O Danna ma le Suega Matematika

Ata

Danna and the math test

“Danna,” na valaau mai ai Mama. “Ua e sauni mo le a’oga? O le taimi o tusitusiga paia!”

“Ua ou alu atu!” Sa momono e Danna lana tusi matematika i lana ato a’oga sesega ma asoa i lona tauau.

Sa taulotoina e Danna ma lona aiga se fuaiupu fou o se mau i vaiaso taitasi. O aso taitasi ae latou te lei o i le a’oga, latou te faata’ita’ia ai faatasi. Fai ma Mama o le aoaoina o se mau fou e pei o le faia o se uo fou. “O le taimi lava e i ai i lou loto, o le a i ai pea lava iina pe a e manaomiaina.”

Sa tutu Danna ma ona uso laiti i le faitotoa ma toe tauloto le fuaiupu o le vaiaso lenei. Sa mai le Mataupu Faavae ma Feagaiga.

“Tatalo e lē aunoa, ina ia mafai ona e sau ai o lē ua manumalo,” sa latou faia faatasi ai.

“O le a le uiga o le ’sau ai o lē ua manumalo?” Na fesili ai Tatiana le uso o Danna.

“O lona uiga e mafai ona e faia ni mea faigata!” Na fai atu ai Danna.

Sa luelue atu le ulu o Mama. “Pe a tatou tatalo, o le a fesoasoani mai le Tama Faalelagi ia i tatou.”

Sa toe fai faafia e Danna le mau i lona mafaufau a o ia faatopetope atu i le a’oga.

I se taimi mulimuli ane i lena aso, sa tu le faiaoga o Danna i luma o le potuaoga i autafa o le fu’a lanumoana ma paepae a Kuatemala. “Taimi o la outou suega matematika,” sa fai atu ai Señora Morales. Sa amata ona ia pasi atua se faaputuga pepa.

Sa fiafia Danna i le matematika. Ma sa lelei ai o ia! Sa ia suesue malosi mo le suega, ma sa ia iloaina e mafai ona lelei lana suega.

Sa aumaia e Danna lana penitala ma amata loa ona galue. Sa ia maua se lagona lelei e uiga i ana tali. Ona oo ifo lea i le seti mulimuli o fesili. Sa matuai faigata lava. Sa ia le manatuaina pe faapefea ona fai!

Sa lagona e Danna se popole faafuasei. Pe mafai faapefea ona ia faaumaina lana suega matematika? Sa tago atu i lana penitala ma toe faitau le isi fesili.

Ona oso mai lea o se manatu i lona mafaufau. “Tatalo e lē aunoa, ina ia mafai ona e sau ai o lē ua manumalo …”

Sa manava loloa ia Danna. Na moeiini ona mata ma faia se tatalo le leoa i lona loto.. Tama Faalelagi, faamolemole fesoasoani mai ia te au ia ou manatua mea sa ou aoaoina. Faamolemole fesoasoani mai ia lelei lo’u faia o lenei suega.

Sa toe tilotilo ifo Danna i lana pepa. Sa ia tilotilo i numera fesili ua uma ona ia maua tali. Ona ia toe tilotilo lea i fesili faigata. Sa amata ona ia manatuaina le auala e fai ai! Sa liusuavai lona gatete. Sa toe manava loloa o ia ma galue loa.

Ina ua tuua le aoga, sa fiafia Danna e faamatala i lona aiga le mea na tupu.

“O le taimi muamua sa le mafai ona ou manatua le auala e maua ai tali i nisi o fesili,” na fai atu ai Danna. “Ae o le taimi lea sa ou mafaufau ai i le mau sa tatou taulotoina. Sa fai sa’u tatalo, ma sa fesoasoani mai le Tama Faalelagi ia te au.”

“Malo lava!” Na fai atu ai Mama.

“Na e sau o lē ua manumalo!” Na fai atu ai Tatiana.

Sa ata Danna. “Na ou manumalo! Tusa lava po o le a le togi ou te maua, ou te iloa na ou faia le mea silisili.” Sa ia avatu ia Tina ma Tatiana se opo tele. Sa le mafai ona faatali o ia e vaai po o le a le mau uo o le a latou maua i le vaiaso fou. ●