Sa Ma Tutu i luma o le Palemene
Sa ma nonofo ma lou toalua i Niu Sila i le taimi o le 2012 ina ua finauina e le Palemene se pili e toe faamatalaina ai le faaipoipoga ma le aiga. Sa ma faitauina le pili ma sa ma popole pe o le a faapefea ona aafia ai le saolotoga faalelotu ma le paia o le tulaga faatina, tulaga faatama, ma le faaipoipoga.
O se vaega o le faagasologa, na valaaulia ai e le Palemene tagata uma i le atunuu e auina mai o latou manatu e uiga i le pili fautuaina. Sa ma iloa o le aoaoga faavae a le Alii e uiga i le faaipoipoga ma le aiga na manino mai lava i lenei faafitauli, ma sa ma lagonaina e tatau ona ma talanoa i ai. Sa ma matauina se pusa i luga o le fomu e mafai ona ma makaina pe afai ma te naunau e tutu i luma o le Palemene e puipuia lo ma tulaga. Sa ma tilotilo atu ma lou toalua i le tasi ma le isi ma faapea ane, “Sei ta makaina le pusa!”
Sa ma mauaina se tala i ni nai masina mulimuli ane, sa filifilia i maua e auai i luma o se komiti Faapalemene. Ina ua mavae le tele o tatalo ma le anapogi, sa lagona e lou toalua le taitaiina e faasoa atu ni manatu mai ia Elder Dieter F. Uchtdorf,1 ma sa ou lagonaina se uunaiga malosi e toe foi atu i le taimi na tuuina mai ai e Peresitene Gordon B. Hinckley (1910–2008) le “O Le Aiga: O se Folafolaga i le Lalolagi” i le sauniga aoao a le Aualofa i le 1995.2 Sa ma lagonaina uma le taitaiina o i maua ia iloa upu e fai atu; sa le mafaafitia. Sa ma iloaina foi o le a matuai faigata lava. Sa ma filifili e tuu atu mea uma i aao o le Atua ma faapea atu, “O le a ma faia mea e te finagalo ma te faia; o le a ma fai atu le mea e te finagalo ma te fai atu, ”3 e tusa lava pe le logoleleia. Sa sili atu ona ma popole e uiga i mea o le a faamauina i le lagi nai lo mea o le a faamaumauina i le Palemene.
Ina ua oo mai le aso ma sa latou valaau mai o ma igoa, sa latou fai mai o loo ia i maua le filifiliga o le tuuina atu taitoatasi po o le faatasia foi. Sa vave ona ma mafaufau, “O se faatusa! Ioe, o le a ma o atu ma puipuia faatasi le aoaoga faavae o le aiga.”
Ina ua uma ona tuuina atu a ma faamatalaga, sa amata loa e tagata o le Palemene a latou fesili. E foliga mai sa latou le fiafia i mea sa ma fai atu ai, ma sa lei faigofie le taliina o a latou fesili. Na iu lava ina uma lo ma taimi, ae ma te lei tuumuli ese, sa ma tuuina atu i tagata taitoatasi o le Palemene ma le au faasalalau se kopi o a ma faamatalaga ma se kopi “O Le Aiga: O se Folafolaga i le Lalolagi.”
O se aafiaga faigata lenei, ae na suia ai o ma olaga. Sa ma aoaoina e mafai (ma e tatau ai) ona talanoa atu i isi e uiga i le aoaoga faavae a le Alii e uiga i le faaipoipoga ma le aiga—ma e mafai ona faia i le lototele, manino, ma le agalelei. Ua faamalosia la matou sootaga ma le Tama Faalelagi, ma ua tuputupu ae le ma molimau i le aoaoga faavae o le aiga. Ma te molimau atu i faamanuiaga ofoofogia ma le olioli ua oo mai i o ma olaga o se taunuuga o lenei aafiaga.