“Mauaina o le Filemu mai Tala e Uiga i le Lē Mafai ona Maua ni Fanau o lo’o i le Tusi Paia,” Liahona, Setema 2020
Ua Na’o Tusiga Faatekinolosi
Mauaina o le Filemu mai Tala e Uiga i le Lē Mafai ona Maua ni Fanau o lo’o i le Tusi Paia
O le tusitala, lea ua avea nei ma tina o se masaga e lua tausaga le matutua, e nofo i Kalefonia, ISA.
Ina ua ou iloa le tele o tala i le Tusi Paia ua talanoaina ai le le mafai ona maua ni fanau, na ou iloaina sa i ai se mea taua e aoao mai i a latou lesona o le olaga.
Faatalitali, saunia e Caitlin Connolly, e le mafai ona kopiina. Sa tauivi foi le tusiata ma le faafitauli o le lē mafai ona maua ni fanau mo ni nai tausaga a o lei fanau mai ni masaga tama i le 2017.
E faigata ona taofi lo’u tagi pe a ou talanoa i tauiviga o le lē fananau sa ma onosaia ma lo’u toalua. Sa ou lagona o lo’o iai se faamoemoega. Sa ou lagona lo’u to’ilalo. Sa ou lagona le agaga faafetai mo fomai sa galulue malosi e fesoasoani ia i ma’ua. Sa ou lagona le faanoanoa i togafitiga taitasi na lē manuia. Sa ou lagona le alolofa o lo’u aiga ma uo. Sa ou lagona le tuulafoaiina ma le tuufua i o’u tiga. O se taimi faigata lea.
A o ou suesue i tusitusiga paia i le taimi lea, sa ou maitauina ai le toatele o ulugalii o e na mafatia i le lē mafai ona maua ni fanau: o Aperaamo ma Sarai, Isaako ma Repeka, Iakopo ma Rasela, Elekana ma Hana, ma Sakaria ma Elisapeta. Sa faate’ia a’u. Sa faailoa mai e le Tusi Paia na o se vaega itiiti o se talafaasolopito tele. Aisea na musuia ai e le Atua ia perofeta e faaaofia ai le tele o tala o le le mafai ona maua ni fanau? O lenei lagona e pei o le amataga o se tali i a’u tatalo; sa i ai se mea ii e tatau ona ou aoaoina. O lea sa ou filifili ai e suesue i tamaitai taitasi o lo’o i nei tala, ma a o o’u suesue i ai, sa ou a’oa’oina ai ni lesona taua se fa sa fesoasoani ou te tuputupu ae ai ma maua ai le filemu e ui i au tauiviga ma le lē mafai ona maua ni fanau.
1. O le lē mafai ona maua o ni fanau e le o se atagia lea o so tatou agavaa po o tomai
A’o fetaiai ma le lē mafai ona maua ni fanau, sa faigata ona le lagonaina e pei o a’u lea e sese, ua ala ai ona lē faatuatuaina a’u e le Atua ona o se mafuaaga. Pe sa lē lava ea lo’u faatuatua? Pe o le a avea ea au ma se tina e lē lava le lelei? Ou te taoto i le po ina ua moe lou toalua, ma le tiga i le fia iloa po o a uiga ou te le’o faia. Fai mai lo’u mafaufau e le o sa’o o’u manatu. Sa le mafai ona moe lo’u loto. O se tasi o lesona aupito maoae sa ou aoaoina mai le suesueina o nei tamaitai i le Tusi Paia e faapea, o le lē mafai ona ou maua o ni fanau, sa leai ma sona sootaga i le faatuatuaga a le Atua po o le leai o se talitonuga ia te a’u.
E eseese faamatalaga na ou mauaina mai i tamaitai taitasi na lei mafai ona maua ni fanau, ae sa tofu lava i latou uma ma ni mea e tutusa ai. Sa lei faigofie o latou olaga, ma o le leai o ni fanau ua na o se vaega e tasi o lena mea. O le to’atele o i latou na aafia ai i aafiaga o isi ona o le leai o ni a latou fanau. O nisi sa faatalitali mo se taimi umi lava mo ni fanau. Ae sa latou tausia poloaiga ma sa latou tatalo. Ina ua maua se atalii a Hana, sa ia aumaia o ia ia Eli le faitaulaga ma faamanatu atu ia te ia lana tatalo: “Lou Alii e, … O au lava le fafine sa ta iinei ma oe, sa ou faatoga atu ai ia Ieova. O le tama nei na ou tatalo atu ai“(1 Samuelu 1:26–27; tagai foi i le fuaiupu 10–12).
