Sau, Mulimuli Mai ia te A’u: Tusi a Mamona
E mafai faapefea ona tatou faalogo i le siufofoga o le Atua?
14–20 Setema
A o lei toe mamao le auaunaga a le Faaola ia sa Nifae i le mavae ai o Lona Toetu, sa faalogo sa Nifae i le siufofoga o le Tama Faalelagi o folasia mai Iesu Keriso o “lo’u Atalii Pele, o le ua ou fiafia lava i ai” (3 Nifae 11:7). O le aafiaga o sa Nifae e mafai ona aoao ai i tatou i ni mea se tele e uiga i le ala e mafai ai ona tatou faalogo i le siufofoga o le Atua e ala i le Agaga Paia i o tatou lava olaga.
Alu i le Malumalu
Sa faapotopoto sa Nifae faataamilo i le malumalu i le laueleele o Nuumau (tagai 3 Nifae 11:1). O le i ai i lena nofoaga paia, sa tuuina atu ai ia i latou se avanoa e faalogo ai i le siufofoga o le Atua.
E mafai faapefea ona tatou saunia e o i le malumalu ma faalogo i le siufofoga o le Atua e ala i le Agaga?
Lagonaina le Mana
O le taimi muamua, sa faalogo sa Nifae i se “leo itiiti” ae “sa lei malamalama i le leo” (3 Nifae 11:3). O lea leo “sa ati i le totonugalemu o i latou” (3 Nifae 11:3).
E mafai faapefea ona tatou lagonaina le mana o le “leo filemu ma le itiiti” o le Agaga? (tagai 1 Tupu 19:11–12).
Tatala Ou Taliga
Ina ua uma ona faalogo sa Nifae i le leo mo se taimi lona tolu, sa “latou tatala atu o latou taliga e faalogo i ai” (3 Nifae 11:5). Sa latou faalotomaualaloina i latou lava ma sa naunau e faalogo.
E mafai faapefea ona tatou faalotomaualaloina i tatou lava e faalogo i le siufofoga o le Atua e ala i le Agaga?
Liliu agai atu i le Punavai
O le taimi lava na tatala ai e sa Nifae o latou taliga, sa latou “tetepa taulai faasasaga atu i le lagi, i le mea na sau ai le leo” ma “na latou malamalama ai i le leo lea na latou faalogoina” (3 Nifae 11:5–6).