa ia siakiina i matou i le tele o taimi ma fesili mai pe na faapefea lo matou vaiaso. Sa faauo atu i tamaiti taitoatasi ma ia manatua o latou aso fanau. Na ia tuuina atu ia i latou ni faamanuiaga faaleperisitua a o lei amataina tausaga aoga taitasi. E faufautua mai ia te au e uiga i lesona na te aumaia i masina taitasi, ona valaaulia lea o i matou e tootutuli i le tatalo faatasi ma ia ma ona atalii ae latou te lei o ese. Ou te faafetai lava mo nei faiaoga o aiga faatuatua o e na tuuina mai le lagolago faaleperisitua mo lo’u aiga.

E i ai taimi e amata ai ona ou le to’a ma mafaufau e tatau ona ou aluese mai lo matou fale lea e foliga mai e matua taugata tele, e ui lava ina sa matou lagonaina ma lau fanau, faatasi ai ma le fautuaga faaleperisitua, sa iai le naunauta’iga e sili ona matou nonofo i lo matou fale ma faaauau ai pea ona ola faatasi ma uo ma le matou aiga faaleuarota. I taimi faapena, e faamanatu mai ai e lo’u faiaoga o aiga ia te au mafuaaga na matou filifili ai e nonofo; ma e le itiiti ifo ma le faatasi i le tausaga ona ia faatulagaina ni nai uso e o mai i le fale e faia ni lipea e manaomia, faamama le fanua, lipea paipa e fui ai laau, vali, ma fesoasoani ia i matou i le tausiaina o lo matou fale.

Talisapaia o ou uso o le uarota. Mo le lua tausaga muamua talu ona tatala lau faaipoipoga, sa siomia ai au e ni uo lagolagosua ma alolofa mai le Au Peresitene o le Aualofa. Sa matou fetagisi faatasi, sa matou talie faatasi, ma sa ou lagona le latalata atu ia i latou. Na ala mai i lou valaauga na ou iloa ai nisi o manaoga o ou uso o le uarota, ma le tuuina atu o se auaunaga ia i latou na fesoasoani e faatumauina ai la’u vaaiga ma maua ai le faamalologa i totonu o lo’u lava loto.

Na oo mai isi faamanuiaga. O au uo i le au peresitene, na popole e uiga i lou uluai taimi o le Valentine e aunoa ma lou toalua, na auina mai se meaalofa na matagofie lona afifiina, lea sa faatali mai mo au ina ua ou taunuu i le fale mai le galuega. O le isi taimi na latou faia ai a’u o se “masiofo mo se aso.” Sa talosagaina a’u ou te auai i se fonotaga i le taeao po. Ina ua ou taunuu atu, sa faatalitali mai se uso e fai o’u atigilima. Sa o mai ni uo se toalua e fai lou lauulu. Ona tau mai lea ia te au o le a matou o e fai ‘aiga o le aoauli ma fai a matou faatauga. Sa latou faatauina mai se ofu fou mo a’u, mo le taimi muamua lea talu mai le tatalaga o le faaipoipoga. Sa taumasuasua lo’u loto, ma sa ou lagonaina le alofa o le Faaola e ala i faatinoga a nei uso.

O le siomiaina o au i le matagofie. O le mataupu faavae o le faatuatua e 13 ua fautuaina mai tatou te sailia le mea ua lelei. O pesepesega sa avea o se aafiaga mamana i totonu o lo matou aiga, aemaise lava talu mai le tatalaina o le faaipoipoga. Ua ou lagonaina le latalata atili atu i le Tama Faalelagi ma Iesu Keriso i le na o le faalogologo lava i pesepesega paia. Sa ou faitauina ni tusi lelei ma auai i tala faatino lelei. O nisi taimi ou te alu ai i se tifaga pe ou te ta’alo na o au, ma ou te iloa e i ai lava sou taimi fiafia e tusa lava pe na o au. O isi taimi ou te maua ai se uo po o se tagata o le aiga matou te faifai mea faatasi.

Atiina a’e ni faigauo fou. I le avea ai ma se uso faatoa nofofua, sa amata ona ou nofouta i ni uso nofofua se toalua ua maliliu a la’ua tane o le matou uarota, ma isi e toatolu na tatalaina faaipoipoga talu ai nei, ma sa vave ona avea i matou o ni uo. E matou te faatasitasi soo, e masani lava i po o Aso Faraile. O matou faatasiga na fesoasoani ia i matou i o matou olaga vavalalata. Sa matou lagolago ma fefaamalosiau le tasi i le isi. Matou te fiafia faatasi. O se tasi o uso i le uarota, o se fomai, e masani ona matou feiloai e fesoasoani ia i matou ia matou malamalama i o matou lagona ma taulimaina o matou luitau. Matou te vaavaai mo itu lelei o tulaga tofotofoina o uso taitoatasi. Ma o i matou taitoatasi, mai lea taimi i lea taimi, e faaalia manatu faapea, o o tatou faigata na aumaia ai i tatou i se tulaga fou o le vavalalata faaleagaga i lo tatou Tama Faalelagi. E ui lava tatou te le filifilia o tatou tulaga tofotofoina, ae tatou te faafetaia faamanuiaga ua oo mai i o tatou olaga e fai ma taunuuga.

Auai atu i le malumalu. O le malumalu o se nofoaga o le lelei ma le matagofie, ma ou te iloa e taliaina au iina. E ui lava e mafai e le auai i le malumalu ona aumaia ia faamanatu tiga o feagaiga ua malepelepe, ae e faamafanafanaina a’u ona ou te iloa o faamanuiaga uma ua folafolaina o le malumalu o le a toe faia mo au pe afai ou te faia la’u vaega o le tumau i le moni ma le faamaoni. Ua ou iloa o a’u ma la’u fanau, o e na fananau mai i totonu o le feagaiga, o loo mautofi pea i faamanuiaga uma o ni tagata o le feagaiga. Ona o nei faamautinoaga matagofie, ua ou aoao ai ia lagona le filemu ma le olioli a o o’u i ai i totonu o le malumalu.

O le lagonaina o le olioli. E tutusa ma aso fanau ma lo’u atalii laititi o Matt. E atoa i ai lona 8, ae atoa i ai lo’u 50 tausaga. Sa manao Matt e papatiso ia e lona uso i lo ma aso fanau, o lea na faaavanoa ai e lo matou faiaoga o aiga le taimi e faatonu ai o’u atalii i le ala e faatino ai le sauniga ma mulimuli ane auai i le sauniga. Ina ua maea le papatisoga, sa faamauina Matt e le ulumatua i lo matou aiga, o se tuagane ua faaipoipo.

I le taimi o le polokalama, o la’u fanau uma e to’a 10, faatasi ai ma taitoalua e toalua ma fanau a fanau e toalua, sa tutu ma usu le pese “E Mafai Ona Faavavau Aiga.” O se taimi o le a ou manatua pea. O o’u lagona o le agaga faafetai mo le talalelei ma le tamaoaiga o faamanuiaga faaleagaga na ou maua e fesoasoani ai ia te au, lagolagoina au, ma aoaoina au e faatumulia lou loto. A o ou tilotilo atu i lou aiga matagofie ma faalogologo i upu sa latou usuina, sa ou iloaina e aunoa ma se masalosalo o i matou lava o se aiga e “faavavau”.