Sa tumau i latou uma o ni tamaitai malolosi ma faamaoni, e ui lava sa le’i tali vave mai a latou tatalo ma olega mo ni fanau i le auala na latou faamoemoe ai. Ma o le tali lena. Sa lei faalagolago lo latou faatuatua i le tali na latou maua, pe o le i ai o ni a latou fanau i lenei olaga. Sa latou filifili e talitonuina lo tatou Tama Faalelagi. E mafai ona ou faia le mea lava lea e tasi.
Ina ua maua e nei tamaitai ni fanau, sa latou tausia nisi o alii aupito maoa’e ma faatuatua na soifua i lenei lalolagi: o Isaako, Iakopo, Iosefa, Samuelu, ma Ioane le Papatiso. A o ou mafaufau i le aafiaga o le lalolagi mai nei alii taitoatasi, sa to’ia a’u i le faatuatuaga na tuuina atu e le Tama Faalelagi i nei tamaitai, e ala i le faatuatuaina na Ia tuuina i so’o se tasi ua Ia talosagaina a aoao Lana fanau—tina ma tama, fafine ma tamaloloa o aiga, faiaoga o le Aoga Sa, epikopo, taitai o le vasega pepe, ma isi. I le silafaga a le Atua, o nei tamaitai sa le faamatalaina ona o le lē mafai ona maua o ni fanau, ma sa faapena foi a’u. O i tatou o afafine ma atalii o le Atua, ma e talitonu o Ia ia i tatou.
2. O le fuafuaga a le Atua e sili atu mea e aofia ai nai lo mea e mafai ona tatou vaaia
O se Fafine Naunauta’i, saunia e Caitlin Connolly, e le mafai ona kopiina
Ou te fiafia i le tala ia Elisapeta, le tina o Ioane le papatiso. E laiti lava mea tatou te iloaina e uiga ia te ia ae sa ou a’oa’oina mai le tele o mea mai ia te ia. Sa tatalo Elisapeta ma lona toalua, o Sakaria, mo se fanau, ae e le’i taliina na tatalo i le auala sa la’ua faamoemoe i ai. Faaopoopo atu iai i lena, sa manatu faatauvaa ai isi ia te ia ona o le lē mafai ona maua o ni ana fanau, lea ou te mautinoa lava o le a faateleina ai lona lototiga.1 E ui lava i lenei mea, sa tumau faamaoni pea o ia ma lona toalua i poloaiga ma sauniga a le Alii. Atonu o i la’ua o ni tagata ofoofogia.
Mulimuli ane, sa faamanuiaina i laua i se atalii. Ou te tau manatu poo a ni lagona o Elisapeta ina ua ia iloaina o le taimi o lona maitaga sa mafua mai ona o le mea moni o lana tama, o Ioane, o le a saunia le ala mo le Mesia. O le avea ai o ia ma tamaitai faatuatua, atonu na ia faaaogaina o se lesona e aoao ai lana tama e faalagolago i le taimi a le Alii.
Sa faamanatu mai e Elisapeta ia te a’u e mafai ona ou iloa atu na o sina fasi vaega o le mea o loo silasila i ai le Alii. O lenei manatu sa uunaia ai au e faaauau ai pea i le maea ai o togafitiga lē manuia taitasi ina ia maua se fanau. Sa le mafai ona ou malamalama pe aisea na taitaia ai pea i ma’ua e le Alii agai i ala na foliga o se toilalo aua na i’u i le leai o se ma pepe. O le taimi nei, o le toe tepa i tua, e mafai ona ou iloa ai mea e foliga mai o ni toilalo na avea ma laasaga i le agai atu e malamalama e uiga i Lona lava taimi.
Sa i ai se taimi na fautuaina ai e Peresitene Russell M. Nelson ia “tuafafine e leai ni fanau” o le Ekalesia ina ia “manatua [o] taimi faatulaga e faavavau a le Alii e sili atu ona umi nai lo itula ua tuua na o au sauniuniga po o le aofai o lenei olaga faaletino. O ia mea, e na o se vaega itiiti o le sekone pe a faatusatusa atu i le faavavau.“2 Ou te iloa e tele atu mea Na te silafia ma iloa e uiga i lo tatou lumanai, ma afai tatou te faalogo ia te Ia, o le a Ia taitaiina i tatou i taimi uma i ala ia o le a oo atu ai i le fiafia sili atu.
