O Le Toe Malosi o Lo’u Tuagane ma le Alofa o le Tama Faalelagi
Ina ua mavae le faalavelave na tupu i lo’u tuagane, sa oo ina ou iloaina e i ai so’u Tama e alofa ia te au.
Ata na tusia e Dilleen Marsh
O lo’u tuagane, o Yerko, sa 19 ona tausaga ina ua so’a e se avetaavale onā. O le mea e laki ai, o le uo a Yerko na ave lana kosi o le fesoasoani muamua i le lua vaiaso i luma mai. Sa ia faatumauina le ola o lo’u tuagane seia taunuu mai le vaega mo faalavelave faafuasei e ave o ia i le falemai.
O le tele o falemai i le lotoifale e na o le tasi le fomai o neura e tiute, ae ina ua taunuu atu Yerko, sa i ai se vaega o fomai o neura sa potopoto mo se fonotaga faapitoa. Sa latou taufai galulue uma loa ia te ia.
E ono masina na nofo ai Yerko i le falemai, o le tolu o na masina sa ia le iloa se mea. A o i ai o ia iina, sa nofo ai lo’u tina e vaai o ia mai le 7:00 i le taeao seia oo i le 7:00 i le po i aso uma. Sa tatalo ma anapopogi tagata o le uarota ma le siteki mo Yerko ma sa tuuina atu ia te ia ni faamanuiaga faaleperisitua. Na tali mai a matou tatalo i le aso 1 o Ianuari, 2011 in aua ala mai o ia. Sa faaauau pea ona asiasi atu tagata o le au paia ia Yerko ma fesoasoani mai ia i matou i le vaaiga o ia ao faasolosolo ina malosi i le falemai. Sa pei i latou o ni agelu i lena taimi faigata.
O le taimi nei, o loo i ai pea lava ni nai faaletonu faaletino o Yerko, e aofia ai ma le puupuu o lona manatua. Ae ua savali o ia, ma e mafai ona ia faia ni talatalanoaga masani. E faigatai ona talitonu i ai fomai.
Sa ou i ai i Tamaitai Talavou i le taimi na tupu ai le faalavelave ia Yerko. O vaiaso taitasi ou te taulotoina ai le, “O i matou o afafine o lo matou Tama Faalelagi, o le e alofa ia i matou,” ae ou te lei malamalama moni i le taua o upu. Ina ua mavae le faalavelave, sa oo ina ou iloaina e i ai so’u Tama e alofa ia te au.
O le malumalu o se faailoaga o lena alofa. Sa faamauina ma’ua ma Yerkoi o ma matua, o lea sa ou iloa ai afai e maliu lo’u tuagane, o le a ma toe faatasi lava ma ia. O se faamafanafanaga tele lea mo lo’u aiga ma a’u.
E lei pine ona mavae le faalavelave, ae ta’u mai e fomai ia i matou o le a na o ni nai itula e ola ai Yerko, ma sa ou tatalo faatauanau i le Tama Faalelagi e laveai o ia. Ina ua ola Yerko, sa ou manao e auauna atu i se misiona e faasoa atu ai i isi ia vavega sa matou oo i ai.
O le tala i le toe malosi o lo’u tuagane o se faamanuiaga mo le tele o tagata sa ou aoaoina o se faifeautalai i Peru. A o ou faasoaina atu o matou aafiaga, aemaise i tagata e feagai ma tulaga faigata, sa tuia o latou loto.
E tele ina tatou taumanatunatu pe aisea e tutupu ai mea faigata, ae a tatou faalagolago i le alofa o lo tatou Tama Faalelagi, tatou te iloa ai e iu lava ina galulue faatasi mea uma mo lo tatou lelei (tagai Roma 8:28).