O Lo’u Atalii, o le Tusi a Mamona, ma A’u
E faapei lava ona sa auauna atu le Faaola ma aoao atu taitoatasi i le taimi, o loo fesoasoani foi o Ia ia i tatou e aoao atu a tatou fanau taitoatasi i le taimi.
Ata na tusia e Allen Garns
I se tasi aso sa ou matamata ai i se faatalanoaga ma Brother Tad R. Callister, sa avea i lena taimi ma Peresitene Aoao o le Aoga Sa. Ao fai a’u tusigamanatu, sa ou maua se uunaiga i le ala e faaleleia ai le ma sootaga ma la’u tama, o Ioane. Sa uunaia au e tatau ona ma faitauina faatasi le Tusi a Mamona atoa a o lei oo i lona papatisoga i le ono masina mulimuli ane.
Sa matuai manino lelei lea uunaiga ma sa ou iloaina le potu e tatau ona ma faitauina ai ma le taimi e tatau ona ma faitau ai. Sa ou lagonaina foi se uunaiga iloga e tatau ona faamaea le ma faitauga i lotoa o le Malumalu o Meridian Idaho.
A o ma faaavanoaina se taimi e faitau ai o le-tasi-ma- le isi i po taitasi, sa faasuamalieina le ma sootaga. Sa tele atu lo ma onosai o le tasi mo le isi, sa sili atu lo ma malamalama mo manatu o le tasi ma le isi, ma sa ma lagonaina e le aunoa le faatasi mai o le Agaga Paia.
O le po a o loma lo ma faaumaina o le tusi, na ma faitau ai i le folafolaga a Moronae e faapea afai tatou te ole atu i le Atua ma se loto faamaoni, manatu moni, ma le faatuatua ia Keriso, pe moni le Tusi a Mamona, o le a tatou iloa le moni e ala i le mana o le Agaga Paia (tagai Moronae 10:4–5). Na ma lagonaina le faamautuuga e moni le Tusi a Mamona, o Iosefa Samita o se perofeta a le Atua, ma o Le Ekalesia a Iesu Keriso o le Au Paia o Aso e Gata Ai o le malo o le Atua i le lalolagi.
O le aso na sosoo ai, sa ma saofafai ai i luga o se nofoa i lotoa o le malumalu. Sa ma vaavaai ae i le faatagata o le agelu o Moronae ma toe faitau lana molimau faaiu. Talu mai lena aso, e tele taimi sa ta’ua ai e Ioane le taimi sa ma faitauina faatasi ai le Tusi a Maona i le malumalu. O lenei, o taimi uma ou te alu ai i le malumalu, ou te vaai ai i le nofoa umi ma tomanatu ai i le taimi faapitoa sa ma maua ma Ioane ina ua maea la ma sini musuia.
Na saunoa Peresitene Henry B Eyring, le Fesoasoani Lua i le Au Peresitene Sili, “O le matua poto o le a vaai atu o le avanoa o loo taoto i le taitaiina o tamaiti taitoatasi, ma i latou lava, ia talia atoatoa atili le valaaulia a le Alii ia o mai ia te Ia.”1
Ou te manatu e i ai le taua i le fasifuaitau “tamaiti taitoatasi.” E faapei lava ina sa auauna atu le Faaola ma aoao atu taitoatasi i le taimi, o loo fesoasoani foi o Ia ia i tatou e aoao atu a tatou fanau taitoatasi i le taimi.
O le taitaiga faaleagaga na ou mauaina e faitau faatasi ma Ioane na faaali mai ai ia te au e sili atu le silafia e le Alii o la’u fanau nai lo lo’u iloa. Ou te iloa afai ou te faalogo ma mulimuli i Ana fautuaga, o le a Ia tuu mai ia te au le taitaiga i le ala e mafai ona ou fesoasoani ai e toe taitai ma taiala ai la’u fanau taitoatasi ia te Ia.