O Se Tusi na Tali Mai ae e Lei Auina Atu
Sa ou matauina le tusi i totonu o le ato o a’u tusitusiga paia ma tatalaina loa. Sa ou matua fiafia ou te lei lafoina!
Ata na tusia e David Green
Sa fanauina e o’u matua lelei ni atalii se to’afa ma a’u, le la afafine e toatasi, i lo la aiga i se faasologa vavalalata tele. Sa matou felata’i e le aunoa i le fatu o le tasi ma le isi e sili atu nai lo o matou tausaga. Matou te felagolagoma’i ma e tele manatuaga taua o o matou taimi sa faaaluina faatasi. Sa avea pea lava i matou o ni uo lelei tele!
O le mea lena na ou lagonaina ai le lotomomomo ina ua filifili se tasi o o’u tuagane e faamuta lona ola. Sa ou popole ne’i le mafai e lo’u fatu ona tatalia le tiga---o le tiga e lē o le upu sa’o lea. E leai se upu e lava lona malosi e faamatala ai le aafiaga matautia o le oti o sē e pele i le pule i le ola. E matuai suia atoa ai lou lalolagi.
Sa ou faalagolago i le Alii e fesoasoani mai ia te au e tausia lo’u aiga ma faafetaia’ia isi a’u tautinoga a o ou feagai ai ma fesili ua oi ai le agaga e uiga i lo’u tuagane ma lona maliu.
Ina ua ou ole atu i le Alii mo se fesoasoani, sa uunaia a’u e tusi a’u fesili i se tusi i le perofeta. Sa ou talitonu moni o a’u fesili sa matuai tetele ma loloto ua na o se perofeta e mafai ona taliina, ae sa ou iloaina atonu sa lei tatau ona auina atu i le perofeta se tusi. Sa ou faatuatuai ae i lena taimi sa ou tomanatu ai i le faamanuiaina na ou maua a o ou galue i ni uunaiga ua mavae.
Sa ou tusia loa se tusi ma loimata ia Peresitene Russell M. Nelson. Sa ou tusi e uiga i o’u lagona ma pe faapefea ona ou agai i luma pe afai ia tau lava ina ou iloa tali i fesili o loo taavili i lo’u mafaufau. Sa ou faaiuina la’u tusi, tuu i totonu o se teutusi ma faatuatusi ia Peresitene Nelson, ma momono i totonu o le ato o a’u tusitusiga paia.
Sa galo ia te a’u le tusi. Sa ou matauina le tusi i totonu o le ato o a’u tusitusiga paia i se taimi mulimuli ane, ma sa ou tatalaina. A o ou faitauina le tusi, sa ou iloa ai e ala i le faatuatua ma a’u lava suesuega o tusitusiga paia, tatalo, alu i le malualu, ma le onosai, sa taitai ai a’u e le Agaga Paia i tali i fesili taitasi sa ou tusia i lalo! Sa ou lagonaina le latalata i le Faaola ma Lona alofa.
Sa ou matua fiafia ou te lei lafoina le tusi! Nai lo lena, sa ou maua ni aafiaga taua na toe aoaoina ai a’u e faapelepeleina a’u e le Alii ma Ana fanau uma taitoatasi, ma o le a Ia taialaina ma taitaia i tatou.
Sa ou talitonu i se taimi e faapea, sa matuā lavelave a’u fesili ma e na o se perofeta e mafai ona taliina, ae ua oo ina ou iloaina mo a’u lava le moni o afioga a le Faaola: “Ou te le tuua outou o matuaoti, ou te sau ia te outou” (Ioane 14:18).