O Kevin ma Kendra Henderson

Ata

Henderson family praying

O le taimi muamua, sa tetee ia Kendra i le naunau o Kevin i le Ekalesia. O lenei ua la toe tepa i tua ma vaaia ai le ala na taialaina ai i la’ua uma e le Alii i le talalelei.

Leslie Nilsson, tagata pueata

Kevin:

Sa ou feiloai atu ia Gregory a o ma galulue i le falemai o Veterans Administration I se tasi aso sa ma talanoa ae sa sau se tagata ma fesili ia Gregory pe o ia o se Mamona. O iina, sa amata ai ona la faatusatusaina le Tusi Paia ma le Tusi a Mamona. Sa i ai se mea na taia ai a’u a o la talanoa. Sa oo ai ina ou fiailoa.

Ina ua ou taunuu i le fale, sa ou fesili i lo’u toalua pe na te iloaina se mea e uiga i Mamona.

“Ia aua lava nei e talitonu i se mea o na mea,” sa ia fai mai ai ia te au.

Sa tumau pea lo’u fiailoa ma lo’u naunau e toe foi i le galuega i le aso na sosoo ai ma aoao atili ai. A o matou talanoa sa fesili mai Gregory ia te au pe sa ou talitonu na i ai lo’u agaga a o lei i ai lenei olaga. Na matua tuia ai a’u i le fesili Ou te lei mafaufau lava i lena mea muamua.

“Ia, afai ou te matea, ou te fai atu ioe,” sa ou fai atu ai.

“E anoanoai le malamalama o loo teuina e le Tama Faalelagi mo Ana fanau uma,” na ta’u mai ai e Gregory ia te au.

Sa ou talanoa ia Kendra e uiga i mea sa ou aoaoina, ae sa ia tetee i ai. Sa ia fai mai, o ia ma tamaiti o le a le tuvae lava i totonu o “lena” lotu. Sa oo ina ou matua tetee lava i ai, o se mea e uiga ese. Sa ou puipuia se mea sa ou le iloa lava se mea e uiga i ai.

I se tasi po, sa ou momoliina ai Kendra i le fale o sana uo, ae ou alu e vaai lo’u tamā. O ia o se tiakono i se isi lotu, o lea sa ou fefe ai e fesili atu ia te ia pe sa ia iloa se mea e uiga i le Ekalesia.

Sa ia fai mai, “Sa ou faalogo i se mea e uiga i lo latou perisitua sa lei faatagaina mo tagata uli, ae o oe o se alii lelei. Tatalo e uiga i lena mea, ma o le a ta’u atu e le Atua ia te oe.”

O lena po, sa ou tootuli ai e tatalo, ae sa le mafai ona ou mafaufau i se mea e fai atu ai. Ia, o lea ua ou tootuli, sa ou mafaufau ai. E tatau ona fai atu sa’u tala! O lea sa na ona ou fai atu ai, “Le Tama Faalelagi Pele, ou te alofa ia te oe.”

Sa le mafai ona ou moe i lena po. Sa ou feminoia’i ma feliuliua’i solo. Sa ou manao i se mea---sa peisea’i sa ia te au se faanaunauga. Sa ou ala ae i lena taeao ma sa ou faamoemoe o le a le toe talanoa mai Gregory i se mea e uiga i le Ekalesia. Sa ou le mautonu e uiga i le mea ua tupu nei. Sa ou le fia manao foi e avea lenei mea ma mea e malepe ai lo ma aiga. Ae sa i ai ni mea patino sa amoti ai lo’u naunau, ona ou fesili lea ia Gregory. Sa ou aoao atili nai mea iti e uiga i le Ekalesia.

Na faaauau pea ona ma femisaa’i ma Kendra. I se tasi o a ma misa, sa ou lagonaina se uunagia e aua nei ou tautala atu i se mea. Sa ou alu i le faleleta’ua ma faap’aū i o’u tulivae.

Sa ou tau atu i le Tama Faalelagi o le a ou faia soo se mea pe afai Na te ta’u mai ia te au le ala e finagalo o Ia ou te uia. Ina ua ou mafaufau i le papatisoga, sa ou lagonaina le gasē, e peiseai o le matagi, na ufitia ai au. O le Agaga Paia sa ta’uina mai ia te au, “O le mea lea e tatau ona e faia.”

Sa ou saunia e papatiso. O le taeao na sosoo ai, sa ou alu e faigaluega ma faasoa atu lo’u aafiaga ia Gregory. Sa ou fai atu, “Sole, ua ou sauni.”

Sa ia faatulagaina le matou feiloaiga ma faifeautalai. Sa la aoaoina a’u i lesona, ma sa sologa lelei ma vave naua! Ou te lei fesiligia lava se mea e tasi. Sa ou iloaina na vaai le Perofeta o Iosefa Samita i le mea na ia fai mai na ia vaai i ai. Sa i ai sa’u molimau. Peitai, na atili ai ona saga mamao ese atu Kendra ona o lenei mea

Kendra:

Sa ou matua mafatia faalemafaufau, faaletino ma faaleagaga. Sa ou siitia moni lava i Florida mo ni nai masina. I se tasi aso sa ou tagi atu ai i le Atua, “Ua ou lelavā misa. Faamolemole fesoasoani mai ia te au e vaai pe moni lenei Ekalesia.”

A o ou tatalo, sa oo mai le filemu ia te au. O le taimi na ou toe foi mai ai i Karolaina i Matu, sa lei toe i ai ia te au le malosiaga le lelei sa ia te au muamua. Sa masani ona ou tuua le potu pe a o mai faifeautalai, ae ina ua mavae lea aafiaga, sa amata ona matou fegalegaleai ma i la’ua ma ou kukaina foi se taumafataga i le afiafi mo i la’ua. Ae sa ou le’i saunia lava matou te o faatasi ma Kevin i le lotu.