3. Ia maua le olioli i le taimi nei ma talisapaia le malamalama o loo e mauaina
O se tasi tina i le Tusi Paia sa ou aoao mai i ona aafiaga, o Eva. Ou te alofa lava ma vaai atu ia Eva. Sa faatuatua, lototele, agaalofa, ma atamai o ia. Mafaufau i ona tala e ala i vaaiga o a’u tauiviga ma le lē mafai ona maua se fanau, ua na o le faalolotoina ai o lou faamemelo i lenei tamaitai maoae. Ou te le iloa pe na iloa lelei e Eva lona lē gafatia ona maua ni fanau e aunoa ma le tuua ai o le faatoaga o Etena, ae na faamalamalama mai e Elder Jeffrey R. Holland o le Korama a Aposetolo e Toasefululua e faapea o Eva na “malamalama o ia ma Atamu e tatau ona pa’ū’ū ina ia mafai ai ona ‘i ai tagata [ma tamaitai]’ [2 Nifae 2:25] ma o le a i ai le olioli”3 (tagai i le 2 Nifae 2:22–25).
Ua tatou iloa le auala na vaai ai Eva i lana faaiuga e ai i le fua, mai se manatu le taualoa. Ina ua uma ona tuliesea Atamu ma Eva mai le faatoaga, na oo mai se agelu ma aoao i laua e uiga ia Iesu Keriso ma Lana Togiola (tagai i le Mose 5:6–9). Mulimuli ane sa oo ifo le Agaga Paia i luga o Atamu, ma mafua ai ona ia molimau atu. Ma sa faapea mai Eva ma lona fiafia tele: “Ana le seanoa la ta solitulafono po ua lē maua e i taua ni fanau, ma po ua lē mafai ona ta iloa le lelei ma le leaga, ma le olioli o le togiolaina o i taʼua, ma le ola e faavavau ua tuu mai e le Atua ia i latou uma o e e usiusitai” (Mose 5:11; faaopoopo le faamamafa). Sa ia maua le olioli i lana faaiuga. E le mafai ona ou vaai faalemafaufau i le tiga tele o le tulia i fafo, i le tuua ai o le afioaga o le Atua sa ia alofa i ai. Ae peitai, a o ia toe tepa i tua i lena faaiuga, sa olioli o ia i le malamalama sa ia mauaina, i le iloaina lea, e ala i le Togiola a Iesu Keriso, e mafai ona ia toe foi atu i le Tama Faalelagi. Sa aoaoina a’u e Eva ia maua le fiafia i le taimi nei. Sa mafai ona ia faaaluina lona olaga e moomoo o loo i ai pea o ia i le faatoaga o Etena, e moomoo mo le olaga sa ia tuua. Nai lo lena, sa ia maua le olioli i lona tulaga o i ai nei: i lana fanau, i le malamalama na ia maua, ma i le mana o le Togiola a le Faaola. O le lesona na maua mai ia Eva sa avea ma se mea mamana mo a’u. I le taimi ao o’u tauivi ma le lē mafai ona maua ni fanau, sa tele ina faaosoosoina a’u e taulai atu i le mea na ou le mauaina, ae e ala i le taulai atu i le taimi nei, sa ou maua ai foi le olioli.
Faatasi ai ma isi mea, sa mafai ona ou faaaogaina le taimi lenei e ofofua atu ai lo’u taimi o se tagata fai sauniga i le malumalu. O le taimi muamua, sa ou auai i le malumalu ona o le mea lena sa tatau ona ou faia. Ae o le taimi nei ua sili atu ona ou fiafia i ai. E i ai so’u agaga faafetai loloto mo sauniga ua tatou maua i le malumalu. O faamanuiaga ua folafolaina ia i latou e tausia a latou feagaiga e ofoofogia! Ma ua tuuina atu i tagata uma. Talavou ma matutua. Maloloina faaletino po’o ni aafiaga tumau o le olaga. Faaipoipo ma le lē faaipoipo. I latou e i ai fanau ma i latou e leai ni fanau. O a’u o se tagata suia ona sa ou auauna atu i le malumalu. Ou te faatauaina atili le taua o aiga e faavavau. E i ai sou malamalama loloto atu i le Togiola a le Faaola. Ou te tatalo ma le loto i ai. Ma ou te iloa o le malamalama ma le faatuatua sili atu sa ou maua mai le auauna atu i le malumalu o le a avea ai a’u ma se tina sili atu ona lelei.