Sa amata ona ou sailiili mo se isi lotu, e ono fiafia i ai la’u fanau, ae tusa lava po o le a le lelei o se lotu, e fai mai lava la’u tama teine o Aryanna, “Ou te fia alu ma te o i le lotu ma Tamā!” Sa i’u ina matou ioe e o i se tasi Aso Sa i le lotu a Kevin, ona matou o lea e sue se isi lotu i le Aso Sa e sosoo ai.

Mulimuli ane, sa tesi mai ai se uo sa ou maua i le uarota ma fesili mai pe ou te manao matou te pepese i le aufaipese mo se konafesi faalesiteki. Aisea e manao ai o ia ou te pese? Sa ou mafaufau ai. Oa’u e le o se tagata o le ekalesia. Sa ou faafiufiu pea, ae peitai na iu ina ou fai atu, “Ua lelei, o le a ou alu atu.”

Sa le pei o le pepese i isi lotu e i ai se faaili, e leotetele, ma e pei o la e te i ai i se konaseti. Sa matou usuina le “Come Thou Fount of Every Blessing.” O upu o le pese ma le fati matagofie o le musika na matuai ou ootia ai.

Kevin:

I ni nai masina mulimuli ane, sa matou nonofo i le sauniga anapogi ma molimau, ae fai mai Kendra ia te au, “Ou te manatu e tatau ona e alu i luga e faasoa lau molimau e uiga i le tatalo ona o le mea na ia faia mo Tama.”

O le tamā fai o Kendra, sa faatoa feagai ai ma se ma’i fatu ogaoga. Sa ma talosagaina le uarota e tatalo mo ia ma lo matou aiga i lena taimi. Ma le agaga faafetai, sa manuia o ia.

“Ou te manatu e tatau ona e alu e fai,” sa ou fai atu ai. Sa alu o ia ma fai atu lana molimau. Sa matuai ofoofogia. Ina ua uma lena, sa amata ona matala mai mea mo ia.

Kendra:

I le amataga o le 2018, sa ou faalogo pea lava pea i le igoa “Peresitene Monson.” I le taimi lena, ou te lei iloaina o le perofeta lena. I se tasi po, na o mai ai faifeautalai ma fesili mai pe o a mai au.

“O lea ou te manuia,” sa ou fai atu ai, “peitai e i ai se igoa o se tagata o loo oo mai pea i lo’u loto, ae ou te le iloaina po o ai o ia.”

“O ai le igoa?” Sa la fesili mai ai.

“Peresitene Monson.”

“Kendra, ua le na o se igoa lena,” sa la fai mai ai. “O le igoa lena o le perofeta lea sa faatoa maliu talu ai nei. E tatau ona e tilotilo i nisi o ana lauga ma vaai pe o le a le mea o loo finagalo le Alii e aoao mai ia te ia.” Sa ou autilo i nisi o ana savali, ma sa matuai pa’i mai lava ia te au ma sa fesoasoani ai ia te au. Mai iina, sa foliga mai ai o loo fefo’ifo’ia’i mai lava le talalelei ia te au.

O taimi pe a matou o e aai i se faleaiga, e masani lava ona ou okaina sa’u ti suamalie, ae e fai mai lava Kevin, “E te le manaomia se ti suamalie; vaai mai se isi mea.”

I se tasi aso sa ou alu ai i se faleaiga o taumafa faavavave mo la’u malologa i le aoauli, ma oka sa’u ti suamalie. I ni nai minute mulimuli ane, sa fai mai se tagata faigaluega, “O le taimi tonu lava na e okaina ai lau ti, na malepe ai le masini.”

Sa ia fai mai e atoa se itula e toe faaleleia ai le masini. Sa na o le 30 minute o la’u malologa. O lea sa oka ai na o sa’u apainu. O le taimi lea, sa ou ata ma faapea, “Ua lelei, o lea ua ou iloa!”

Sa ou manao e auai i le Ekalesia, ae ou te lei manao foi e faaita lo’u tina. E tele le sao o lo’u tina i le faiga o a’u faaiuga a o ou tuputupu ae. O ia o se faifeau, o lea sa ou faalogo atu ai lava e le aunoa ia te ia nai lo lo’u alu i le lotu e aoao ai mo au lava ia.

Sa fai si o’u faatuatuai laitiiti ina ua matou faatulagaina se aso mo lo’u papatisoga. Sa o mai faifeautalai, ma sa matou talanoa e uiga i ai.

Mulimuli ane, sa ou fesili i la’u tama teine, o Aryanna, “E te fia papatiso?”

Sa fai mai o ia, “Mama, ua ou sauni i soo se taimi ua e saunia ai.”

Fai mai a ia, o soo se taimi lava e alu ai i le lotu, e taufetuli uma mai teineiti ma faafeiloai o ia. Sa latou aveina o ia i vasega o le Peraimeri, ma e agalelei e le aunoa. Sa latou mananao ia avea o ia o se vaega o mea e fai. Sa avea o ia o se uo lelei tele ma se tasi o teineiti. O le mea lena sa fiafia i ai o ia.

I le papatisoga o Aryanna, sa maligi ona loimata o le olioli. Ina ua ou vaai atu ia te ia, sa ou mafaufau, Ua ou i ai i le mea e tatau ona ou i ai.

Kevin:

Ou te iloa ua aumaia e le Tama Faalelagi le talalelei i lo matou aiga aua e alofa o Ia ma e manatu alofa mai ia i matou.