4. O i tatou uma o tina
O leAoaoga a Tinā, saunia e Caitlin Connolly, e le mafai ona kopiina
Sa aoaoina foi a’u e Eva e faapea, o le avea ma se tina e le tatau ona fesootai ma le mauaina o fanau: na taua uma lava e le Atua le Tama ma Atamu o Eva “o le tina o tagata ola uma” (Kenese 3:20; Mose 4:26) a o lei fanauina e ia se fanau.4 E pei ona fesili Ardeth Greene Kapp, o le sa avea ma Peresitene Aoao o Tamaitai Talavou ma o lē sa lei mafai ona maua sana ia lava fanau, “Pe ua na o latou ea e fananau mai fanau ua ta’ua o tina? E le o le misiona paia ea o le tulaga faatina na muai faauuina e le Atua mo tamaitai uma a o le’i i ai le lalolagi? “5 Sa ia matauina foi: “Ua ou iloa e mafai ona tatou … olioli i le valaauga paia o le tulaga faatina. O le fanauina o ni fanau, ua na o se vaega o lenei valaauga paia.“6 O lo’u iloaina o lenei mea o se vaila’au malū i lo’u loto nutimomoia. Sa avea a’u ma se tina—e lē o se tulaga masani, e moni, ae sa i ai sa’u matafaioi e faatino, o se tiutetauave na tu’u mai ou te tauaveina.
Na saunoa mai Sheri Dew, o le sa avea muamua ma Fesoasoani Lua i le Au Peresitene Aoao o le Aualofa:
O le tulaga faatina o se mea e sili atu nai lo le fanauina o fanau. O le fatu lea o le avea ai o i tatou o ni tamaitai. O loo faamalamalama mai ai lo tatou faasinomaga moni, lo tatou tulaga ma le natura paia ma uiga fa’a-natura ma uiga tulaga ese na tuuina mai e lo tatou Tama ia i tatou.
“I le avea ai o ni afafine o lo tatou Tama Faalelagi, ma le avea ai ma ni afafine o Eva, o i tatou uma lava o ni tina ma ua leva ona avea i tatou ma tina.”7
O le aafiaga o Eva, na ou iloa ai o le avea ma tina o se valaauga e alofa, faafailele, ma taitai i latou o se augatupulaga talavou, ma na ou maua lena valaauga e tusa lava pe na ou le fanauina ni fanau. I ni nai aso o le iloaina sa ia te au ni faafitauli o le le mafai ona fanauina o ni fanau, sa valaauina au o se taitai o Tamaitai Talavou i lau uarota. Ou te iloa o se faamanuiaga alofa lenei mai se Tama Faalelagi alofa. A o sasa’a atu lou loto i lena valaauga, na avea tamaitai talavou taitoatasi e pei o se tama teine ia te au. Sa ou lagonaina se alofa mo i latou lea na o le Tama Faalelagi e mafai ona sau ai. Sa mafai ona ou oo i le uiga o le avea ma se tina e aunoa ma le fanauina o ni fanau, ma sa matagofie.
Ou te faafetai mo tala e uiga i nei tamaitai ofoofogia, ma amiotonu o loo i le Tusi Paia. Ou te lei faamoemoe o le a loloto so matou sootaga i ni tamaitai sa ola i se taimi ese mai lou lava olaga, ae o lo latou faatuatua ma le lototele i le faafesagai ai ma le le mafai ona fanauina o ni fanau ua taua tele ia te au. Ua ou aoao ina ia sili atu ona ou talitonu atoatoa o au o se afafine o le Atua ma e alofa o Ia ia te au, e talitonu ia te au, ma e i ai sana fuafuaga mo au. Ua ou aoao e fiafia i le malumalu ma saili ni avanoa e aoao ai e tusa lava pe oo i le ogatotonu o le lototiga. Ua ou mauaina se malamalama sili atu i le uiga o le avea ma se tina. O le mea e sili ona taua, ua ou aoaoina e oo lava i faamatalaga aupito itiiti i tusitusiga paia e mafai ona faaaoga e se Tama Faalelagi alofa e aumai ai ia i tatou le malamalama ma le faamafanafanaga.